Daniel pung mimpi soꞌal domba laki satu deng kambing satu
8
Satu kali lai, Daniel tulis dia pung pangalaman bilang, “Beta mau tulis beta pung mimpi satu lai. Ini jadi waktu raja Belsasar balóm pegang parenta tiga taon di Babel. Beta ada lia banya hal, tingka ke beta mimpi. Ma ini sonde sama deng itu mimpi partama yang beta su parná tulis dolu. 2 Dalam mimpi kadua ni, beta lia beta pung diri di benteng di kota Susa di propinsi Elam. Beta ada badiri di kali Ulai pung pinggir. 3 Ju beta lia ada satu domba laki badiri di kali pung pinggir. Dia ada pung dua tandok yang panjang, ma satu lebe panjang. Padahal yang lebe panjang tu, muncul datang di balakang hari. 4 Ais beta lia itu domba pake dia pung tandok dong ko pi tabrak ame samua barang di sablá barat. Ais itu, dia bekin ulang pi sablá utara. Abis, baru dia bekin ulang pi sablá salatan. Sonde ada yang bisa malawan sang dia. Sonde ada yang bisa kasi salamat dia pung korban dong, te itu domba talalu kuat na! Dia bekin ancor iko dia pung mau. Tarús dia jadi batamba-batamba.5 Ais waktu beta masi lia-lia, ju ada kambing laki satu muncul datang dari sablá barat. Ma dia cuma ada satu tandok di dia pung mata pung teng-tenga. Deng itu tandok tu, talalu kantara. Ju itu kambing lari datang dari dunya pung sablá, ma dia pung kaki sonde sonto ame di tana. 6 Ais itu kambing lari datang mara-mara ko mau batabrak deng itu domba yang ada pung dua tandok, yang ada badiri di kali pung pinggir tu. 7 Ju itu kambing datang pi itu domba. Waktu dia lari, dia pung mara batamba-tamba tarús. Ais dia tabrak kuat-kuat itu domba, ju bekin pata itu domba pung tandok dua-dua. Itu domba sonde ontong sang dia. Ais itu kambing banting ame itu domba pi tana, ju inja-inja sang dia. Sonde ada yang bisa kasi salamat itu domba dari kambing pung kuasa. 8 Ais ju itu kambing batamba kuat deng batamba hebat. Waktu dia su paling kuat, ju ada yang kasi pata dia pung tandok yang hebat tu. Ma di itu tandok pung tampa tu, ada ampa tandok baru yang muncul datang. Itu ampa tandok dong kasi tunju ampa mata angin di langit.
9 Ma dari satu tandok batumbu satu tandok lai yang kici. Itu tandok kici tu pung kuasa batamba tarús, sampe itu kuasa sampe di sablá salatan, sablá timur, deng sampe di itu tana yang paling bagus tu, andia tana Israꞌel. 10 Itu tandok baru tu, batumbu tinggi sampe di langit. Ju dia bakalai deng tantara di langit, sampe lempar kasi tabanting tantara saparu deng bintang saparu pi bumi. Ju dia inja-inja sang dong.a 11 Itu tandok pung kuasa batamba tarús sampe dia barani malawan sang panglima di langit. Di Tuhan Allah pung Ruma Sambayang Pusat yang barisi, itu tandok kasi barenti korban bakar yang orang dong bawa tiap-tiap hari, ju bongkar bekin rusak di situ. 12 Itu tandok pung tantara dong bekin jahat macam-macam, ju suru kapala agama dong ko barenti bekin korban bakar yang dong su biasa bekin. Ais dong larang karás samua agama yang batúl. Samua-samua yang itu tandok mau bekin iko dia pung suka, na, jadi.b
13 Ais itu ju, beta dengar Tuhan pung ana bua dua dari sorga ada batanya satu deng satu. Satu tanya bilang, ‘Botong musti tunggu barapa lama, baru ini mimpi pung isi ni, bisa jadi? Sampe kapan dong mau barenti bekin itu korban bakar yang jalan tiap hari dong? Sampe kapan orang dong mau malawan sang Tuhan? Dong mau bekin rusak itu Ruma Sambayang Pusat yang barisi sampe barapa lama? Sampe kapan tantara di sorga dong kaná inja-inja?’
