(no title)
14
Parampuan yang pikir panjang urus deng ajar dia pung isi ruma dong, ko dong jadi bae.Ma parampuan yang pikir pende bekin dia pung isi ruma jadi rusak buang.
2 Orang yang idop lurus dong,
taku deng hormat sang TUHAN Allah.
Ma orang yang idop babengko dong,
anggap reme sang Dia.
3 Waktu orang bodo omong, andia orang yang kira dia su tau samua-samua,
nanti dia pung omong sandiri yang hukum bale sang dia.
Ma waktu orang pikir panjang omong,
dong pung kata-kata sandiri yang kasi salamat sang dong.
4 Kalo sonde ada sapi di kandang, na,
sonde bisa pake sapi luku ko bale tana luas,
ais sonde dapa tana pung hasil banya.
Ma kalo ada sapi yang kuat,
bisa pake sapi luku ko bale tana luas,
ais dapa tana pung hasil bam-banya.
5 Orang yang omong jujur tarús,
nanti jadi saksi yang batúl ju.
Ma orang yang putar-balek tarús,
mau sonde mau nanti jadi saksi putar-balek ju.
6 Kalo tukang ba'olok cari jalan kaluar,
dia sonde dapa.
Ma kalo orang yang biasa pikir panjang deng mangarti banya hal cari jalan kaluar,
itu sonde susa.
7 Jang bakawan bae deng orang pikir pende dong,
ma bajao dari dong sa,
te sonde mungkin dong pung omong nanti bawa hikmat sadiki ju kasi sang lu.
8 Orang yang pikir panjang dong,
tau dong pung jalan mau pi mana.
Ma orang yang pikir pende dong iko satu jalan,
ma sonde tau itu jalan mau pi mana,
ais dong sandiri yang kasasar.
9 Kalo orang kasi tunju sala sang orang pikir pende dong, na,
dong cuma balas deng olok-olok sa.a
Ma kalo orang kasi tunju sala sang orang idop lurus dong, na,
dong bisa tarima bae deng bekin lurus itu masala.
10 Orang laen dong sonde mangarti batúl,
satu orang pung hati barát, ko, hati babunga.
Cuma dia pung tuan sandiri yang tau batúl dia pung hati.
11 Orang hati jahat pung isi ruma nanti rusak buang.
Ma orang idop lurus pung isi ruma nanti batumbu kuat.
12 Ada satu jalan yang maso akal,
ma itu jalan pung ujung-ujung,
andia orang yang iko sang dia nanti tapisa buang dari Tuhan.b
13 Orang bisa sa katawa, biar dia pung hati barát.
Deng kalo rame-rame su abis, na, dia pung rasa duka masi ada.
14 Orang koru ame dia pung hasil tanam dong.
Andia, orang jahat dapa yang jahat,
deng orang hati bae dapa yang bae.
15 Orang yang sonde tau banya, gampang kaná tipu.
Ma orang yang pintar dong timbang bae-bae dolu, baru bagarák.
16 Orang yang pikir panjang dong ati-ati,
andia ko dong bale balakang dari yang jahat.
Ma orang yang pikir pende dong barani bodo sa,
te dong maju sa, biar pi dalam susa ko bahaya ju.
17 Orang yang gampang nae dara,
gampang bekin yang bodo.
Orang paling sonde suka sang orang yang suka cari-cari hal,
deng yang ator siasat ko kasi jato orang.
18 Orang yang sonde tau banya dong tarima ame apa yang bodo,
sama ke itu dong pung pusaka.
Ma orang yang pintar dong pung bagian,
andia dong bisa mangarti banya hal.
19 Nanti orang jahat dong soya
di orang hati bae dong pung muka.
Nanti orang idop babengko dong tondo
di orang idop lurus dong pung pintu garbáng.
20 Orang malarat dong pung kawan sonde banya,
te orang sablá ruma ju sonde suka sang dong.
Ma orang kaya pung ‘kawan’ dong talalu banya.
21 Padahal orang yang lia deng mata sablá
sang orang sablá ruma dong, bardosa.
Ma orang yang kasi tunju hati bae sang orang miskin tu,
talalu ontong.
22 Orang yang susun akal jahat,
pasti serong dari jalan lurus.
Ma orang yang susun rancana bae,
nanti Tuhan ator ko biar orang laen kasi tunju hati bae,
deng mau bata'ika tarús deng dia.
23 Orang yang karjá karás, ontong.
Ma orang yang cuma omong banya sa, nanti miskin.
24 Orang yang pikir panjang pung hebat,
andia dong mangarti banya hal, deng tau jalan kaluar.
Ma orang yang pikir pende pung upa,
andia dong pung bodo sandiri batamba tarús.
25 Saksi yang jujur bisa kasi salamat orang.
Ma saksi putar-balek dong tikam bale dong pung kawan sandiri.
Sonde bisa parcaya sang orang macam bagitu dong.
26 Orang yang taku deng hormat sang TUHAN Allah bisa rasa aman,
te dia tau nanti sonde ada hal jahat yang kaná sang dia,
deng dia pung ana-ana dong tenga di tampa yang aman ju.
27 Orang yang taku deng hormat sang TUHAN Allah tau bilang,
itu rasa taku tu sama ke satu mata aer yang bawa idop.
Te itu rasa taku tu buka jalan ko biar dia bisa lolos dari jarát,
yang dia pung ujung-ujung, andia orang mati.
28 Satu raja pung hebat,
andia dia pung rakyat yang banya.
Ma pamimpin yang sonde ada pung rakyat,
sonde ada pung kuasa apa-apa.
29 Orang yang tahan sabar,
mangarti banya hal.
Orang yang capát nae dara,
kasi tunju dia pung bodo sa.
30 Hati yang tanáng bekin orang pung badan tamba sehat.
Ma hati yang jelús bekin busuk tulang.
31 Orang yang tendes barmaen sang orang miskin dong,
su anggap reme sang Yang Bekin Ame sang dong ju.
Ma orang yang kasi tunju hati bae sang orang malarat dong,
kasi tunju hormat sang Yang Bekin Ame sang dong ju.
32 Orang jahat jato gara-gara dong pung bekin jahat sandiri.
Ma orang hati lurus dong aman,
tagal dong pung idop lurus tu.
33 Hikmat sonde asing di orang pikir panjang pung otak.
Ma orang pikir pende pung otak sonde kanál sang hikmat ju.
34 Rakyat yang bekin yang batúl,
angka tinggi-tinggi satu bangsa pung nama.
Ma rakyat yang bekin sala,
bekin rusak satu bangsa pung nama.
35 Raja talalu suka dia pung orang suru-suru,
yang pikir panjang deng karjá batúl dong.
Ma yang pegang parenta talalu mara sang dia pung ana bua,
yang bekin malu sang dia.