(no title)
22
Ada lebe bae kotong jaga nama bae,daripada kotong cari kaya.
Inga te, kalo orang dong anggap lu orang hati bae, na,
dia pung harga lebe dari mas deng pérak.
2 Pikir bae-bae, te orang kaya dong, deng orang miskin dong tu, sama.
Te TUHAN Allah yang bekin ame sang dong.
3 Orang yang pikir panjang dong sambunyi kalo dong lia calaka.
Ma orang bodo dong maju tarús sa,
andia ko dong dapa susa.
4 Kalo kotong randá hati batúl, deng taku sang TUHAN, na,
kotong pung upa, andia nanti kotong dapa kaya,
orang dong hormat sang kotong,
deng kotong dapa umur panjang ju.
5 Orang idop babengko dong iko jalan yang ponu deng duri,
ais bisa kaná hiki kiri-kanan ju.
Ma orang yang jaga bae-bae ko dia idop lurus,
sili jao dari duri, deng sonde gampang kaná hiki.
6 Kalo ajar ana-ana dong ko dong tau jalan idop yang lurus, na,
nanti kalo dong bésar datang,
dong sonde serong dari itu jalan lurus ju.
7 Orang kaya parenta sang orang miskin dong.
Bagitu ju, orang yang pinjam doi jadi budak
sang orang yang kasi pinjam doi.
8 Orang yang tanam apa yang sonde adil,
nanti panen dia pung calaka.
Deng kalo orang puku ko kasi hukum orang tagal dia talalu mara, na,
itu hukuman pulang kosong sa.
9 Orang hati bae yang suka kasi orang laen dong,
nanti ontong ju.
Te dong kasi makan orang malarat dong.
10 Kalo usir buang tukang ba'olok,
nanti orang dong sonde bakanjar lai,
dong sonde baparkara tarús,
deng dong sonde bekin rusak orang pung nama bae lai.
11 Orang yang hati barisi,
yang omong manis-manis,
bisa sa bakawan deng raja.
12 Jang lupa, te TUHAN Allah maloi pi mana-mana.
Ais Dia jaga apa yang batúl, ko biar dia batúl tarús.
Ma Dia bongkar buang orang putar-balek pung omong.
13 Pamokol pung ba'i angka alasan macam-macam bilang,
“Beta sonde bisa kaluar ruma,
te jang sampe ada singa di luar!
Jang sampe beta kaná bunu di jalan!”
14 Parampuan nakal pung kata-kata tu,
sama deng satu lobang yang talalu dalam.
Ati-ati, te orang yang bekin jengkel sang TUHAN Allah bisa jato pi dalam
itu lobang yang talalu dalam,
dari parampuan nakal pung kata-kata dong.
15 Ana muda dong talalu bodo, sonde mau dengar, deng gampang kaná hiki.
Andia ko orang tua dong musti ajar sang dong,
ko usir buang dong pung bodo, deng kasi tunju jalan lurus sang dong.
16 Orang yang inja-inja orang malarat dong,
ko mau cari ontong sandiri, nanti jato sandiri.
Orang yang kasi hadia sang orang kaya,
deng maksud mau ontong sandiri, nanti rugi sandiri ju.
Orang pikir panjang dong pung kata-kata
17 Pasang talinga bae-bae ko dengar orang pikir panjang dong pung kata-kata.
Pikir bae-bae ko lu bisa mangarti deng bekin iko beta pung ajaran dong.
18 Kalo lu simpan ini kata-kata dong dalam lu pung hati,
nanti lu ontong,
deng bisa pake kasi tau orang laen dong kapan sa.
19 Deng bagitu, lu bisa taro parcaya sang TUHAN Allah.
Andia ko beta ada kasi tau sang lu ini hari ju.
Batúl, te beta pung mau ko lu taro parcaya sang Tuhan bagitu.
20 Beta su tulis ame 30 kata-kata kasi sang lu.
Ini kata-kata dong nasiat yang kasi tunju jalan sang lu,
hela bawa sang lu kambali pi jalan yang batúl,
21 tolong sang lu ko biar bisa mangarti apa yang batúl,
ko biar lu bisa kasi laporan yang batúl sang orang dong yang utus sang lu.
22 Jang rampas ame barang dari orang malarat dong,
cuma tagal dong sonde ada pung kuasa apa-apa.
Jang nae pengadilan ko inja-inja sang orang miskin dong,
te dong sonde bisa bayar apa-apa.
23 Inga te, TUHAN Allah yang bela sang dong,
deng rampas ame barang dari orang yang rampas ame dari orang miskin dong.
24 Jang bakawan deng orang yang gampang nae dara.
Jang deka-deka deng tukang mara dong.
25 Te jang sampe lu balajar dari dong,
ais lu jato tagal lu kaná hiki dari dong pung bekin-bekin.
26 Lu jang jadi jaminan kasi orang laen.
Lu jang bajanji bilang, “Kalo ini orang sonde bisa bayar dia pung utang, na,
biar beta yang bayar sa.” Pung bodo lai!
27 Inga te, kalo lu sonde bisa bayar putus itu orang laen pung utang, na,
nanti dong ada pung hak ko ame kasi abis lu pung barang dong,
sampe-sampe lu pung tampa tidor yang lu ada pake ju, dong angka ame!
28 Jang kasi pinda nene-moyang dong pung tanda batas tana.
29 Kalo lu dapa lia orang yang talalu pintar bekin dia pung karjá, na,
jang lupa, te itu orang tu,
nanti karjá kasi sang raja dong ju,
bukan kasi orang biasa sa.