Mama Hikmat mau kasi tau jalan yang bae
8
Dengar bae-bae, ko tangkap ame satu suara yang pange-pange.Tau-tau, te itu Mama Hikmat pung suara yang ada pange sang sapa sa yang mau dengar,
ko biar dia bisa kasi tau jalan yang bae.
Ada lebe bae kalo lu dengar bae-bae sang dia!
2 Dia pi banya tampa umum ko biar banya orang bisa dengar sang dia pung nasiat dong.
Di kota, dia pi tampa tinggi di istraat pung pinggir.
Dia pi jalan bésar dong pung cabang ju.
3 Dia pi di jalan maso-kaluar kota.
Dia ju pi ko batarea di tampa yang banya orang biasa bakumpul.
Di mana-mana, Mama Hikmat batarea ko mau kasi tau orang so'al nasiat yang pantíng dong, bagini:a
4 “We, bosong yang di situ!
Beta ada mau ba'omong deng bosong.
Yang batúl, beta ada mau omong kasi samua orang, kici-bésar.
5 Beta pung nasiat dong ni, kasi sang orang yang sonde tau banya,
ko biar bosong jang gampang kaná tipu.
Deng bosong yang kapala batu dong, yang sonde mau dengar,
dengar sang beta ko biar bosong bisa mangarti banya hal.
6 Dengar sang beta doo!
Te beta mau kasi tau sang bosong hal yang talalu bae, yang batúl, yang lurus dong.
Samua yang kaluar dari beta pung mulu dong, batúl.
7 Te beta salalu omong apa yang batúl.
Deng beta talalu jengkel deng hal yang babengko dong,
yang sonde lurus, sama ke orang pung putar-balek dong.
8 Te beta pung kata-kata dong tu, lurus batúl,
sonde ada yang babengko, ko, putar-balek sadiki ju.
9 Orang yang mangarti banya hal tau bilang,
apa yang beta omong dong tu, batúl.
Deng orang yang suka balajar dong ju tau bilang,
samua yang beta kasi tau sang bosong tu, lurus.
10 Ada lebe bae kalo lu tarima ame beta pung nasiat dong,
daripada lu tarima pérak.
Ada lebe bae kalo lu tarima ame beta pung ajaran dong,
daripada lu tarima mas tulen.
11 Te hikmat pung harga tu, lebe tinggi dari batu mangkilat yang mahal mati pung.
Lu mau dapa apa sa, na, dia pung nile sonde sama deng beta pung nasiat dong pung harga.
12 Beta ni, andia Mama Hikmat, tau jalan yang batúl.
Beta tau jalan kaluar yang bae.
Kalo mau mangarti banya hal, na, cari di beta sa.
Kalo mau timbang jalan yang lebe bae, na, tanya sang beta sa.
13 Inga te, kalo lu taku deng hormat sang TUHAN Allah, na,
pasti lu sonde suka hal jahat dong ju.
Beta paling sonde suka orang pung sombong, ko, orang pung kapala bésar.
Beta talalu jengkel deng orang pung jalan idop yang jahat,
deng orang pung omong putar-balek.
14 Ma beta talalu suka nasiat yang bae,
deng orang yang pikir panjang ko cari jalan yang batúl.
Te beta mangarti banya hal,
deng ada kuasa di beta, kalo orang bekin iko jalan yang batúl.
15 Inga te, kalo raja dong cari sang beta, na,
dong pegang parenta deng bae.
Kalo bos-bos dong dengar sang beta, na,
dong bekin atoran yang adil.
16 Pamimpin dong yang kanál bae sang beta,
pegang parenta deng jujur.
Kapala dong yang dengar-dengar sang beta,
putus hal deng fer.
17 Beta talalu sayang sang orang yang sayang sang beta.
Deng samua orang yang batúl-batúl cari sang beta, na,
pasti dong dapa sang beta ju.
18 Dari orang yang idop ta'ika deng beta, nanti dapa banya hal yang bisa batahan lama, tingka ke:
orang hormat sang dong,
dong bisa dapa harta macam-macam,
dong bisa jadi kaya ju.
Te kalo dapa harta iko jalan yang lurus deng batúl, na,
itu harta bisa batahan lama.
19 Beta kasi apa, na,
dia pung harga lebe dari mas tulen,
deng hasil dari beta lebe bae dari pérak asli ju.
20 Te beta salalu iko jalan yang lurus,
deng beta salalu kasi tunju jalan yang adil.
21 Andia ko orang yang sayang sang beta,
bisa jadi kaya.
Te beta isi dong pung gudang deng barang mahal bam-banya.”
Mama Hikmat tu, asal dari mana?
22 Mama Hikmat sambung dia pung omong bilang,
“TUHAN Allah tu, yang bekin ame sang beta dari mula-mula.
Beta ni, ke Dia pung ulu hasil.b
23 Dia balóm bekin ame bumi deng dia pung isi,
ma Dia su bekin ame sang beta lebe dolu.
24 Dia balóm bekin ame laut deng mata aer dong,
ma Dia su bekin ame sang beta lebe dolu.
25 Dia balóm bekin ame gunung kici-bésar dong,
ma Dia su bekin ame sang beta lebe dolu.
26 Dia balóm bekin ame tana, kabón, deng tana isi dong,
ma Dia su bekin ame sang beta lebe dolu.
27 Dia balóm bekin ame langit,
deng balóm kasi pisa laut dari langit,
ma Dia su bekin ame sang beta lebe dolu.
28 Dia balóm taro awan di langit,
deng balóm taro mata aer dong ko isi kali deng laut dong,
ma Dia su bekin ame sang beta lebe dolu.
29 Waktu Dia taro batas di laut dong,
ko biar aer jang nae datang di darat dong,
beta su ada memang.
Waktu Dia taro bumi pung fanderen,
beta su ada memang.
30 Waktu Dia karjá itu samua-samua, na,
beta ada di Dia pung rebis,
sama ke Dia yang jadi kapala tukang.
Tiap hari Dia talalu sanáng karjá deng beta,
deng beta ju talalu sanáng karjá deng Dia.
31 Beta pung hati talalu babunga lia Dia pung cipta'an.
Deng beta talalu sanáng lia manusia yang Dia su bekin dong.”
Kalo mau idop, na, putus ko dengar-dengar sang Mama Hikmat
32 Mama Hikmat sambung dia pung omong bilang,
“Ana dong, é! Pasang talinga ko dengar bae-bae sang beta.
Te samua orang yang idop iko beta pung nasiat dong tu, sanáng.
33 Dengar bae-bae waktu beta ajar jalan lurus.
Pikir panjang, deng jang acu sang itu ajaran dong.
34 Te sapa sa yang dengar-dengar sang beta pung nasiat,
deng sapa sa yang batunggu-tunggu beta pung datang,
pasti dong sanáng.
35 Te sapa sa yang dapa sang beta, na,
dia dapa idop yang batúl,
deng TUHAN Allah suka sang dia ju.
36 Ma orang yang sonde dapa sang beta, na,
dong su bekin rusak dong pung diri.
Te orang yang sonde suka pikir panjang,
lebe suka mati sa.”