(no title)
11
Dacing yang sonde batúl bekin jengkel sang TUHAN Allah.Bagitu ju deng orang yang sonde jujur.
Ma dacing yang batúl bekin Tuhan pung hati sanáng.
Bagitu ju deng orang jujur.
2 Kalo ada orang sombong yang maen angka-angka diri, na,
pasti nanti dia jato, deng dapa nama sonde bae.
Ada lebe bae randá hati sa,
te itu baru kasi tunju hikmat.
Itu, baru pikir panjang yang batúl.
3 Orang yang idop lurus pung hati lurus,
yang kasi tunju jalan lurus sang dia.
Ma orang yang idop babengko dong pung hati babengko,
yang bekin dong serong, ais ancor sandiri.
4 Kalo Tuhan su mara ais mau hukum orang, na,
itu orang pung kaya sonde tolong sang dia sadiki ju.
Ma orang hati lurus yang idop lurus iko Tuhan pung mau,
sonde akan tapisa buang dari Tuhan.
5 Orang yang idop lurus sampe orang sonde bisa lempar sala apa-apa pi sang dong, na,
itu orang pung hati barisi tu, yang jaga dong pung nama bae.
Ma nanti orang laen pung jahat sandiri yang makan bale sang dia.
6 Orang yang idop lurus pung hati lurus,
yang kasi salamat sang dong.
Ma orang putar-balek pung ambisi,
yang hiki bale sang dia.
7 Kalo orang jahat su mati, na,
dia pung harta deng dia pung pangaru dong ju ilang buang.
Ais sakarang dia pung tangan su kosong,
jadi dia mau harap apa lai?
8 Tuhan kasi salamat sang orang hati lurus yang idop lurus.
Ma Tuhan kasi biar orang jahat jato dalam susa.
9 Orang yang sonde toe sang Tuhan,
mulu bagatal ko mau bekin rusak kawan pung nama bae.
Ma orang hati lurus tau pikir panjang,
ju omong yang pas ko kasi salamat orang.
10 Kalo orang hati lurus dapa hasil yang bae,
satu kota pung isi bisa hura deng hati sanáng.
Kalo orang hati jahat su ancor buang, na,
satu kota anteru bisa rame-rame sanáng ju.
11 Waktu Tuhan kasi tunju Dia pung hati bae sang orang hati lurus dong,
itu orang hati lurus dong pung kota dapa hasil yang bae ju.
Ma orang hati jahat pung mulu badodol,
bisa bekin kaco satu kota anteru.
12 Orang yang omong kasi jato orang laen pung nama bae,
sonde tau pikir panjang.
Te orang yang tau pikir panjang ju tau tahan dia pung mulu,
deng sonde omong banya.
13 Tukang mulu bagatal dong buka orang laen dong pung rahasia.
Ma kalo kotong bisa parcaya satu orang, na,
kotong ju tau dia jaga rahasia deng sonde omong sambarang.
14 Kalo sonde ada kapala yang kasi tunju jalan yang bae, na,
satu bangsa anteru bisa jato.
Ma kalo ada banya tukang nasiat yang kasi tunju jalan yang bae, na,
rakyat dong bisa aman.
15 Ada risiko kalo lu janji jadi jaminan kasi orang yang lu sonde kanál,
te kalo dia sonde bisa bayar, na, lu yang kaná susa.
Ma kalo lu bilang, “Jang mara, ma sonde jadi.”
Nanti lu sonde jadi pikiran sadiki ju.
16 Parampuan hati bae yang tolong orang laen,
dapa hormat dari banya orang ju.
Ma laki-laki yang tukang bapuku, yang cari ontong buat dia sandiri tu,
cuma dapa doi sa.
17 Orang yang kasi tunju rasa kasian, ontong ju,
te nanti dia pung bae bale pi dia.
Ma tukang bapuku yang bekin susa orang, rugi ju,
te nanti dia pung jahat bale pi dia.
18 Orang jahat pung kaya sonde tahan lama,
te ilang buang capát.
Ma orang yang tanam apa yang batúl,
dong pung bae tu nanti batahan lama.
19 Orang yang idop lurus tarús,
nanti dapa idop yang batúl.
Ma orang yang idop bekin jahat dong,
nanti tapisa buang dari Tuhan ju.
20 TUHAN Allah paling sonde suka orang hati babengko dong,
ma Dia pung hati babunga deng orang hati lurus dong.
21 Lu bisa parcaya ini hal: andia,
pasti orang jahat nanti kaná hukum.
Ma orang yang idop lurus dong,
yang nanti lolos.
22 Kalo taro cincin mas di babi pung idong, na,
itu parcuma sa.
Bagitu ju deng parampuan cantik yang sonde tau pikir panjang.
Parcuma sa.
23 Orang hati lurus pung mau-mau,
nanti dapa hasil bae.
Ma orang hati jahat pung kapingin dong,
nanti bekin onar deng kaco sa.
24 Ada orang yang suka kasi apa-apa ko tolong orang,
ma dong batamba kaya tarús.
Ada orang laen yang kake'ek, deng tahan apa yang pantas ko kasi orang,
ma dong pung harta kurang tarús, sonde parná cukup ju.
25 Orang yang suka kasi tunju hati bae sang orang tarús,
nanti dong sandiri dapa bae bam-banya.
Kalo kotong cari yang bae kasi orang laen,
nanti dia pung bae datang bale sang kotong ju.
26 Kalo ada kelaparan, ais orang tahan deng sonde jual makanan yang ada,
ko tunggu harga lebe tinggi,
pasti orang kutuk sang dia.
Ma orang yang bagi deng jual makanan pas deng orang pung parlú, na,
pasti orang dong minta bilang, “Tuhan tolong kasi berkat sang itu orang hati bae tu!”
27 Orang yang rajin cari yang bae kasi banya orang,
pasti dapa nama bae ju.
Ma orang yang rajin cari yang sonde bae,
pasti dapa nama yang sonde bae ju.
28 Orang yang taro hati di dong pung harta,
nanti jato.
Ma orang hati lurus yang parcaya sang Tuhan,
nanti dapa hasil bam-banya sama ke pohon yang dia pung daon garui.
29 Orang yang bekin kaco dalam dia pung kelu sandiri tu,
nanti dia pung warisan angin sa.
Orang bodo yang pikir pende,
nanti jadi tukang suru-suru kasi orang yang pikir panjang.
30 Orang hati lurus pung hasil,
sama ke satu pohon babua yang bawa idop.
Orang yang kasi salamat orang dong,
kasi tunju dong pung hikmat ju.
31 Kalo orang hati lurus yang idop lurus,
nanti dapa dong pung upa di ini dunya waktu dong balóm mati,
kira-kira orang jahat deng orang putar-balek dong,
nanti dapa apa?
Pasti dong dapa dong pung upa ju!a