(no title)
21
Kalo satu raja mau putus bekin karmana, na,jang lupa te TUHAN Allah yang ator sang dia.
Itu sama ke Tuhan bisa ator aer mangalir mau belok pi mana,
iko Tuhan pung suka.
2 Biar satu orang kira dia pung jalan idop su batúl,
ma TUHAN Allah timbang itu orang pung isi hati.
3 Waktu kotong bekin yang batúl deng bekin yang adil, na,
TUHAN Allah talalu sanáng.
Dia pung batúl, Tuhan lebe sanáng kotong bekin bagitu,
daripada kotong cuma bekin korban persembahan kasi sang Dia.
4 Orang jahat dong mau bekin apa sa, sala.
Te dong pung kapala bésar deng hati yang sombong,
bekin dong kira dong bisa bekin apa sa, iko dong pung suka.
5 Orang yang pikir panjang deng karjá rajin,
nanti dapa hasil bam-banya.
Ma orang yang karjá buru-buru deng sonde pikir lebe dolu,
nanti dia pung ujung-ujung, dia jadi miskin sa.
6 Kalo putar-balek orang ko lu jadi kaya, na, ati-ati!
Te itu sama ke kabut yang ilang capát,
sama ke orang cari mati sa.
7 Orang jahat pung tangan bési sandiri,
makan bale sang dong,
tagal dong tola buang apa yang adil.
8 Orang sala dong pung jalan idop tu, babengko.
Ma orang barisi pung jalan idop tu, lurus.
9 Ada lebe bae lu tenga sandiri di teras pung huk,
daripada lu coba idop dalam ruma,
sama-sama deng bini yang maen bakanjar tarús.
10 Orang jahat rindu mau bekin jahat.
Deng bagitu, baru dong rasa sanáng.
Dong sonde kasi tunju rasa kasian sadiki ju deng orang sablá ruma.
11 Kalo kasi hukum tukang ba'olok dong,
nanti orang yang sonde tau banya dong bisa balajar dari situ.
Ma kalo ajar sang orang yang pikir panjang,
nanti dia sandiri yang balajar, ais tamba mangarti ju.
12 Yang Barisi tu, andia Tuhan.
Dia ada lia samua yang jadi di orang jahat pung isi ruma.
Dia kasi rusak dong pung rancana jahat dong.
13 Kalo orang batarea minta tolong,
ais lu tutu lu pung talinga, na,
inga te, nanti kalo lu batarea minta tolong,
sonde ada yang mau toe sang lu.
14 Kalo orang ada mara sang lu, na,
kasi hadia sambunyi-sambunyi sang dong,
ma jang kasi tau orang dong.
Nanti dia pung mara jadi dingin.
Ada orang yang sogok doi sambunyi-sambunyi,
ko biar itu orang jang makan gigi.
15 Kalo tukang putus parkara putus yang adil, na,
orang yang idop barisi sanáng mati,
ma orang yang idop babengko jengkel mati.
16 Orang yang serong dari jalan yang batúl,
tagal dong sonde pikir bae-bae dolu,
nanti dong bagabung deng orang mati dong.
17 Orang yang idop ko cuma mau bekin diri sanáng sa,
nanti jadi miskin.
Orang yang suka minum mabo deng idop foya-foya,
sonde mungkin dong jadi kaya ju.
18 Sat-satu kali, orang jahat kaná hukum,
ko tabús orang idop lurus dong.
Satu-dua kali, ada orang yang kotong sonde bisa parcaya.
Dong musti sangsara ko kasi salamat sang orang yang idop bekin yang batúl.
19 Ada lebe bae tenga sandiri di hutan,
daripada idop satu ruma deng bini yang maen mangomel deng bakanjar tarús.
20 Orang yang pikir panjang dong ada pung ruma,
ko mau simpan dong pung harta yang bagus dong.
Ma orang yang pikir pende suka makan buang
samua-samua yang dong dapat.
21 Orang yang pasang kaki ko mau idop barisi iko Tuhan pung jalan,
deng mau kasi tunju hati bae sang orang laen,
nanti dia dapa umur panjang,
ais orang laen dong hormat deng kasi tunju hati bae sang dia ju.
22 Satu orang yang pikir panjang,
bisa tangkap ame satu kota yang ponu deng tantara,
biar itu tantara dong parcaya itu kota pung tembok mau pele ame sang dong.
23 Orang yang bisa tahan diri deng jaga dia pung mulu tu,
bisa sili dari banya susa deng sangsara.
24 Orang yang talalu sombong deng kurang ajar tu,
dia pung nama, andia ‘tukang ba'olok’.
Dong sonde tau hormat sang orang laen,
te dong kira dong tau samua-samua.
25 Pamokol dong pung mau sandiri yang bekin dong jato.
Te dong pung tangan sonde mau karjá sadiki ju.
26 Dari pagi sampe sore, orang kake'ek dong mau dapa tamba tarús.
Ma orang hati barisi dong suka kasi orang,
deng sonde pake tahan ju.
27 Dia pung batúl, andia Tuhan paling sonde suka
orang jahat dong pung persembahan kasi sang Dia.
Apalai dong pung persembahan yang dong kasi
deng maksud jahat.
28 Inga te, saksi putar-balek nanti tapisa buang.
Ma saksi yang pasang talinga ko dengar bae-bae,
nanti batahan sampe bisa kasi tau dia pung carita anteru.
29 Orang jahat dong, bekin muka tabal ko tutu dong pung jahat.
Ma orang yang idop barisi dong pikir bae-bae baru maju.
30 Inga te, sonde ada orang pung pintar,
sonde ada orang pung mangarti,
sonde ada orang pung nasiat,
yang bisa lawan ame sang TUHAN Allah.
31 Biar tantara dong siap-siap dong pung kuda,
ko mau pi baparáng,
ma kalo dong manáng,
itu tagal TUHAN, bukan tagal dong sandiri.