Raja Soleman pung nasiat dong yang buka kotong pung pikiran
10
Ini nasiat dong ni, dari raja Soleman:Ana yang pikir panjang bekin sanáng dia pung orang tua pung hati,
ma ana yang pikir pende bekin susa dong pung hati.
2 Kalo orang jadi kaya dari dia pung bekin jahat, na,
sonde ada ontong, parcuma sa.
Ma orang yang bekin yang batúl ju ontong batúl,
te nanti dia sonde tapisa buang dari Tuhan Allah.
3 TUHAN Allah sonde kasi biar orang hati lurus mati lapar.
Ma kalo orang hati babengko dong,
Tuhan ator ko biar dong pung rancana jahat sonde jadi.
4 Sonde lama te, orang pamokol jadi miskin.
Ma orang yang rajin karjá bisa jadi kaya.
5 Kalo musim ketu-koru, na, ana yang pikir panjang rajin koru ju.
Ma ana yang tidor waktu musim ketu-koru bekin malu sa.
6 Tuhan kasi berkat sang orang yang idop lurus dong.
Ma orang yang idop babengko dong pung mulu baminya,
sambunyi dong pung rancana jahat.
7 Kalo kotong inga ame orang hati lurus pung idop, na,
kotong rasa sanáng deng sonde mau lupa sang dong ju.
Ma kalo orang hati babengko pung idop, na,
kotong mau lupa buang sang dong sa.
8 Orang yang pikir panjang suka dengar deng bekin iko ajaran dong.
Ma orang cerewet dong sama deng orang bodo yang pikir pende,
te dong pung suara tutu dong pung talinga sandiri,
ais nanti dong jato deng ancor buang.
9 Orang yang idop lurus dong sonde ta'antok.
Dong sonde usa jadi pikiran, te dong aman ju.
Ma orang yang idop babengko dong nanti jato.
Ais nanti samua orang dapa tau dong pung jahat ju.
10 Orang yang maen mata so'al rancana sonde bae,
bekin susa banya orang sa.
Deng orang cerewet yang pikir pende,
nanti dong jato deng ancor buang.
11 Orang hati lurus pung kata-kata bawa idop yang batúl.
Ma orang hati babengko pung kata-kata,
sambunyi dong pung rancana jahat.
12 Kalo simpan hati, na, pasti timbul parkara.
Ma rasa sayang bisa tutu banya sala ju.a
13 Orang pung pikir panjang kantara di dong pung kata-kata.
Ma orang pung pikir pende kantara waktu dong kaná hukuman ju.
14 Orang yang pikir panjang mau balajar tarús.
Ma orang cerewet yang pikir pende minta hukuman.
15 Orang kaya pung harta bisa jadi sama ke benteng yang kuat kasi dong.
Orang malarat gampang kaná ancor tagal dia pung miskin.
16 Orang hati lurus pung upa bawa idop.
Orang hati babengko pung upa tu, andia sala.
17 Orang yang suka dengar deng balajar dong,
su maso pi jalan yang bawa idop.
Ma orang yang sonde mau dengar waktu orang togor sang dia,
nanti serong dari jalan lurus.
18 Bisa sa, satu orang binci sang lu.
Ma lu sonde tau, tagal dia tutu dia pung rasa jengkel pake dia pung omong putar-balek tu.
Orang yang omong bekin rusak orang pung nama bae,
talalu bodo deng pikir pende sa.
19 Jang talalu cerewet ko omong sonde pake barenti,
te nanti lu omong satu hal yang bekin orang dong mara sang lu.
Orang yang pikir panjang dolu, baru omong,
dong ju tau tahan dong pung omong, ais sonde omong banya.
20 Orang hati lurus pung kata-kata dong,
ada pung harga sama ke perak tulen.
Ma orang hati jahat pung pikiran dong,
sonde ada pung guna ju.
21 Orang hati lurus pung kata-kata dong,
ada pung guna sama ke kasi makan banya orang.
Ma orang yang sonde mau dengar,
dong ancor gara-gara dong pung bodo sandiri.
22 Waktu TUHAN Allah kasi tunju Dia pung hati bae,
Dia ju kasi orang banya hal yang bae,
deng sonde bekin tamba repot ju.
23 Orang bodo yang sonde mau dengar,
cari sanáng lewat bekin yang sonde bae.
Ma orang yang pikir panjang jadi sanáng,
lewat bekin yang batúl.
24 Orang hati jahat dong taku apa, na,
itu yang nanti jadi, kaná sang dong.
Ma orang hati lurus dong rindu apa, na,
itu yang nanti jadi, kasi sang dong.
25 Kalo hari-hari susa dong su lewat,
orang hati jahat dong su ilang buang,
sama ke waktu angin tofan su abis.
Ma orang hati lurus dong batahan tarús.
26 Kalo satu orang karjá deng pamokol, na,
dia pung bos pung rasa saki sama ke asap kaná di mata, ko,
cuka kaná di gigi.
27 Orang yang taku deng hormat sang TUHAN Allah,
nanti dia pung umur batamba panjang.
Ma orang hati jahat pung idop,
nanti potong kasi pende sa.
28 Orang hati lurus ada harap apa, na,
nanti dia pung ujung tu, hati sanáng.
Ma orang hati jahat rindu apa, na,
nanti dia pung ujung tu, parcuma.
29 TUHAN jaga deng lindung orang hati lurus dong pung idop,
ma Dia kasi ancor orang yang idop bekin jahat dong.
30 Orang hati lurus dong batahan tarús,
deng sonde tagoyang.
Ma orang hati jahat dong sonde tenga lama di tana pusaka.
31 Orang hati lurus kasi nasiat yang bae,
ma nanti Tuhan potong kasi pende orang hati babengko dong pung omong putar-balek.
32 Orang hati lurus dong pung omong bisa tolong orang,
ma orang hati jahat dong pung omong bekin rusak orang sa.