Daniel pung mimpi soꞌal 4 binatang buas dong
7
Waktu raja Belsasar balóm pegang parenta satu taon di Babel,a ju Daniel dapa mimpi. Waktu dia ada tidor di atas koi, tingka ke dia lia gambar macam-macam. Ais itu ju, dia tulis samua yang dia su lia dong. 2 Dia tulis bilang,“Beta ni, Daniel. Malam-malam beta lia banya hal, tingka ke dalam mimpi. Ada angin ribut mangamok di laut. Itu angin dong fuu bekin kaco dari mana-mana. 3 Ais, ada ampa binatang buas yang bésar kaluar datang dari laut. Itu binatang dong laen-laen.b
4 Binatang yang partama kantara ke singa, ma dia ada pung sayap sama ke burung élang. Ais waktu beta ada nonton, takuju sa dia pung sayap kaná cabu buang. Ju ada yang hela kasi badiri sang dia di atas dua kaki, sama ke manusia badiri ju. Tarús dia bisa pikir sama ke manusia pikir ju.c
5 Ais beta lia binatang buas yang kadua, tingka ke baruang. Dia ada jongko, deng dia gepe tiga tulang rusuk di dia pung gigi. Ju ada yang suru sang dia bilang, ‘Badiri su! Makan ame daging bam-banya!’
6 Ais waktu beta ada lia-lia, binatang buas yang barikut muncul, tingka ke harimau. Ma dia ada ampa sayap, sama ke burung pung sayap kaluar dari dia pung balakang. Ais dia ada ampa kapala ju. Deng ada yang kasi dia kuasa bésar ko parenta bam-banya.
7 Itu malam ju, beta lia dalam mimpi binatang buas yang nomer ampa. Dia talalu kuat deng bekin taku sampe bulu badan badiri. Dia pung gigi bésar dari bési. Dia pake itu gigi ko makan kasi ancor dia pung mangsa. Kalo ada yang dia sonde makan buang, na, dia pake dia pung kaki ko inja-inja kasi ancor buang sang dong. Ini binatang ni, laen dari yang laen. Te ada sapulu tandok di dia pung kapala.d
8 Waktu beta ada pikir-pikir ko cari tau itu tandok dong pung arti, takuju sa ada satu tandok yang kici muncul datang. Ma itu sapulu tandok laen talalu basesak. Andia ko tiga tandok kaná cabu buang dari akar, ko biar itu tandok kici dapa tampa. Ini tandok kici ni, ada mata ke manusia pung mata, deng ada mulu babengko yang omong sombong.e
9 Waktu beta lia-lia,
ada yang ator ko biar korsi hakim dong muncul datang di tampa yang pas.f
Ais Yang Su Ada Memang Dari Dolu-dolu,
dudu di Dia pung korsi putus parkara.
Dia pung pakean puti mangkilat sama ke salju.
Dia pung rambu puti barisi, sama ke domba pung bulu puti.
Dia pung korsi hakim tadudu di atas kareta.
Itu korsi manyala ke lida api,
deng dia pung roda dong manyala ke tabakar ju.
10 Dari Dia pung tampa dudu pung muka tu,
ada lida api dong kaluar datang,
sama ke arus kali yang jalan tarús.g
Baribu-ribu orang layani sang Dia,
sampe sonde bisa itong ame sang dong.
Bajuta-juta orang badiri ko kasi jalan Dia pung karjá.
Ais itu, tukang putus parkara dong dudu ko mau timbang parkara,
ju dong buka buku-buku dong.
11 Tagal itu tandok kici pung omong sombong tu, andia ko beta lia-lia ko mau lia apa yang jadi sang dia. Waktu beta ada lia ju, ada yang datang bunu bekin mati itu binatang buas nomer ampa, ais lempar buang pi dalam api ko biar api makan buang dia pung mayat. 12 (Ada yang cabu ame itu tiga binatang buas yang laen dong pung kuasa deng hak parenta, ma kasi tenga ko dong bole idop lebe lama sadiki.)
13 Ais, waktu beta masi ada mimpi malam-malam,h
Beta lia satu orang macam ke manusia tulen
turun datang deng awan dari langit,
Dia datang deka-deka ko mangada sang
Yang Su Ada Memang Dari Dolu-dolu.
14 Ais Yang Su Ada Memang Dari Dolu-dolu
sarakan hak parenta kasi sang Dia,
ju ator ko biar orang kasi tunju hormat sang Dia,
deng angka sang Dia ko jadi raja,
sampe-sampe orang dari samua suku, samua bangsa, samua negara, deng samua bahasa,
dengar-dengar sang Dia,
ju kasi tunju hormat deng sémba sang Dia.i
Dia pung kuasa tu,
sonde tau barenti.
