Ei hataholi kamasu'ik kala ia, kada tao malole neu ei ao hehelim mala, ma kada masoda no namahokok. Hatematak ia, ei leo sapi ma'ao fo nahehele tatin so. Ei huku ma tao misa hataholi malole la, fo tala bisa lasala'e lala aon nala lai ei matam.

Hataholi kamasu'ik kala ei! Ei mulai mamatani makaleleu leo! Dei fo doidoso mata-matak kala sa'e la'e ei. Ei hata-hetom mala mulai lakalulutuk heni sala so. Ma ei balo'a neulaum mala, ana-dae la'a heni sala. Ei lilo mbila-lilo fulam mala, beli taak so. Ma dei fo lilo mbila-lilo fulak kala sila la'a lasafali ei, sama leo ha'i na'a heni ai tuuk. Talo bee de dae-bafok sangga basan so, tehuu ei bei masambute makaduduluk hata-heto la sila? Dei fo ei hata-heto hehelim dadik buti lae, ei ta bubuluk bee ndia mabeli nai Manetualain matan!^b

7 Tolanoo nggala ei! Ei musi makatataka mahani Lamatuak fafali main. Mete kada hataholi mana tao ue daek. Ana nakatataka nahani daen buna-boan. Uda sososak mai, boe ma ana sele-nggali. De nahani uda bali fo seselen nala moli no malole. Doo-doo boe ma labuna-laboa. Nandaa no fain, boe ma hataholi ndia neu ketu-kolu seselek kala buna-boan nala. 8 Ei boe oo musi makatataka leo ndiak. Tao matetea namahehelek, huu ta dook bali, te Lamatuak mai so!

9 Tolanoo nggala ei! Boso makanunumbuk esa no esa. Mete ma kada makanunumbuk makandoo, na, dei fo Manetualain huku o! Mete leo, huu Amak Mana Maketu Dede'ak manai lain, nambadeik nai ei matam so.

10 Tolanoo nggala ei! Tungga conto neme Manetualain mana kokolan nala mai. Mae ala hambu toto'ak mata-matak kala, tehuu ala lakatataka lakandoo. 11 Mete ma hambu hataholi nakatataka nai toto'ak, na, ita so'uk hataholi ndia naden. Conto leo ba'i Ayub. Ana hambu toto'ak mata-matak kala, tehuu nakatataka nalan. Boe ma Manetualain tuda kasian neu ndia, de Ana heti basan dadik malole neu Ayub. Manetualain tao leo ndiak, huu Ndia dalen malole, ma henuk no susuek.^c

12 Tolanoo nggala ei! Penting ndia, na boso so'uk sosook. Mete ma ei sangga mae “hei”, na, kada mataa mae “hei”. Ma mete ma ei sangga mae “taa”, na, kada mataa mae “taa”. Leo ndiak, na dai ndia so! Boso mala lena-lenak no so'uk sosook fo seseik hataholi mana matek nai dae-bafok naden. Nakalenak bali sosook “pake Manetualain naden” fo mana masodak nai lalai. Sosook mata-matak sila, sosoan taa. Te mete ma leo ndiak, na, simbo mala o huhukum, huu o sosoom sila.^d

13 Mete ma esa neme ei mai, hambu toto'ak, na, malolenak ana hule-haladoi. Ma mete ma esa neme ei mai namahoko, na, malolenak ana soda koa-kio neu Lamatuak. 14 Mete ma esa neme ei mai namahedi, na, malolenak moke mala lasi salanik kala fo ala tao mina neu hataholi kamahedik ndia, ma hule-haladoi pake Lamatuak naden, suek Lamatuak tao nahain.^e 15 Ma mete ma ei hule-haladoi fee hataholi kamahedik ma mamahele tebe-tebe neu Lamatuak, na, dei fo Lamatuak tao nahai hataholi ndia. Ma mete ma hataholi ndia tao salak so, na, dei fo Lamatuak koka heni ndia salan nala. 16 Mete ma hambu luma leme ei mai tao salak, na, ei musi manaku esa no esa salan nala. No leo ndiak, na ei basa nggei hule-haladoi esa fee esa, fo ei dadik malole.

Hataholi fo dalen malalaok, na ndia huhule-haladoin henuk no koasa, de bisa neni buna-boa malole. 17 Ha'i conto neme ba'i Elia mai. Ndia ndia, hataholi basa faik leo ita boe. Tehuu neu faik fo ana hule-haladoi noke fo boso uda bali, boe ma uda ta mai tutik losa teuk telu seselik.^f 18 Basa boe ma ana hule-haladoi noke fo uda mai, de uda mai tutik. Na'u la momodo, ma osi la labuna-laboa lasafali.^g

19 Tolanoo nggala ei! Mete ma hambu luma leme ei mai, mulai tao salak fo la'o ela hata fo ndoos, na, malolenak esa tulu-fali nalan, fo ana tungga falik Lamatuak dala ndoon. 20 Masanenedak neulalau! Mete ma ei fali mala hataholi mana tao salak, fo ana fali neni Lamatuak neu, ma ta tao salak bali, na, ei masala'e mala hataholi ndia so, suek ana nasoda nakandoo no Manetualain. No leo ndiak, na Manetualain koka heni ndia sala makadoton nala so.^h

Leo ndiak leo!