(no title)
18
Orang yang bekin diri tapisa dari orang laen dong,cuma cari enak kasi dia pung diri sa.
Dia masparak kalo orang yang pikir panjang mau kasi tunju jalan yang bae kasi sang dia.
2 Orang bodo yang kira dia su tau samua,
sonde mau balajar ko biar dia bisa mangarti lebe bae lai.
Te dia lebe suka ba'omong tarús ko kasi tau dia pung pikiran sa.
3 Kalo lu bekin jahat, na,
nanti orang hina sang lu.
Kalo lu bekin yang sonde batúl, na,
nanti orang sonde mau badeka deng lu.
4 Ada orang saparu, yang kalo dong omong,
kotong sonde tau dong pung maksud,
sama deng kotong sonde tau laut dalam pung isi.
Ma kalo orang yang pikir panjang dong omong,
kotong bisa balajar talalu banya dari dong,
sama ke kotong yang aus dapa minum aer sagár dari kali.
5 Sonde batúl kalo tukang putus parkara,
barát sablá ko tolong orang yang bekin sala.
Sonde batúl kalo tukang putus parkara,
palang jalan ko biar orang yang sonde sala, tarima putusan yang sonde adil.
6 Orang bodo pung omong,
bekin orang dong bakanjar tarús.
Itu sama ke orang bodo ada minta dapa papoko.
7 Orang bodo pung mulu,
kasi ancor bale sang dia.
Orang yang pikir pende pung omong,
hiki bale sang dong.
8 Tukang badodol pung omong,
rasa ke kotong makan manis-manis.
Ma ati-ati, te dong pung omong tu,
bekin racun lu pung hati.
9 Pamokol dong yang sonde karjá,
sama ke orang yang tukang bekin ancor.
10 TUHAN Allah pung nama sama ke satu benteng yang kuat.
Te orang yang idop lurus dong lari pi Dia,
ko biar dong bisa aman deng salamat.
11 Orang kaya dong kira kata, dong pung kaya tu,
yang bekin dong jadi aman,
sama ke satu tembok kuliling yang bekin musu dong sonde bisa maso datang.
Dong kira dong pung kaya tu, bekin orang sonde bisa ganggu ame sang dong.
12 Kalo orang suka angka-angka diri,
nanti dia jato.
Kalo orang randá hati batúl,
nanti orang hormat sang dia.
13 Kalo balóm dengar abis orang omong,
ma su mulai kasi nasiat, na,
itu bekin malu sa, deng kasi tunju lu pung bodo.
14 Manusia bisa batahan kalo badan saki.
Ma kalo orang pung hati su ancor buang,
sonde ada yang bisa batahan.
15 Orang yang ada hikmat mau balajar tarús-tarús.
Orang yang pikir panjang dong pi cari
ko mau mangarti hal baru.
16 Kasi hadia tu, hebat.
Te dia bisa buka jalan kasi orang,
ko biar dia bisa mangada orang bésar dong.
17 Tiap parkara ada dua sisi.
Orang yang putus parkara musti ati-ati,
te kalo pihak partama su bacarita,
tingka ke itu parkara talalu jalás.
Ma kalo tunggu dengar pihak kadua pung omong,
baru dapa tau ada carita laen ju.
18 Kalo dua orang bésar ada baparkara,
deng talalu susa timbang mana yang batúl, na,
satu jalan kaluar yang gampang tu,
andia hela lot sa. Parkara su abis.
19 Kalo lu bekin satu hal yang bekin lu pung kawan jadi jengkel deng lu, na,
inga te, talalu susa kalo mau babae kambali deng dia.
Dia pung batúl, lebe gampang kasi kala satu kota yang kuat,
daripada lu jadi babae kambali deng dia.
Te sakarang bosong pung bakanjar sama ke satu pagar besi yang bekin bosong dua batapisa.
20 Orang pung kata-kata bisa isi dia pung parú,
deng orang yang pintar ba'omong bisa idop dari dia pung kata-kata.
Kata-kata yang pas bisa bekin orang rasa puas.
21 Orang pung omong bisa bekin orang idop, ko, mati.
Orang yang suka ba'omong nanti tarima ame dia pung hasil,
biar bae, ko sonde.
22 Orang yang dapa bini yang bae, talalu ontong.
Itu sama deng TUHAN Allah ada kasi tunju Dia pung hati bae sang itu orang.
23 Orang kasian dong musti noki-noki ko orang kaya tolong sang dong.
Ma orang kaya dong manyao deng kasar-kasar sa.
24 Orang kira dia pung ‘kawan’ dong, ada banya.
Ma dia pung batúl tu, dia pung kawan dong bisa bekin ancor sang dia ju.
Ada tamán satu kaki yang bata'ika lebe deka dari itu orang pung kelu sandiri.