(no title)
13
Kalo dapa satu ana yang tau pikir panjang, na,itu kasi tunju bilang itu ana dengar-dengar sang dia pung orang tua dong.
Ma tukang ba'olok dong sonde parná dengar-dengar,
kalo orang mau kasi tunju jalan yang batúl sang dong.
2 Orang hati bae dong dapa hasil yang bae,
dari apa yang dong omong,
sama ke satu pohon dapa bua yang bae.
Ma orang putar-balek dong,
cuma kapingin bekin jahat tarús sang orang laen dong.
3 Orang yang jaga dia pung mulu,
piara dia pung idop sampe umur panjang bagitu.
Ma orang yang sonde jaga dia pung mulu,
nanti ancor sandiri dari apa yang dia omong.
4 Pamokol dong kapingin dapa banya,
padahal kosong tarús.
Ma orang yang rajin karjá dong,
dapa lebe dari cukup, ais dong bisa rasa puas ju.
5 Orang hati lurus dong,
sonde suka putar-balek orang.
Ma orang jahat dong sonde tau malu,
deng bekin hal yang kasi ancor dong pung nama sandiri.
6 Orang hati lurus pung idop lurus,
yang jaga dong pung jalan idop.
Ma orang jahat dong pung sala-sala dong,
yang makan bale sang dia.
7 Orang miskin saparu idop tingka ke dong kaya,
padahal kosong sa.
Orang kaya saparu idop tingka ke dong miskin,
padahal dong pung harta talalu banya.
8 Mungkin orang kaya dong musti bayar banya,
ko tabús ame orang yang ancam sang dong.
Ma orang miskin sonde parná dapa ancaman bagitu.
9 Orang hati lurus pung idop manyala taráng,
sama ke satu lampu te'oek pung manyala manari sanáng.
Ma orang hati jahat pung taráng takuju jadi galáp,
sama ke orang ada kasi mati dia pung lampu.
10 Orang sombong yang anggap diri pintar dong,
cuma tau bekin kaco deng bekin onar sa.
Ma orang yang pikir panjang dong,
suka dengar nasiat yang barguna.
11 Kaya capát dari akal jahat,
nanti ilang ju.
Ma orang yang kumpul harta dari karjá rajin dong,
batamba-batamba tarús.
12 Kalo su lama baharap satu barang,
ma sonde dapa ju,
nanti saki hati.
Ma kalo su lama baharap satu barang,
ais dapa sang dia ju,
nanti hati sanáng deng babunga.
13 Orang yang sonde toe deng sonde mau dengar,
nanti tanggong dia pung risiko sandiri.
Ma orang yang dengar deng bekin iko parenta dong,
nanti tarima ame dia pung upa ju.
14 Ajaran dari orang yang pikir panjang dong,
sama ke satu mata aer yang bawa idop.
Orang yang tarima bae deng bekin iko itu ajaran dong,
sonde kaná hiki,
deng sonde tapisa buang dari Tuhan.
15 Orang yang pikir lurus deng pikir panjang,
tarima hormat dari banya orang.
Ma orang yang omong laen, bekin laen,
nanti ancor sandiri,
te sonde ada orang yang bisa parcaya sang dong.
16 Orang yang mangarti banya hal,
pikir panjang dolo, baru karjá.
Ma orang yang sangka dia su tau samua-samua,
langsung karjá deng sonde pikir sadiki ju,
ais dong buka dada ko angka-angka dong pung bodo.
17 Orang yang bawa pasán yang sonde batúl dong,
cuma bawa susa sa.
Ma orang yang bawa pasán yang batúl dong,
bantu bekin parkara jadi bae,
te orang bisa parcaya sang dia.
18 Orang yang sonde mau dengar nasiat dong,
nanti miskin sandiri deng malu sandiri.
Ma orang yang dengar-dengar nasiat,
deng tarima bae ajaran ko kambali pi jalan lurus,
nanti dapa nama bae.
19 Kalo su lama lu kapingin dapa satu hal,
ais nanti dia jadi, na,
lu rasa puas deng sanáng.
Ma orang yang pikir pende dong,
paling sonde suka,
kalo dong musti bale balakang kasi tenga dong pung jahat.
20 Kalo lu jadi tamán satu kaki deng orang yang pikir panjang dong,
nanti lu balajar pikir panjang ju.
Ma kalo lu bakawan deng orang yang pikir pende dong,
nanti lu kaná ancor sama ke dong ju.
21 Orang pung bekin sala,
nanti iko sang dia tarús.
Ma orang pung bekin bae,
nanti iko sang dia ju,
te nanti Tuhan balas dia pung upa.
22 Orang hati bae kasi tenga pusaka
kasi dia pung ana-cucu dong.
Ma orang yang idop bekin sala,
nanti dia pung harta jato pi orang idop lurus dong pung tangan.
23 Biar orang miskin pung kabón dapa hasil bam-banya,
ma itu samua bisa ilang buang,
kalo ada yang sonde adil.
24 Kalo satu ana bekin hal sonde bae,
ma dia pung orang tua sonde togor deng sonde ajar sang dia, na,
itu sama deng dong sonde sayang itu ana.
Te orang yang sayang batúl sang dong pung ana,
pasti kasi tunju jalan idop yang bae,
deng ajar jalan lurus sang dong.
25 Orang idop lurus dong makan kinyang.
Ma orang hati jahat dong pung parú,
sonde parná rasa puas.