2 Ita basa nggata kokolak salak mata-matak kala. Tehuu see fo bisa nanea ndia bafan, fo ta popode maan, na ana bisa heti ndia soda katematuan boe. 3 Ha'i conto neme ndala mai. Ita bisa heti ndala ina-huuk, fo tungga ita hihiin, no kada hela ndia tali polen. 4 Conto fe'ek bali neme ofak mai. Ani belak fumbu nakamiminak ofa ina-huuk tungga ndia hihiin. Tehuu papa uli kadi'i anak bisa heti ofak lala'on fo tungga mana to'u uli hihiin. 5 Leo ndiak boe oo, no ita bafan. Bafak ndia kadi'ik. Tehuu ndia tataon ina-huun seli!

Ita bafan sama leo ha'i buna kadi'ik, fo ana bisa na'a heni basa nula katemak! 6 Bafak ndia, sama leo ha'i mbilak. Ita pake ita bafan nala fo kokolak takalulutu dede'ak no'uk kala. Ita bafan nala bisa lakalulutu ita soda katematuan nala. Dede'a manggalauk no'uk nai dae-bafok ia, kalua leme hataholi bafan nala mai. Ma nitu la malanggan boe oo, pake hataholi bafan fo nakalala'ok ndia uen.

7 Hataholi tao kamau nitak banda fui mata-matak kala, banda mana lae-lodok kala, mbuik kala, ma i'ak kala malai tasi dale. 8 Tehuu ta hambu hataholi esa boe, fo bisa tao kamau nitak ndia bafan. Huu bafak ndia, bua manggalauk esa, fo ta nana heti nalak. Ndia sama leo laso, fo ana nama ndule basa hataholi ao-inan, losa tao nisa hataholi.

9-10 No bafak esa, hataholi koa-kio ma kokolak manggalauk. Ndia ta nandaa! Ita pake bafak fo koa-kio Amak Manetualain. Boe ma no bafak ndia boe oo, ita kokolak manggalauk neu hataholi, fo Manetualain nakadadadik kana tungga Ndia mata-aon so. Talo bee de bisa leo ndiak?^a

11 Conto leo, oe mamis ma oe masik ta bisa nasambulak sama-sama neme oe matak esa mai. 12 Conto fe'ek bali: ta bisa nda'edook naboa poteka, hetu? Ma ta bisa mbelak nambule anggol, hetu? Ai la laboa tungga sila numban.^b Sama leo ita ta bisa ndui oe mamis neme kolam oe masik mai.

13 Hataholi kandoluk ma bubuluk dede'ak kala tungga Manetualain mata susulin, na, boso soso'uk aok, te malelan ndia neme Manetualain mai. De elan fo ana natudu malelan ndia, no kada ndia dala soda ndoon. 14-15 Boso koao mae, o hataholi ndolu, mete ma o dale hedi do, mambue tao matuda hataholi fe'ek. Ndia sama leo o ia masapepekok. Te soda leo ndiak, ta nade “ndolu” so, ma ta konda neme Manetualain mai. Ndia, dae-bafok hada-tataon nala, nandaa neu hataholi la fo ta fee sila sodan nala leu Manetualain. Hada-tataok ndia, na tungga nitu la dalan. 16 Te mete ma hambu dale hedi, ma nambue tao natuda hataholi, na, neu ko hambu naodek ma hataholi la tao manggalauk mata-matak kala.

17 Tehuu ndolu maneme Manetualain mai, leo iak: makasososan ana tao nala ita sodan malalaok. Boe ma ana tao nala ita tasoda to dale makasufuk, nahiik nana senggik, nggale loak ma ndoo-ndoo. Ndia buna-boan boe oo tao nala ita dalen malole, tahiik tulu-fali hataholi, ta nabenu seselik ma ndoos no hataholi fe'ek kala. 18 Ma hataholi mana matudu dala mole, sama leo hataholi mana sele bini, fo doo-doo te neu ko ana hambu falik buna-boan malole.