Dia pung hak parenta tu,
sonde tau putus-putus.
Deng sonde ada yang bisa kasi kala sang Dia.”
Daniel dapa tau itu mimpi pung arti
15 Ais Daniel tulis sambung bilang, “Waktu beta lia itu hal dong di beta pung kapala otak, na, beta taku mati pung! Beta pung hati rasa taganggu deng pikiran sonde tanáng. 16 Andia ko beta pi deka-deka deng satu orang yang badiri di korsi hakim pung sablá, ko tanya sang dia bilang, ‘Ini hal yang beta lia dong pung arti apa?’
Ais dia manyao ko biar beta bisa mangarti ini hal dong pung arti bilang, 17 ‘Itu ampa binatang buas dong, andia ampa raja yang nanti muncul datang, yang pegang parenta di ini dunya. 18 Ma Tuhan Allah yang Paling Tinggi nanti sarakan hak parenta kasi Dia pung orang barisi dong. Ju dong pegang parenta sonde pake barenti.’j
19 Ais beta mau cari tau soꞌal binatang buas nomer ampa tu. Te dia laen dari yang laen. Dia bekin taku sampe bulu badan badiri, tagal dia pake dia pung gigi dari bési, ko gigi kasi ancor apa sa, iko dia pung mau. Ju dia pake dia pung cakar dari tambaga, ko inja-inja kasi ancor buang apa sa yang masi idop. 20 Beta mau mangarti ju soꞌal itu sapulu tandok yang ada di dia pung kapala, deng tiga tandok yang kaná cabu buang dari akar, ko biar itu tandok kici dapa tampa. Andia itu tandok kici yang ada mata ke manusia pung mata, deng ada mulu babengko yang omong sombong tu. Te beta kira itu tandok lebe pantíng dari tandok yang laen dong.
21 Ais waktu beta ada lia-lia, te itu tandok kici baparáng malawan Tuhan pung orang barisi dong. Ju dia mulai kasi kala sang dong.k 22 Dia malawan tarús bagitu, sampe Yang Su Ada Memang Dari Dolu-dolu, andia Yang Paling Tinggi, datang. Ju Dia putus bilang, ‘Orang dong yang idop barisi kasi Beta, dong tu yang batúl!’ Te dia pung waktu su sampe ko Dia pung orang barisi dong yang pegang parenta.”l
23 Ais itu orang yang tarangkan sang beta, kasi tau tamba bilang,
‘Itu binatang buas nomer ampa tu,
sama deng kuasa nomer ampa yang datang parenta di ini dunya.
Dia laen dari yang laen.
Te dia pegang parenta di dunya anteru,
sama ke dia inja-inja kasi ancor buang samua,
ju kodo ame samua.
24 Itu sapulu tandok dong tu,
sama ke sapulu negara yang muncul datang dari itu kuasa yang satu tu.
Jadi ada sapulu raja yang pegang parenta.
Ais itu ju, ada satu lai yang muncul datang.
Dia laen dari yang laen.
Nanti dia kasi jato deng kasi kala tiga raja.m
25 Nanti dia omong malawan sang Tuhan Allah yang Paling Tinggi.
Nanti dia bekin sangsara sang Tuhan pung orang barisi dong.
Dia mau coba roba Tuhan pung Atoran
soꞌal kapan agama pung hari-hari bae dong,
deng kapan bekin korban persembahan dong.
Nanti dia dapa hak parenta
sang Tuhan pung orang barisi,
sampe tiga taon satenga.n
26 Ma nanti itu tukang putus parkara dong mau dudu ko timbang parkara. Ais dong putus ko cabu ame itu raja pung hak parenta, ju kasi ancor buang sang dia pung kuasa sampe salamanya. 27 Ais Tuhan Allah yang Paling Tinggi sarakan hak parenta sang Dia pung orang barisi dong. Dia ju kasi Dia pung raja dong hak ko parenta raja laen dong di ini dunya. Nanti dong pegang parenta sonde putus-putus. Samua suku deng bangsa dengar-dengar sang dong, deng kasi jalan Dia pung karjá.’o
28 Beta pung carita sampe di sini sa. Itu hal dong bekin beta, andia Daniel, talalu taku sampe bulu badan badiri, deng beta pung muka pucat. Biar bagitu, ma beta pikir ame itu hal dong tarús.”