Boso mete matak mae, hataholi ina-huuk do hataholi kadi'ik
2
Tolanoo nggala ei! Ei mae, ei mamahele neu ita Lamatuan Yesus Karistus, fo ana seli ndia. Te talo bee de ei hii kada mete matak? Boso tao leo ndiak. 2 Leo hambu hataholi dua leni ei uma huhule-haladoim leu. Esa pake balo'a manggadilak, ma ndeli lilo mbilas henu lima ku'un nala. Ma esak pake badu manggenggeok. 3 Boe ma ei mambue soluk mala hataholi mana pake badu manggadilak ndia, fo feen mamana nanggatutuu malole nai mata. Tehuu mana pake badu manggenggeok ndia, na ei madenun mae “Mambadeik muu dea ele! Mete ma taa, na, manggatuuk muu dae!” 4 No kada ei mete mata leo ndiak, na ei sama leo mana maketu dede'ak fo benu seselik. Dudu'a manggalauk nauli ei leo ndiak so.5 Tolanoo susue nggala ei! Manetualain hele nala hataholi kasian nala lai dae-bafok ia, fo lamahele tea-tea neu Ndia, sama leo su'i nai sila dalen nala. Ma ndia boe oo hele nala sala, fo ala hambu baba'ek nai Manetualain palendan boe, fo Ana helu memak feen neu hataholi mana sue Ndia so. 6 Tehuu no kada ei mete matak leo ndiak, na ei makadadaek hataholi kasian nala so. Naa te sila ta tao manggalauk hata-hata neu ei. Ei lilii henin, do? Hataholi kamasu'ik kala sila fifiti-boboke ei. Ma sila ndia mana sangga dede'ak, fo hela loloso ei mini mamana naketu dede'ak miu. Ala hambu makeen, boe ma ei hambu kada seseen. 7 Ei ndia, Lamatuak Yesus hataholin nala. Tehuu hataholi kamasu'ik kala sila lambue kokolak laboboo Lamatuak Yesus nade malolen! Hatina de ei mambue sangga matak neu sala?
8 Malolenak tao tungga Manetualain heti-heun esa fo neulaun lena nae, “O musi sue hataholi fe'ek kala, sama leo o sue o ao hehelim.” Heti-heuk ndia nana sulak nai Manetualain Susula Malalaon.a 9 Tehuu mete ma ei kada mete matak ma ha'i dalek neu hataholi kamasu'ik kala, na, ei la'o lena Manetualain heti-heun ndia so. Tungga Manetualain heti-heun, na ei sala ndia so. 10 Hataholi fo mana tao tungga Manetualain Heti-heun no matetuk, tehuu ana la'o lena kada heti-heuk esa boe oo, ndia sama leo ana la'o lena basa heti-heuk kala sila so. 11 Manetualain fee heti-heuk so nae, “Boso hohongge.” Ndia boe oo fee heti-heu fe'ek nae, “Boso makanisa hataholi.” De mete ma ei ta hohongge, tehuu ei tao misa hataholi, na, ndia sama leo ei la'o lena basa Manetualain Heti-heun so.b
12 De mete ma ei sangga kokolak do, sangga tao dede'ak esa, na, ei musi masaneda leo iak: dei fo Manetualain naketun mete ma ita tao tungga Ndia heti-heun fo sue hataholi la do, taa. Huu heti-heuk ndia bisa nakambo'ik ita neme Manetualain huhukun mai. 13 Manetualain dalen ta kasian neu see fo dalen ta kasian neu hataholi fe'ek kala. Tehuu mete ma ei dalem kasian neu hataholi fe'ek kala, na, Manetualain dalen kasian neu ei boe. De ei ta paluu bii simbok mala Manetualain huhukun, huu Ana hingga memak basa sila so.
Mete ma ita tamahele tebe-tebe Manetualain, na, ita musi tao tungga Ndia Dede'a-kokolan
14 Tolanoo nggala ei! Mete ma hambu hataholi nae ndia namahele neu Manetualain, tehuu ta tao hata malalaok esa boe fo natudu ndia namahehelen ndia, na, ndia sosoan taa. Namahehele mata leo ndiak, ta bisa nasala'e nala ndia. 15 Leo hambu tolanook esa, ana paluu tebe-tebe, te ta naena balo'as do, ta hambu nana'a basa faik. 16 Mete ma kada ei mafadan mae, “La'ok matalolole bou! Ela Manetualain fee o baba'e-babatik! Boso ani nala o teim baa! Boso mate mua ndoes baa!” Soa hata no kokola leo ndiak, mete ma ei ta tao hata-hata nana nitak fo tulu-fali ndia?
17 De ta dai no kada o mae o mamahele, hetu! No kada namahele, tehuu ta tao tungga namahehelek ndia, na, ndia nade, ‘namahehelek’ ta ndia. Huu leo ndiak ndia, sama leo namahehelek maten so, de sosoan taa.
18 Hambu hataholi so'u dede'ak nae, “Hataholi bisa kada namahele Manetualain, ma ta tao dede'a malole. Hataholi fe'ek kala bisa kada tao dede'a malole, ma ta tao lenik Manetualain naden.” Tehuu leo iak: buti neme o namahehelem mai, ndia o tao dede'a malole. De mete ma o ta tao dede'a malole, na, au ta bisa ita buti neme o namahehelem mai. Au bisa atudu au namaheheleng nenik au tao dede'a malole la. 19-20 O tungga nanonolik fo nae, “Manetualain ndia, na kada mesak kana. Ta hambu seluk so.” Malole boe! Tehuu nitu la lalelak Lamatuak lena o bali, losak ala bii ma dele benggebe. De o boso dudu'a mae, “No kada malelak pake langga utek, na, dai ndia so.” Taa!
Nggoak ndia bou! Manggaledok so, namahehelek fo buna-boan ta hata esa boe, na ndia sosoan ta faa boe.
21 Ha'i conto neme ita ba'in Abraham sodan mai. Ana tao tungga hata fo Manetualain palendan, de neni anan Isak fo taon neu mei tunu-hotuk lain. Huu ndia de Manetualain nae, “Abraham tao ndaan so.”c 22 Abraham namahele Manetualain, losa ana simbok fo tao tungga palendan ndia. Ndia dadik buti nae, Abraham namahele no dale katematuan neu Manetualain. 23 De basa ia la dadi sama leo nana sulak nai Susula Malalaok nae, “Abraham namahele neu Manetualain, boe ma Manetualain kee-dede nalan dadik hataholi dale ndoos.” Ma nana sulak nae, “Abraham ndia, na Manetualain nonoon.”d
24 Manggaledok so, hetu!? Ita bubuluk tae, Manetualain simbok hataholi mete ma ndia namahele neu Manetualain ma ndia nahiik tao dede'a malole la boe. Kada namahehelek mesan, ndia ta dai.
25 Conto fe'ek bali neme ina Rahab mai. Ndia kalabik neme lele uluk mai. Neu faik fo hataholi kota Yeriko la sangga tao lisa hataholi Israel asa mana mete-makun nala, Rahab neu nafuni sala. Ma ana nadenu sala lalai tungga dala fe'ek, suek hataholi la ta humu lala sala. Boe ma Manetualain kee-dede nalan dadik ina dale ndoos, huu ndia tatao malolen.e
26 Namahehelek fo buna-boan taa, sama leo ao-inak fo ani hahaen taa, fo ndia, mamate. Leo ndiak boe, mete ma hataholi kokolak nae, ndia namahele Manetualain, tehuu ta tao dede'a malole, na, ndia kokolak lou-latak ndia! Ndia namahehele kasodak ta ndia.