Mama Hikmat kirim undangan
9
Mama Hikmat su bangun dia pung ruma luas satu.Di itu ruma, ada pung tuju tiang.
2 Dia su suru horo ame binatang dong, ko bamasa.
Dia su ator meja panjang,
deng su taro aer anggor.
3 Dia su utus dia pung orang suru-suru ko pi undang samua orang.
Dia sandiri pi pange dari tampa tinggi bilang,
4 “Orang yang sonde tau banya,
maso di beta pung ruma sa!
Kalo orang yang cuma tau pikir pende sa, na,
5 mari su! Makan di beta pung ruma,
ais minum beta pung aer anggor,
yang beta su taro di meja.
6 Kasi tenga bosong pung pikir pende dong,
ko biar bosong bisa idop deng batúl.
Idop iko jalan lurus,
ko biar bosong bisa balajar pikir panjang ju.”
Orang yang pikir panjang
7 Kalo bosong togor sang tukang ba'olok ko biar dia bekin yang batúl, na,
pasti dia balas deng mulu babengko ju.
Kalo bosong kasi tunju jalan lurus sang orang jahat,
pasti bosong kaná susa ju.
8 Andia ko, sonde usa togor sang tukang ba'olok dong,
te nanti dong binci bale sang bosong.
Ma kalo kotong togor sang orang yang tau pikir panjang, na,
nanti dia tamba sayang sang kotong.
9 Kalo kotong ajar sang orang yang tau pikir panjang,
dong tamba hikmat ju.
Kalo kotong kasi nasiat sang orang hati lurus,
dong balajar tamba ju.
10 Te kalo kotong taku deng hormat sang TUHAN Allah, na,
itu jadi akar dari hikmat.
Kalo kotong tamba kanál bae sang Orang Yang Barisi tu,
kotong su mulai pikir panjang ju.a
11 Inga te, kalo lu bata'ika deng Mama Hikmat,
nanti lu tamba umur panjang,
deng tamba taon idop dong ju.
12 Kalo lu pikir panjang, na,
dia pung ontong kambali pi sang lu.
Ma kalo lu lia sang Mama Hikmat deng mata sablá, na,
nanti lu pung bodo sandiri yang makan bale sang lu.
Mama Kapala Kosong kirim undangan ju
13 Ada satu mama lai, dia pung nama, Mama Kapala Kosong.
Dia cerewet, deng dia pung mulu sonde pake barenti ju.
Dia pung batúl, Mama Kapala Kosong tu, bodo,
deng dia sonde tau apa-apa ju.
14 Dia suka dudu-dudu di dia pung ruma pung pintu.
Ko, dia suka dudu-dudu di kota pung tampa tinggi.
15 Dia pange-pange sapa sa yang jalan lewat di situ,
biar dong sonde ada pung urusan deng dia sadiki ju.
16 Dia pange bilang, “Orang yang sonde tau banya,
maso di sini sa!
Kasi orang yang cuma tau pikir pende sa, na, beta kasi tau bagini:
17 Kalo curi orang pung aer minum, na, itu aer yang paling manis.
Deng makanan yang lu su curi ame dari orang, ais makan sambunyi-sambunyi tu,
itu yang paling ena dari samua!”
18 Itu Mama Kapala Kosong pung omong bagitu.
Ma orang yang mau dengar sang dia sonde sadar bilang,
Mama Kapala Kosong pung ruma tu, andia jalan yang bawa orang pi mati.
Deng dia pung tamu samua dong su kaná ancor buang.