Kalo maen parampuan, itu pikir pende sa
7
Beta kasi tau sang beta pung ana bilang,“Ana, é! Beta pung nasiat dong ni,
lu musti simpan di hati deng pikir bae-bae sang dong.
2 Bekin iko sang dong,
ko biar lu idop lurus deng idop yang batúl.
Jang lupa apa yang beta su ajar dong,
te dong tu sama ke barang mahal.
Andia ko lu musti jaga deng piara bae-bae sang dong,
ko biar lu jang lupa buang sang dong sadiki ju.
3 Beta pung nasiat dong tu, jang jao dari lu pung hati.
Pikir sang dong tarús.
Ika benáng di jari ko biar lu jang lupa sang dong.
Tulis sang dong di lu pung hati, sama ke satu surat yang sonde bisa lupa buang.
4 Kasi tau sang Hikmat bilang, ‘Lu ni, beta pung kaka parampuan.’
Ais pange sang Pikir Panjang bilang, ‘Lu ni, beta pung tamán satu kaki.’
5 Minta ko dong dua jaga bae-bae sang lu.
Minta ko dong dua tahan ame sang lu, ko biar lu jang jato deng maen parampuan.
Minta ko dong dua suru lu tutu talinga dari parampuan nakal pung mulu manis.
6 Satu kali, beta ada di ruma. Ais beta maloi dari jandela. 7 Beta lia ana muda dong, andia orang yang sonde tau banya. Di dong pung teng-tenga, beta ju lia satu ana yang talalu bodo, yang pikir pende tarús.
8-9 Su mau malam ju, ma ini ana ada iko jalan yang pi satu parampuan nakal pung ruma. Pung bodo lai!
10 Ais ju, itu parampuan kaluar pi tepa sang dia di jalan. Itu parampuan pake pakean sonde bae, sama ke parampuan nakal biasa pake. Dia ju su putus diam-diam ko mau tangkap ame itu ana bodo tu. 11 Naa, itu parampuan tu, cerewet deng sonde tau tanáng. Dia ju maen tapaleuk tarús deng sonde parná suka tenga di ruma sandiri. 12 Orang maen lia sang dia di jalan. Takuju sa, dia di lapangan. Di mana-mana dia mau tepa laki-laki bodo dong.
13 Ini kali ni, ini parampuan tepa sang itu ana bodo, ais paló ame sang dia, ju dia cium itu ana. Tarús deng sonde tau malu ju, dia barani omong bilang, 14 ‘Beta baru pulang ibadat. Di ruma sambayang beta kasi persembahan bekin dame. Deng beta baru abis nazar ju.
15 Andia ko beta mau datang cari sang lu sakarang! Tadi beta ada harap beta bisa dapa sang lu. Talalu ontong kotong dua su bakatumu ni! 16 Beta pung ruma su siap-siap. Beta su ator bae-bae kasi kotong dua ni. Di beta pung koi beta taro saprei alus yang ada warna dari Masir. 17 Beta ju su taro minya wangi, deng bumbu wangi ke kayu manis.
18 Mari su! Mari ko kotong dua bapaló-ciom rame-rame sampe siang. Mari ko kotong dua sanáng-sanáng!
19 Jang jadi pikiran, te beta pung laki sonde ada di ruma. Dia su jalan jao-jao. 20 Waktu dia pi, dia bawa doi bam-banya ju, jadi kira-kira bulan taráng, baru dia pulang ruma.’
Itu parampuan nakal maen buju sang itu ana bodo bagitu.
21 Deng dia pung mulu manis tu,
itu parampuan maen buju sang itu ana bodo,
ko biar itu ana iko sang dia.
Deng dia pung mulu baminya tu,
itu parampuan hiki ame sang itu ana
yang sonde tau pikir panjang.
22 Sonde lama ju, itu ana iko deng dia.
Dia iko sama ke satu sapi pi ko kaná horo.
Dia iko sama ke satu rusa kaná hiki,
23 ju tunggu pana tikam dia pung hati.
Dia lari pi, sama ke satu burung yang kaná jaring,
ma sonde sadar bilang dia pung ujung tu, andia mati.
24 Ana dong, é! Dengar bae-bae sang beta!
Pikir bae-bae beta pung nasiat dong ni!
25 Jang kasi biar ko lu pung pikiran mulai serong,
ko mau iko sang parampuan macam bagitu.
Jang mulai serong pi dia pung jalan.
26 Inga te, talalu banya orang su ancor gara-gara dia.
Inga te, talalu banya orang su jato deng parampuan macam bagitu.
27 Dia pung ruma tu, andia jalan yang bawa orang pi mati.
Dia pung kamar tu, andia tampa orang mati sa.”