(no title)
17
Di satu ruma yang dong makan kosong sa,ma sonde bakanjar,
itu lebe bae dari satu ruma yang dong makan daging tarús,
ma dong bakalai tarús ju.
2 Satu budak yang pikir panjang deng pintar urus banya hal,
bisa sa parenta ame bos pung ana yang bekin malu dia pung orang tua.
Nanti dia ju dapa bagian dari bapa pung pusaka,
sama-sama deng ana yang laen dong.
3 Kalo kotong mau dapa mas tulen deng perak murni, na,
kotong musti bakar di api panas batúl-batúl sampe dia pung kotoran samua malele kaluar.
TUHAN Allah yang hak ator sang kotong, bagitu ju.
Te Dia kasi biar coba'an di kotong pung idop, biar ko kamomos kaluar dari kotong pung hati.
4 Orang jahat suka dengar orang jahat dong pung omong.
Orang putar-balek suka dengar orang putar-balek dong pung omong.
5 Dia pung batúl, andia orang yang olok-olok orang miskin dong,
ada olok-olok sang Tuhan yang bekin ame sang dong ju.
Jang lupa, te orang yang hati sanáng lia orang laen pung calaka,
nanti dong kaná hukum ju.
6 Cucu dong sama ke topi juara yang kasi tunju ba'i-nene dong pung hebat.
Ana-ana dong musti rasa bangga deng dong pung papa-mama.
7 Sonde pas kalo orang bodo yang sonde tau banya,
coba-coba omong pintar pake bahasa tinggi.
Sonde pas kalo orang yang pegang parenta omong putar lida deng putar-balek.
8 Kalo sogok orang ko mau cari ontong, na,
orang yang kasi doi kotor kira kata, itu doi kotor tu,
sama ke le'u-le'u yang buka jalan kasi sang dia.
9 Orang yang lupa buang orang pung sala,
dia dapa kawan yang bae.
Ma orang yang suka ba'ungkit-ungkit satu parkara,
lama-lama dia pung kawan dong jao dari dia.
10 Kalo togor sang orang yang pikir panjang, na,
ada dia pung guna.
Ma kalo togor sang satu orang bodo yang sonde mau dengar,
biar kaná puku sampe 100 kali,
parcuma sa.
11 Orang jahat dong, tukang malawan.
Ma nanti Tuhan kirim satu orang kasar,
ko hukum sang dong.
12 Kalo orang rampas ame baruang ana dong, na,
baruang mai talalu jahat sampe bisa bekin mati orang.
Ma ada lebe bae kotong katumu ame satu baruang mai yang dia pung ana dong baru kaná rampas,
daripada kotong togor ame orang bodo yang sangka dia su tau samua,
waktu dia ada bekin hal bodo.
13 Kalo orang balas bae deng jahat, na,
dia pung kelu bisa dapa jahat tarús.
14 Kalo bak su mulai bocor, na,
talalu susa tutu bekin batúl,
te nanti itu bocor bisa batamba sampe aer maspurak kaluar.
Orang pung bakanjar ju bagitu.
Jadi lebe bae cari jalan ko jang mulai bakanjar.
15 TUHAN Allah paling sonde suka,
orang yang kasi tau orang jahat bilang, “Lu sonde bekin sala.”
TUHAN Allah paling sonde suka,
orang yang kasi tau sang orang idop lurus bilang, “Lu ada bekin sala.”
Dua-dua tu, sama-sama bekin jengkel Tuhan pung hati.
16 Sonde maso akal, kalo orang bodo yang sonde mau balajar apa-apa,
ma siap doi bayar guru ko ajar sang dia.
17 Kawan yang batúl pung sayang tu, sonde tau barenti.
Ais kalo kotong dapa susa, na,
kelu dong yang bantu ame sang kotong.
18 Talalu bodo kalo mau jadi jaminan kasi orang laen.
Deng orang yang janji mau bayar orang laen pung utang tu,
sonde tau pikir panjang.
19 Orang yang suka bakanjar tu, tukang bekin susa orang.
Orang yang suka angka diri tinggi-tinggi bisa jato turun pi bawa.
Inga te, orang yang jato dari tembok tinggi bisa pata tulang lebe para.
Ma orang yang jato dari tampa yang sonde tinggi, sonde para.
20 Orang hati babengko dong,
lama-lama sonde ontong.
Orang yang omong putar-balek dong,
lama-lama jato dalam susa sandiri.
21 Talalu susa kalo barana ame sang ana bodo yang pikir pende.
Tukang malawan pung orang tua dong sonde sanáng ju.
22 Hati babunga sama deng obat yang bekin bae badan.
Ma hati ancor isap buang orang pung tanaga.
23 Orang jahat dong tarima ame doi kotor deng sambunyi-sambunyi,
ko dong bekin rusak jalan yang lurus deng adil.
24 Orang yang pikir panjang dong pung mata,
sonde serong dari jalan lurus.
Ma orang yang pikir pende dong pung mata,
lari pi mana-mana sampe di dunya pung huk-huk,
ma dong sonde lia batúl jalan lurus di muka idong.
25 Ana yang pikir pende bekin susa dia pung bapa pung hati.
Ana bodo yang pikir dia su tau samua-samua,
bekin barát dia pung mama pung hati.
26 Sonde batúl kalo orang yang sonde bekin sala kaná denda.
Sonde batúl kalo orang hati bae kaná puku,
tagal dia bekin bae.
27 Orang pikir panjang sonde usa omong banya.
Orang kapala dingin mangarti banya hal.
28 Kalo orang bodo yang pikir pende sonde omong banya, na,
orang laen dong bisa pikir dia tu, orang pikir panjang.
Te kalo dong tutu mulu, na, orang sangka dong pintar.