(no title)
16
Kotong manusia bisa susun deng timbang rancana,ma mau jadi ko sonde, itu TUHAN yang putus.
2 Biar satu orang sangka dia pung jalan idop su barisi,
ma TUHAN Allah timbang itu orang pung isi hati.
3 Bosong pung rancana samua,
sarakan pi di TUHAN pung tangan.
Deng bagitu, baru bosong dapa hasil yang bae.
4 TUHAN bekin samua-samua ko iko dia pung maksud.
Andia ko kotong tau, Dia ju bekin orang jahat ko kaná hukuman iko dia pung waktu.
5 TUHAN Allah paling sonde suka orang sombong.
Ais jang jadi pikiran, te pasti dong ju kaná hukuman.
6 Kasi-sayang yang batúl, deng parcaya batúl sang orang,
bisa tutu ame orang pung sala.
Kalo kotong taku deng hormat sang TUHAN Allah, na,
kotong bisa sili hal jahat ju.
7 Kalo TUHAN suka orang pung jalan idop, na,
Dia bekin dong pung musu idop badame deng dong ju.
8 Kalo kotong idop lurus deng hati barisi, biar sonde ada pung harta bam-banya ju,
itu lebe bae dari kotong jadi kaya, ma kotong idop sonde jujur deng sonde adil.
9 Kotong manusia bisa susun rancana,
ma TUHAN yang ator kotong pung jalan.
10 Iko rakyat dong, kalo satu raja omong,
itu sama deng Tuhan yang omong.
Andia ko raja musti jaga bae-bae ko omong yang adil.
11 Di TUHAN pung karjá, na,
dacing dong musti batúl deng adil.
Te Tuhan pung mau ko samua putusan deng timbangan jadi deng batúl.
12 Kalo orang bekin hal jahat dong,
itu bekin raja dong jadi jengkel.
Te kalo raja pung parenta mau batahan lama, na,
samua orang musti karjá jujur deng batúl.
13 Kalo orang omong yang batúl deng yang bae,
itu bekin sanáng raja pung hati.
Te raja dong talalu sayang orang yang omong jujur.
14 Kalo raja jadi mara, na, itu bahaya,
te orang bisa mati.
Andia ko orang yang pikir panjang,
cari jalan ko bekin dingin raja pung mara.
15 Kalo raja ada senyum deng dia pung mata manyala sanáng, na,
itu bisa bawa idop ju.
Kalo raja ada sokong sang kotong,
itu sama ke awan yang bawa ujan pas dia pung waktu.
16 Kalo kotong balajar pikir panjang, na,
itu lebe bae dari kotong kumpul banya mas.
Kalo kotong mangarti banya hal, na,
dia pung harga lebe tinggi dari kotong dapa banya perak.
17 Orang yang idop barisi pung jalan idop,
jao dari hal jahat,
sama deng satu jalan bésar jao dari tampa yang sonde bae.
Orang yang jaga bae-bae dia pung idop,
piara dia pung nyawa ju.
18 Kalo lu kapala bésar,
nanti lu ancor.
Kalo lu jadi sombong,
nanti lu jato.
19 Kalo kotong jadi orang randá hati,
yang tenga deng orang miskin dong,
itu lebe bae dari kotong jadi orang tinggi hati,
yang bagi hasil deng orang sombong dong,
pake barang yang kotong rampas ame dari orang.
20 Orang yang dengar bae-bae
nasiat dari orang yang pikir panjang dong,
nanti dapa hasil yang bae.
Orang yang parcaya bilang nanti TUHAN Allah bekin iko Dia pung janji dong,
talalu ontong.
21 Kotong bisa kanál orang yang pikir panjang dong,
te dong mangarti banya hal iko Tuhan pung pandangan.
Kalo orang bisa kasi tunju dia pung hati bae lewat dia pung kata-kata dong,
nanti banya orang mau dengar sang dia.
22 Orang pung pikir panjang sandiri bawa idop kasi dia pung tuan,
sama ke satu mata aer bawa idop kasi dia pung tuan.
Ma orang pung pikir pende sandiri bawa hukuman kasi dia pung tuan.
23 Orang yang pikir panjang timbang dia pung kata-kata.
Dia pikir bae-bae dolo, baru omong.
Jadi kalo dapa orang macam bagitu, na,
banya orang mau dengar sang dia.
24 Kata-kata yang manis dari orang hati bae,
kasi kuat orang pung hati,
sama ke madu kasi kuat orang pung badan.
25 Ada jalan yang kantara bae,
ma dia pung ujung-ujung bawa orang pi mati.a
26 Kalo orang karjá dong rasa lapar, na,
itu buka jalan kasi sang dong.
Te nanti dong karjá deng samangat sampe abis,
ko biar dong bisa dapa makan.
27 Orang tar laku-laku dong suka cari hal.
Dong pung kata-kata ju kasi ancor banya hal,
sama ke api bakar kasi ancor satu ruma.
28 Orang putar-balek dong bekin kaco di mana-mana.
Tukang badodol bisa kasi pisa orang yang bakawan bae.
29 Jang parcaya sang orang yang gampang nae tangan,
te dong bisa bawa orang iko jalan yang sonde bae.
30 Ati-ati deng orang yang suka maen mata dong,
te jang sampe dong maksud mau putar-balek orang.
Ati-ati deng orang yang suka senyum di balakang-balakang dong,
te jang sampe dong su siap bekin jahat.
31 Rambu puti tu, sama ke satu topi juara,
te itu jadi tanda kasi orang tua dong pung hebat.
Jang lupa, te orang macam ke dong bisa umur panjang tagal dong idop barisi.
32 Orang yang tahan sabar lebe hebat dari orang yang jago bakalai.
Orang yang ator dia pung diri lebe hebat dari komandán yang rampas ame satu kota.
33 Kotong bisa hela lot ko cari tau mau bekin karmana.
Biar bagitu, ma TUHAN yang ator dia pung hasil.