Boso tungga dae-bafok hihiin
4
Ei mambue masisimbo bafak ma maule esa no esa, na huu hambu hataholi la lai ei laladam, lasusua tingga-tingga, fo ala nau sangga sila dale namahoko hehelin. 2 Ei masuu sangga hambu buas esa, tehuu ei ta bisa hambu sana. Boe ma ei dale hedi, mambue masisimbo bafak ma mahuu, losak ei ta mameda susuek, ma sangga tao misa hataholi.Huu ei ta hule-haladoi, ma ei ta hule Manetualain, de ei ta hambu hata fo ei hulek. 3 Tehuu mae ei hule-haladoi matepa basa ai batu la boe oo, ei ta hambu hata fo ei hulek, na huu kada ei hule mia ei ao-mbaa nasuu hehelim.
4 Memak ei hataholi ta dale katemak! Ei sama leo ina-touk pasan esa, de esa ta dale katemak no esa, losa hohongge. Mete ma ei mba'a ei aom mala no dae-bafok hihiin, na, ei tao ei aom mala lamusuk lo Manetualain. Ndindia so! 5 Huu ndia de Manetualain Susula Malalaon sulak nae, “Manetualain tao Dulan nai ita dalen so. Ma Dulak ndia hihiin, fo ita dale katemak takandondoo henin to kada Ndia. Huu Ndia ndia, holo.” 6 Nakalenak bali, Manetualain bei nau fee nakadaik Ndia dale malolen boe. Huu ndia de Susula Malalaok sulak nae:
“Manetualain laban hataholi mana koaok kala,
tehuu Ana natudu dale malolen neu hataholi dale taidaek kala.”a
7 Manetualain ndia, ita Lamatuan fo naena haak palenda ita! De fee ei aom mala neu Ndia, fo tungga Ndia hihiin. Ei boso tungga nitu la malanggan hihiin. Laban tingga-tingga ndia. No leo ndiak, ana nalai la'o ela ei. 8-9 Masusua fo ei masoda dalek esa mia Manetualain. No leo ndiak, Ndia deka-deka no ei boe.
Wei, ei mana masoda manggenggeok kala! Ei musi tao mandoo ei dala sodam mala. Ma ei madale kaba'ek kala! Ei musi la'ok no ndoos tungga Manetualain, ma boso la'ok singgo kii-konak bali. Doo basa ia, ei masoda mamahoko ma kada hika kakaka. De hatematak ia, ei hahae leo! Ei bubuluk ei dalem mala kaba'ek, ma ei salam mala so. De malolenak ei fale ei dalem mala, ma mamatani makaleleu leo. 10 Mete ma ei malelak tebe-tebe mae, ei memak ta mandaa nai Manetualain matan, na, dei fo Ana so'u nala ei dadik neu hataholi fo nandaa nai Ndia matan.
Boso kokolak tao maboboo hataholi naden
11 Tolanoo nggala ei! Boso kokolak tao maboboo esa no esa nade malolen. Te mete ma ei tao leo ndiak ma mambue fee salak makandondoo henin neu hataholi so, na, ei la'o lena Manetualain heti-heun so fo nae, “O musi sue o tolanoom, sama leo o sue o ao hehelim.” Ma mete ma ei ta tungga heti-heuk leo ndiak, na, ei so'uk ei aom mala deman lena heni Manetualain Heti-heun so. 12 Kada Manetualain mesak kana tao Heti-heuk ndia. Kada Ndia mesak kana naena haak fo naketu ita dede'an. Kada Ndia mesak kana naena haak fo nasala'e nala ita do, huku nisa ita. Ei ta maena haak fo maketu hataholi dede'an do, kokolak tao maboboo hataholi nade malolen.
Boso kokolak koaok
13 Leo iak! Ei musi bubuluk fo boso kokolak mae, “Leledon ia do, fo'a, ai sangga mini kota ele miu! Ai sangga miu leo nai ele losa teuk esa. Ma ai sangga danggan fo hambu nanalak faa dei!” 14 O bubuluk hata la'e-neu fo'a mai? Ta hambu hataholi esa bubuluk sodak ia hihiin. Hataholi sodan sama leo makamamasuk, fo kada nana nitak ta doo anak, boe ma mopo tutik kana.b 15 Malolenak ei kokolak mae, “Mete ma Manetualain sue, na, ela ita tao leo iak. Mete ma Manetualain nau, na, ita bisa tao leo ndiak.” 16 Mete ma ta kokolak leo ndiak, na, kada ei kokolak koaok ndia. Ndia sama leo ei mafalende heni Manetualain nai ei dudu'am mala. Sala ina-huuk ndia so!
17 Masaneda neulalau! Hataholi fo bubuluk bee ndia tetebes so, tehuu ta tao tunggan leo ndiak, na, ana tao salak so.