(no title)
15
Kalo manyao orang pake mulu manis tu,bekin dingin orang pung mara.
Ma kata-kata yang kasar dong,
kipas kasi panas orang pung mara.
2 Kalo orang yang pikir panjang omong, na,
dong bisa buka kasi tunju banya hal bae kasi orang laen dong.
Ma kalo orang pikir pende dong omong, na,
dong cuma maspurak kasi kaluar dong pung bodo sandiri.
3 TUHAN Allah pung mata dong lia pi mana-mana,
andia ko Dia ada lia orang jahat dong pung pakariang,
sama-sama deng orang hati bae dong pung karjá.
4 Kata-kata yang manis dong sama ke satu pohon yang bawa idop.
Ma kata-kata putar-balek dong bisa bekin orang pung hati ancor.
5 Ana yang pikir pende sonde mau dengar,
waktu dia pung orang tua coba ajar sang dia.
Ma ana yang tarima bae waktu orang kasi tau bilang dia su bekin sala,
kasi tunju dia pung pikir panjang bagitu.
6 Di orang yang idop lurus dong pung ruma,
ada banya barang mahal.
Ma kalo orang jahat dong dapa doi,
itu doi bawa susa ju.
7 Kalo orang pikir panjang dong omong,
dong pung kata-kata sama ke waktu orang tani siram bibit,
te dong bagi kasi apa yang dong mangarti.
Ma orang yang pikir pende pung omong sonde bagitu.
8 Biar orang jahat dong bekin korban kasi TUHAN Allah,
ma itu tatáp bekin jengkel Tuhan pung hati.
Ma kalo orang hati lurus sambayang kasi Tuhan sa,
itu bekin Dia pung hati sanáng.
9 TUHAN Allah paling sonde suka orang jahat dong pung jalan idop.
Ma Dia paling sayang sang orang yang tanam kaki ko bekin yang batúl.
10 Orang yang bale balakang kasi tenga jalan yang batúl,
nanti kaná hukuman yang barát.
Orang yang sonde mau dengar kalo orang togor ko kasi tunju jalan yang batúl, na,
itu sama deng dong pili ko iko jalan pi mati.
11 TUHAN Allah bisa lia pi dalam dunya orang mati.
Lebe-lebe lai Dia bisa lia pi dalam kotong manusia yang idop pung hati.
12 Tukang ba'olok yang kira dong su tau samua-samua,
sonde suka kalo orang togor sang dong.
Andia ko sonde mungkin dong pi minta tolong sang orang yang pikir panjang.
13 Orang pung hati babunga bekin dia pung muka sanyúm.
Ma orang pung hati ancor bisa bekin dia ilang samangat.
14 Orang yang pikir panjang mau balajar tarús,
ko biar dia mangarti lebe banya hal lai.
Ma orang bodo dong kajár hal yang sonde ada pung guna,
sama ke dong makan sampa.
15 Orang malarat dong idop tiap hari deng susa.
Ma orang hati babunga tu, bisa sama ke bapesta sanáng tiap hari ju.
16 Ada lebe bae kotong pung harta sadiki,
ma kotong taku deng hormat sang TUHAN Allah.
Sonde bae kalo kotong pung harta banya,
ma jadi pikiran tarús deng kaco kiri-kanan.
17 Ada lebe bae kalo kotong makan nasi kosong sa,
di tampa orang dong basayang batúl.
Sonde bae kalo kotong makan pesta deng daging talalu banya,
di tampa orang dong babinci satu deng satu.
18 Orang yang gampang nae dara bekin kaco tarús.
Ma orang yang tahan dia pung diri deng kalam bisa bekin orang bakanjar dong jadi tanáng.
19 Orang pamokol dong pung jalan ponu deng duri.
Ma orang idop lurus dong pung jalan barisi deng rata.
20 Ana yang pikir panjang bekin dia pung bapa sanáng.
Ma ana yang bodo anggap reme dia pung mama.
21 Orang yang pikir pende pung pakariang yang bodo,
bisa sa bekin dia pung hati sanáng.
Ma orang yang pikir panjang iko jalan lurus tarús.
22 Kalo sonde barunding, deng sonde minta nasiat dari orang yang tau, na,
orang pung rancana jadi gagal.
Ma kalo konsultasi deng banya orang, rancana bisa jadi.
23 Kalo manyao yang pas, na,
itu bisa bekin orang pung hati sanáng.
Te kata-kata yang pas dia pung waktu, talalu bagus na!
24 Orang pikir panjang dong pung jalan idop,
bawa dong pi atas,
deng sonde bawa dong pi tampa orang mati di bawa.
25 Kalo orang sombong yang anggap diri pintar, na,
nanti TUHAN Allah bongkar buang dong pung ruma.
Ma kalo mama janda dong,
Tuhan jaga dong pung batas tana ko biar orang jang se'ok sadiki ju.
26 TUHAN Allah paling sonde suka
orang jahat dong pung rancana jahat.
Ma orang hati bae pung kata-kata yang manis,
bekin sanáng Tuhan pung hati.
27 Orang saraka yang cari ontong yang sonde batúl,
bekin susa dia pung kelu sandiri.
Ma orang yang sonde mau suap orang,
deng sonde mau sonto doi kotor,
sonde ada yang mau bunu sang dong.
28 Orang hati lurus dong pikir bae-bae dolo,
baru manyao.
Ma orang hati jahat dong maspurak kaluar kata-kata yang sonde bae,
padahal dong sonde pikir sadiki ju.
29 TUHAN Allah bale balakang deng orang jahat dong.
Ma Dia dengar orang hati lurus pung sambayang.
30 Kalo mata manyala waktu kotong sanyúm, na,
itu bekin orang pung hati rasa sanáng ju.
Deng kalo orang dengar kabar bae,
itu bekin orang pung badan rasa sagár.
31 Orang yang tarima bae kalo orang togor sang dia,
sonde rasa asing kalo tenga di orang pikir panjang dong pung teng-tenga.
32 Orang yang sonde mau dengar kalo orang ajar sang dia, na,
itu sama deng dia anggap reme dia pung diri sandiri sa.
Ma orang yang dengar kalo orang ajar sang dia,
nanti dia batamba pintar ju.
33 Kalo kotong taku deng hormat sang TUHAN Allah, na,
itu ajar orang tau pikir panjang ju.
Kalo kotong randá hati, na,
nanti orang hormat sang kotong ju.