(no title)
20
Ati-ati, te minum anggor tu,nanti bekin lu jadi tukang ba'olok.
Minuman karás bekin orang bakalai ju.
Orang yang suka minum mabok dong,
pikir pende deng serong dari jalan lurus.
2 Raja pung mara tu, bahaya,
sama ke satu singa laki pung mangaum,
yang jadi tanda bahaya.
Te orang yang tusu-tusu sang dia,
nanti bisa mati, sama ke dia su bunu diri.
3 Kalo kotong tahan diri waktu orang mau bakalai deng kotong, na,
nanti orang laen dong hormat sang kotong.
Cuma orang pikir pende sa yang capát maso bakalai bagitu.
4 Pamokol dong sonde bale tana pas dia pung waktu.
Andia ko waktu musim koru, dia sonde dapa hasil sadiki ju.
5 Orang pung maksud ada di dia pung hati yang dalam.
Kotong bisa banding deng aer yang dalam.
Cuma orang yang pintar sa yang bisa timba ko dapa dia pung maksud.
6 Banya kawan omong bilang, “Parcaya sang beta sa!”
Ma dia pung batúl tu, kotong susa dapa kawan yang bata'ika deng kotong dalam susa.
7 Orang hati lurus dong, jujur deng adil dalam samua hal.
Andia ko ana-ana yang iko sang dong, talalu ontong.
8 Kalo raja ada dudu ko mau putus parkara, na,
dia timbang bukti dolo ko mau tau mana yang batúl, deng mana yang jahat.
Itu sama deng satu orang mau tapis buang uuk dari dia pung barás.
9 Sonde ada orang yang bisa bilang, “Beta su bekin barisi beta pung hati,
andia ko beta sonde ada pung sala deng dosa sadiki ju.”
10 Batu timbang yang sonde batúl tu, sonde bae.
Kayu ukur yang sonde batúl tu, sonde bae ju.
Dua-dua bekin TUHAN jadi jengkel.
11 Kotong bisa kanál orang dari apa yang dong bekin.
Jang lupa, te ana kici dong bagitu ju.
Dong su bisa bekin jahat, ais coba sambunyi dong pung jahat.
Dong su bisa bekin yang batúl deng barisi ju.
12 TUHAN Allah yang bekin kasi kotong,
mata yang bisa lia,
deng talinga yang bisa dengar.
13 Jang talalu suka tidor,
te nanti dia pung ujung-ujung, andia lu jadi miskin.
Ada lebe bae mete ko bajaga sa,
te ada banya salák ko karjá,
ais makanan dong lebe dari cukup.
14 Orang yang mau béli barang, mangomel bilang,
“Ini barang sonde bae!”
Ma kalo dia su pulang, dia bangga kasi tau orang bilang,
“Beta su dapa barang yang bae, deng harga mura sa!”
15 Dia pung batúl, andia: kata-kata yang buka orang pung pikiran ko biar dong pikir panjang,
dia pung harga lebe tinggi dari mas deng batu mangkilat dong.
16 Kalo lu jadi jaminan kasi orang yang sonde bakelu deng lu, na,
lu talalu bodo!
Te kalo dia sonde jadi bayar, na, lu yang musti bayar.
Ada lebe bae lu pegang ame dia pung baju, ko, dia pung barang laen dong.
Ais kalo dia sonde jadi bayar, na, lu bisa jual ame itu barang dong, biar ko lu jang rugi.
17 Kalo lu putar-balek orang ko dapa makan, na,
dia pung rasa manis.
Ma tunggu te lai sadiki,
dia pung rasa su sama ke pasir.
18 Kalo lu mau susun rancana ko mau bekin satu hal, na,
lebe bae dengar nasiat dolo.
Jang pi baparáng kalo balóm barunding deng orang yang tau itu hal.
19 Ada tukang badodol yang buka orang laen dong pung rahasia.
Jang parcaya deng orang macam bagitu.
Jang bakawan deng tukang bagosip dong.
20 Orang yang maki, ko, kutuk dia pung mama ko bapa, na,
sonde lama lai, te dia su mati mampos.
Itu sama ke Tuhan kasi mati itu orang pung lampu ko jadi galáp.
21 Kalo satu ana dapa pusaka sedu-sedu,
tagal dia pung mama deng bapa mati talalu capát, na,
lama-lama itu pusaka sonde jadi berkat kasi sang dia.
22 Lu jang bilang, “Nanti beta yang balas itu orang pung jahat.”
Sabar ko biar TUHAN yang ator sa.
23 Batu timbang yang sonde batúl,
bekin TUHAN Allah jadi jengkel.
Dacing yang sonde batúl,
sonde bae ju.
24 Karmana ko kotong bisa mangarti kotong pung jalan idop?
Te yang batúl, andia TUHAN Allah yang ator kotong pung idop.
25 Talalu bodo kalo balóm pikir lebe dolo, ma su janji sambarang bilang,
“Ini barang ni, barisi. Te nanti botong mau kasi pi Tuhan.”
Jang sampe nanti lu pung dudu-badiri su beda,
ais lu timbang bae-bae deng sonde bisa kasi itu barang.
Lu pung janji tu, sama ke lu pung omong su hiki bale sang lu.
26 Orang tani tapis kasi pisa sekám dari padi,
ais bakar buang dia pung sekám.
Itu sama ke raja yang pikir panjang,
te dia kasi pisa orang bae dari orang jahat,
ais kasi hukum orang jahat dong.
27 TUHAN Allah pake itu roh yang Dia kasi sang kotong,
sama ke satu lampu yang kasi taráng kotong pung hati yang dalam.
Andia ko Tuhan tau batúl kotong pung hati pung isi,
sampe alus-alus.
28 Kalo raja deng dia pung rakyat dong
bata'ika kuat-kuat deng idop basayang, na,
itu raja bisa yakin, sonde ada hal jahat yang kaná sang dia.
Kalo itu raja deng dia pung rakyat dong,
idop lurus deng idop barisi, na,
itu raja pung parenta bisa batahan lama.
29 Ana muda dong pung hebat,
andia dong pung kuat.
Orang tua dong pung hebat,
andia dong pung rambu puti,
yang kasi tunju, dong tu umur panjang deng pikir panjang.
30 Kalo kotong kaná firuk sampe luka badara, na,
itu bisa usir kasi kaluar hal jahat dari kotong.
Kalo kotong kaná puku, na,
kotong bisa mulai pikir dua kali ju.