2 Ju Daniel tulis bilang, “Waktu Tuhan kasi tau Dia pung pasán bagitu, beta hati barát tiga minggu anteru. 3 Beta sonde makan daging, ko, minum anggor, ko, makan orang kaya dong pung makanan sadiki ju. Deng beta sonde goso minya wangi di beta pung kulit ko rambu ju.

4 Tanggal 23 April,^a beta ada badiri di kali Tigris pung pinggir. 5 Ais beta lia, ju ada satu laki-laki yang pake kaen lenan, yang dia pung ika pinggang dari mas tulen.^b 6 Dia pung badan sama ke batu mangkilat. Dia pung muka basinar sama ke kilat. Dia pung mata manyala sama ke obor. Dia pung kaki deng tangan basinar sama ke tambaga yang orang su goso bekin mangkilat. Dia pung kata-kata dong babunyi sama ke orang banya dong batarea.

7 Padahal cuma beta sandiri sa, andia Daniel, yang dapa lia ini hal dong. Orang dong yang ada sama-sama deng beta sonde lia bagitu. Ma dong samua gamatar, ais dong lari sambunyi. 8 Jadi tenga beta sandiri sa yang dapa lia itu hal yang hebat, yang tingka ke dalam mimpi. Beta badan noe. Beta pung muka pucat. Beta sonde kuat sadiki ju. 9 Ais beta dengar itu orang pung kata-kata. Waktu beta dengar dia pung suara, ju beta samaput, sampe jato matono di tana.

10 Ais beta rasa ada orang pung tangan yang sonto ame sang beta, ju angka kasi nae sang beta ko tenga beta pung tangan deng lutut dong yang sonto tana. Ma beta gamatar tarús.

11 Ais, itu orang kasi tau sang beta bilang, ‘We, Daniel! Tuhan talalu sayang sang lu! Pasang talinga bae-bae, ko dengar deng pikir ame beta pung omong. Bangun badiri su, te Tuhan yang utus sang beta ko kasi tau ini pasán sang lu.’

Dia suru bagitu, ju beta bangun badiri. Ma beta gamatar tarús.

12 Ais dia kasi tau sang beta bilang, ‘Lu jang taku. Te dari hari partama yang lu mulai sambayang ko minta Tuhan buka kasi taráng Dia pung pasán, ais lu randá hati di Tuhan pung muka bagitu, ju Tuhan dengar lu pung sambayang. Andia ko sakarang Dia utus sang beta ko datang sini. Itu, tagal lu pung minta tu. 13 Ma roh jahat yang pegang parenta di Persia malawan sang beta sampe 21 hari. Ais ju, Mikael datang tolong sang beta. Dia tu, Tuhan pung ana bua di sorga pung mandor. Ju beta kasi tenga sang dia ko baparáng lawan sang itu roh jahat di Persia.^c 14 Ais sakarang beta su datang ko tolong sang lu, ko biar lu bisa mangarti apa yang nanti jadi di lu pung bangsa dong di hari kiamat. Te ada mimpi laen soꞌal itu hari dong.’

15 Waktu dia masi baꞌomong deng beta, beta ada lia pi tana, deng sonde bisa omong sadiki ju.

16 Ais ju ada satu orang yang model sama ke manusia, datang sonto ame beta pung bibir. Sonto abis bagitu, ju beta bisa buka mulu ko baꞌomong lai! Ais beta kasi tau sang itu orang yang ada badiri di beta pung muka bilang, ‘Bagini, bos! Beta pung hati rasa tar enak, tagal samua yang beta su lia ni. Beta lia, ma beta rasa noe batúl. 17 Beta ni, bos pung orang karjá. Ma beta sonde pantas baꞌomong deng bos. Beta gamatar dingin. Beta badan noe, tingka ke sonde bisa hela napas lai.’

18 Ais, itu orang yang model sama ke manusia, sonto ulang lai sang beta. Sonto abis bagitu, ju beta rasa kuat kambali. 19 Ais dia omong bilang, ‘Tuhan talalu sayang sang lu! Jadi sonde usa taku. Lu su aman! Kasi kuat lu pung hati! Jang ondor!’

Omong abis bagitu, ju beta rasa kuat kambali. Ais beta omong bilang, ‘Bapa tolong kasi tau samua-samua sang beta sakarang. Te bapa su bekin beta rasa kuat.’

20 Ais dia kasi tau bilang, ‘Beta mau ko lu mangarti bae-bae akurang ko beta datang pi sang lu sakarang. Bagini: sonde lama lai, te beta kambali baparáng lawan sang itu roh jahat yang pegang parenta di Persia. Kalo beta su abis paráng di sana, ju roh jahat yang pegang parenta di Yunani mau muncul datang. 21 Biar bagitu, ma beta masi mau kasi tau sang lu apa yang su tatulis di buku yang mua apa yang batúl. (Naa, cuma Mikael sandiri sa yang tolong beta baparáng lawan sang itu roh jahat yang pegang parenta dong. Dia tu, ana bua dari sorga pung mandor yang jaga sang bosong orang Israꞌel.)