(no title — continuation from 22:17)
23
Kalo lu dudu makan deng orang bésar, na,lia bae-bae dia taro apa di lu pung muka,
ko biar lu jang bodo-bodo.
2 Kalo lu biasa makan balalas, na, ati-ati!
Tahan diri ko makan sadiki sa,
te kalo lu makan balalas di orang bésar pung muka, na,
ada lebe bae lu horo buang lu pung leher sandiri sa.
3 Jang talalu makan orang bésar pung makanan mewa-mewa dong,
te jang sampe dia ada uji sang lu,
ais tipu ame sang lu.
4 Jang cape-cape karjá banting tulang ko mau jadi kaya!
Pikir panjang ko tahan diri sadiki.
5 Inga te, waktu lu pung mata manyala ko mau dapa orang kaya dong pung barang, na,
itu barang bisa ilang pi takuju ju.
Orang kaya pung barang dong bisa ilang,
sama ke satu burung élang buka sayap,
ko tarbáng ilang pi langit.
6 Kalo orang kake'ek ajak lu datang makan, na,
lebe bae sonde usa pi sa.
Jang mau makan orang sakikir dong pung makanan,
biar itu makanan talalu enak.
7 Te biar orang macam bagitu suru sang lu bilang, “Makan su! Minum bam-banya!”
Jang parcaya dia pung omong bagitu,
te dia ada maloi deng taliti,
ko itong ame lu pung makan-minum dong pung ongkos barapa.
Dia pung hati bae tu, munafik sa.
8 Lu pung pangalaman yang pait tu,
bekin lu mau munta kambali apa yang lu su makan.
Lu pung kata-kata yang manis dong, parcuma sa.
9 Jang coba-coba kasi tau apa-apa sang orang bodo,
te biar lu pung nasiat dong talalu bagus,
ma dia sonde toe ko anggap reme itu nasiat dong.
10 Jang kasi pinda tanda batas tana yang su lama.
Deng jang se'ok ame ana yatim-piatu dong pung tana,
waktu dong pung bapa su mati.
11 Jang lupa, te dong pung Bapa yang satu, andia Tuhan, masi ada.
Dia talalu kuat, deng mau tabús ame sang dong.
Nanti Dia yang bela sang dong deng lempar sala sang lu.
12 Kalo orang mau ajar sang lu jalan idop lurus, na,
pasang talinga ko dengar bae-bae sang dong.
Kalo orang mau kasi tau sang lu hal yang pantíng, na,
dengar bae-bae ko biar lu mangarti batúl.
13 Kalo lu parlú ajar ana-ana dong,
ko biar dong tau jalan idop lurus, na,
jang tahan-tahan.
Ada lebe bae dong rasa saki sadiki,
ko biar dong jang mati bodo-bodo.
14 Biar lu puku sadiki pake rotan,
ma lu su kasi salamat sang ana-ana dong,
ko biar dong jang tapisa buang dari Tuhan.
15 Beta kasi tau beta pung ana bilang, “Ana, é!
Inga te, kalo lu balajar pikir panjang, na,
itu bekin beta pung hati talalu sanáng.
16 Kalo beta dengar lu omong apa yang batúl dong, na,
beta pung hati babunga ju.”
17 Jang iri deng orang yang idop bekin sala,
ko mau bekin iko sang dong.
Ma pasang kaki ko idop dalam taku deng hormat sang TUHAN Allah tarús sa.
18 Te kalo lu idop bagitu, na,
pasti lu pung masa depan bae,
deng lu baharap apa, na, nanti jadi.
19 Ana, é! Dengar sang beta dolo!
Lu musti pikir panjang tarús.
Jaga lu pung hati ko iko jalan lurus tarús.
20 Jang talalu bakawan deng tukang minum mabo dong.
Jang talalu bacampor deng tukang balalas dong ju.
21 Inga te, tukang minum mabo deng tukang balalas dong pung ujung-ujung tu,
andia dong jadi miskin-malarat.
Kalo lu talalu bakawan deng dong, nanti lu jadi sama ke dong ju,
te dong pung rasa mangantok bekin dong pake pakean dodolek tarús sa.
22 Dengar bae-bae sang lu pung bapa barana.
Jang anggap reme lu pung mama waktu dia su tua ganggók.
23 Pasang kaki ko cari apa yang batúl,
sama ke barang mahal yang lu mau béli.
Deng kalo su dapa, na, jang lapás buang sang dia,
sama ke barang biasa-biasa yang lu mau jual.
Cari jalan ko balajar pikir panjang.
Cari orang yang bisa ajar lu jalan lurus.
Cari jalan ko mangarti banya hal iko Tuhan pung pikiran.
24 Kalo satu ana idop barisi,
dia pung bapa hati babunga ju.
Kalo satu ana tau pikir panjang,
dia pung orang tua hati sanáng ju.
25 Pasang kaki bagitu ko biar lu pung mama deng papa sanáng.
Cari jalan ko biar lu pung mama hati babunga ju.
26 Ana, é! Biar beta ajar sang lu ko lu bisa pikir bae-bae.
Pareksa bae-bae beta pung idop,
ko conto sang beta ju.
27 Inga te, parampuan nakal bisa bekin lu ilang.
Kalo bacampor deng parampuan yang maen serong tu, bahaya,
sama ke orang lempar buang sang lu pi dalam sumur.
28 Dia sambunyi ko mau tepa ame sang lu,
sama ke parampok dong.
Dia tunggu-tunggu ko mau kasi jato orang laen lai.
29 Sapa yang batarea bilang, “Adiiii”?
Sapa yang hati sadí?
Sapa yang bakanjar?
Sapa yang mangomel?
Sapa yang ada pung luka yang sonde maso di akal?
Sapa yang mata mera tarús?
30 Dong tu, andia orang yang mete tarús ko minum anggor.
Deng orang yang pi mana-mana ko mau cari minuman baru lai.
31 Ati-ati, te anggor yang mera,
ko, minuman yang manyala,
bisa hela ame sang lu.
Mula-mula talalu enak na.
32 Ma lama-lama dia gigi ame sang lu,
sama ke ular baracon.
33 Ati-ati, te nanti lu pung mata lia yang ane-ane.
Deng nanti lu omong macam-macam yang bekin bingung.
34 Kalo lu minum banya, nanti lu jalan miring-miring,
sama ke orang kapal yang kaná galombang,
ko, orang yang pegang tiang layar pung ujung waktu kapal bagoyang.
35 Nanti lu omong sambarang bilang,
“Orang dong karoyok sang beta, ma beta sonde rasa.
Dong korfei barmaen sang beta, ma beta sonde tau.
Capát su! Te beta mau bangun ko bisa minum tamba lai.”