14 Ju ana bua yang satu lai manyao bilang, ‘Dia pung biasa, kapala agama dong bekin korban tiap kali matahari nae deng matahari tanggalám. Nanti dong kasi barenti itu korban dong sampe 2.300 kali, andia salama 1.150 hari. Ais baru orang dong bisa bekin itu Ruma Sambayang Pusat barisi kambali sang Tuhan Allah.’”
Gabriel buka ame itu mimpi pung arti
15 Ais Daniel sambung dia pung carita soꞌal dia pung mimpi bilang, “Waktu beta, andia Daniel, ada coba-coba ko mau mangarti samua-samua yang beta su lia dalam itu mimpi, ju ada yang badiri di beta pung muka. Beta sangka dia tu, manusia. 16 Tarús beta dengar manusia pung suara ada pange-pange dari kali Ulai pung pinggir bilang, ‘Gabriel, tolong tarángkan kasi tau itu mimpi pung arti, ko biar ini orang bisa mangarti bae-bae.’c
17 Ais Gabriel datang deka-deka deng itu tampa yang beta badiri tu. Ju beta rasa taku deng jato di tana di dia pung muka. Ma dia omong bae-bae sang beta bilang, ‘Lu ni, manusia. Lu musti mangarti bilang, ini hal dong yang lu su lia dalam itu mimpi tu, nanti jadi waktu hari kiamat.’
18 Waktu dia masi baꞌomong deng beta, na, beta tingka ke samaput deng jato matono, sama ke sonde sadar. Ma dia sonto ame deng kasi bangun sang beta, ju kasi beta badiri.
19 Ais dia omong bilang, ‘Beta mau kasi tau sang lu apa yang nanti jadi, ko biar lu mangarti. Tuhan Allah su tau dia pung waktu ko dunya kiamat. Ma di itu jaman, Dia mara batúl, te Dia sonde mau tarima manusia pung jahat. 20 Itu domba laki yang ada pung dua tandok yang lu lia tu, andia raja tana Media deng raja tana Persia dong. 21 Itu kambing laki yang babulu tu, andia raja tana Yunani. Itu tandok yang bésar tu, andia dong pung raja partama. 22 Itu ampa tandok yang muncul datang waktu itu tandok partama pata tu, andia ampa raja yang ganti itu raja partama. Ma sonde ada raja dari dong yang sama hebat deng itu raja partama tu.
23 Waktu itu ampa raja dong pung parenta su mau deka abis, ju dong pung jahat deng sala dong su mau kalewat batas, na, ada satu raja baru muncul datang. Dia tu, karás mati pung, deng talalu pintar putar-balek. 24 Dia batamba kuat tarús, ma bukan tagal dari dia pung kuasa sandiri. Nanti dia bekin rusak bam-banya, sampe orang dong taheran-heran. Dia mau bekin karmana iko dia pung mau, na, jadi. Dia kasi ancor buang pamimpin yang kuat dong, ju bekin rusak buang Tuhan pung orang barisi dong. 25 Dia tipu ame orang dong, sampe dia jadi sombong. Waktu orang dong kira samua aman, na, takuju sa, dia kasi ancor buang dong bam-banya. Dia baparáng malawan sang Tuhan, andia Raja di atas samua raja. Biar bagitu, ma nanti ada yang kasi ancor sang dia, ma sonde pake manusia pung kuasa.
26 Parcaya sang beta! Te apa yang beta lia deng omong tu, batúl, soꞌal kasi barenti korban sampe 2.300 kali tiap matahari nae deng matahari tanggalám. Pasti jadi bagitu! Ma dia pung waktu masi jao-jao, jadi kalo su tulis ini mimpi, na, tutu ame sang dia pake segel, ko biar orang dong sonde usa tau memang.’
27 Waktu beta, andia Daniel, ada lia ini hal dong samua, na, beta pung kuat ilang buang, ju beta saki-saki sampe barapa hari. Abis, beta bangun, ju kasi jalan raja pung tugas. Ma beta pung hati rasa tar enak, ko beta jadi pikiran tagal itu mimpi. Te beta sonde mangarti batúl.”