(no title)
12
Orang yang tarima bae nasiat yang ajar dia ko bekin yang batúl tarús, na,orang macam bagitu ju suka balajar hal baru.
Ma orang yang tola buang nasiat yang kasi tunju jalan lurus sang dia, na,
orang macam bagitu talalu bodo.
2 TUHAN Allah talalu suka deng orang hati bae dong,
ma Dia kasi hukum orang yang akal jahat dong.
3 Orang yang suka cari hal dong,
sonde parná rasa aman deng tanáng.
Ma orang hati lurus dong sonde tagoyang,
sama ke satu pohon yang dia pung akar maso dalam-dalam sonde tagoyang ju.
4 Bini yang pintar dalam banya hal tu, sama ke barang mahal.
Te dia pung laki dapa nama bae tagal dia.
Dia manyala sama ke batu mangkilat yang mahal.
Ma bini yang bekin malu tu,
ju bekin dia pung laki jadi noe nana'uk, sama ke kanker di tulang.
5 Kalo orang yang hati lurus dong susun rancana, na,
dong ator ko biar samua fer, ko biar sonde ada orang yang kaná susa.
Ma kalo orang jahat dong susun rancana, na,
ati-ati, te dong cuma tau tipu sa.
6 Orang hati jahat pung kata-kata yang hiki ame sang orang,
ma orang hati lurus pung omong yang kasi salamat sang orang.
7 Kalo Tuhan kasi jato orang jahat, na,
dong su ilang buang.
Ma kalo Tuhan kasi bangun ruma dari orang hati lurus dong, na,
dong pung nama batahan tarús.
8 Kalo orang pikir lurus deng pikir panjang, na,
lebe bae kalo kotong angka puji sang dia ju.
Ma kalo orang pikir babengko, ko, idop kamomos, na,
lebe bae kotong jang angka sang dia sadiki ju,
te kotong jang puji hal yang sonde bae dong.
9 Ada lebe bae kotong jadi orang randá hati yang sonde ada pung nama,
biar deng cuma satu orang suru-suru sa.
Sonde bae kalo kotong bagaya jadi orang bésar,
ma sonde ada pung makanan sadiki ju.
10 Orang hati lurus dong,
kasi tunju hati bae deng piara bae-bae dong pung hewan ju.
Ma orang hati jahat dong pung tangan bési,
bekin susa dong pung hewan, biar dong sangka dong ada piara bae-bae.
11 Orang tani yang karjá banting tulang dong,
nanti dapa makanan yang cukup.
Ma tukang mimpi yang cari karjá yang sonde dapa satu ta'i ju,
sonde tau pikir panjang.
12 Orang jahat kapingin dapa orang jahat laen dong pung hasil sonde bae dong.
Ma orang hati lurus dong dapa dong pung hasil bae sandiri,
sama ke satu pohon yang bae kasi kaluar bua yang bae.
13 Orang jahat pung omong,
makan bale sang dia.
Ma orang hati lurus dong,
lolos dari parkara bagitu.
14 Orang pung omong yang bae,
bisa kasi kaluar hasil yang bae ju.
Deng karjá karás dapa dia pung upa ju.
15 Orang yang pikir pende dong kira dong pung jalan tu, jalás,
ais sonde usa dengar sang sapa-sapa.
Ma orang yang pikir panjang dong,
dengar deng timbang nasiat dari orang laen.
16 Orang yang pikir pende pung mara kantara capát.
Ma orang yang pikir panjang tanáng tarús,
waktu orang omong bekin hina sang dong.
17 Orang yang omong jujur tu, biar karmana ju dia kasi tau apa yang batúl.
Ma orang putar-balek bisa jadi saksi dusta di muka hakim ju.
18 Ada orang yang maspurak kasi kaluar kata,
padahal balóm pikir sadiki ju.
Itu kata sama ke tikam orang.
Ma orang yang pikir panjang pung kata-kata dong,
bisa tutu luka deng bawa dame.
19 Kalo omong apa yang batúl, na,
nanti sampe kapan ju, samua orang dapa tau kalo dia batúl.
Ma kalo omong apa yang sonde batúl, na,
sadiki lai su bisa buka kasi talanjang itu omong kosong.
20 Orang yang suka susun rancana jahat dong,
dong pung hati cuma tau pikir jahat tarús sa.
Ma orang yang cari-cari jalan ko bekin dame,
dong tu yang bisa rasa puas deng sanáng.
21 Orang hati lurus dong sonde kaná ancor buang.
Ma orang hati jahat dong kaná susa tarús.
22 TUHAN Allah paling sonde suka orang putar-balek dong.
Ma Dia pung hati sanáng deng orang yang idop bekin iko Dia pung mau tarús.
23 Orang yang pikir panjang deng mangarti banya hal dong,
sonde pamer dong pung pintar sandiri.
Ma orang yang pikir pende dong,
suka buka dada ko kasi tunju dong pung bodo sandiri.
24 Orang yang rajin karjá,
nanti dong tu yang bisa pimpin orang laen.
Ma pamokol dong nanti karjá paksa kasi orang laen sama ke budak.
25 Banya pikiran deng hati yang barát,
bisa bekin orang pata samangat.
Ma kalo kotong kasi kuat orang pung hati,
dia pung hati bisa jadi ringan ju.
26 Orang hati lurus dong timbang bae-bae orang pung hati dolu,
baru bakawan bae deng itu orang.
Ma orang hati jahat dong sonde timbang apa-apa dolu,
andia ko dong gampang serong dari jalan lurus.
27 Sonde tau kanapa, ma kalo orang pamokol dong pi baburu, ko dapa satu binatang, na,
dong malas urus, deng malas masak,
andia ko dong sonde makan dong pung hasil.
Ma orang rajin dong dapa hasil bam-banya,
ais dong rasa puas deng itu hasil ju.
28 Orang yang idop lurus dong,
iko jalan yang bawa idop.
Dong pung jalan sonde bekin dong tapisa buang dari Tuhan Allah.