Jang maen serong
5
Beta kasi tau sang beta pung ana bilang,“Ana, é! Pasang talinga ko dengar bae-bae beta pung nasiat.
Pikir ulang-ulang so'al beta pung kata-kata, sampe lu mangarti banya hal.
2 Te kalo lu bekin bagitu, na, lu bisa pikir lurus deng pikir panjang,
ais lu bisa omong yang pantas ju.
3 Ma lu musti ati-ati deng parampuan yang bukan lu pung bini, yang omong manis-manis,
deng tanda bae-bae sang parampuan nakal yang mulu baminya.
4 Biar dia omong manis bagitu, ma dia pung ujung-ujung, pait.
Dia pung batúl tu, dia pung mulu lebe tajam dari kalewang mata dua.
5 Dia sonde bawa sang lu pi jalan idop,
ma kalo lu iko sang dia, na,
nanti dia bawa sang lu turun pi tampa orang mati dong.
6 Te dia sonde iko jalan lurus yang bawa idop yang batúl,
ma dia pung jalan serong deng babengko,
padahal dia sonde tau itu jalan pi mana ju.
7 Andia ko bosong musti dengar bae-bae sang beta.
Jaga bae-bae ko jang lupa beta pung kata-kata dong.
8 Ada lebe bae kalo lu bajao dari parampuan nakal dong.
Jang pi maen-maen deka deng dia pung pintu ruma.
9 Te kalo lu bakawan deng dia,
nanti lu bekin rusak lu pung nama bae,
deng orang bisa kasar deng gampang bekin susa sang lu sonde pake barenti.
10 Te kalo lu jato bagitu, nanti orang yang lu sonde kanál,
yang dapa lu pung harta dong.
Ais orang asing yang nanti makan buang lu pung hasil karingat dong.
11 Kalo lu sonde jaga lu pung nama bae,
nanti dia pung ujung-ujung, lu mangomel sa,
waktu lu pung badan su karempeng deng rusak buang.
12 Ais lu manyasal deng kasi tau orang dong bilang,
‘Bosong yang laen dong, ati-ati, é! Te beta talalu bodo!
Dolu orang coba kasi nasiat sang beta, ma beta sonde mau dengar.
Orang mau kasi tunju jalan yang bae sang beta, ma beta sonde toe ju.
13 Orang mau ajar sang beta jalan idop yang batúl,
ma beta tutu talinga sa.
Orang mau bantu beta balajar pikir panjang,
ma beta sonde nodek sang dong ju.
14 Ais dia pung ujung-ujung bagini:
te sakarang beta su jato,
deng sakarang samua orang tau beta pung nama su rusak buang.’
15 Ma ada lebe bae, lu deng lu pung bini sandiri sa,
sama ke lu minum aer dari lu pung parigi sandiri sa,
deng sonde pi cari aer dari orang laen dong pung.
16 Te kalo lu pi maen parampuan,
itu sama deng lu jadi satu parigi umum,
yang banya parampuan pi ame aer dari situ.
17 Jadi lebe bae, lu deng lu pung bini sandiri sa.
Sonde bae kalo lu deng banya parampuan.
18 Cari sanáng deng lu pung bini sandiri sa,
sama ke dia jadi akar berkat kasi sang lu.
Dolu waktu bosong masi muda, na, bosong dua talalu basayang.
Pasang kaki ko idop bagitu deng dia tarús.
19 Sama ke kotong lia satu rusa mai talalu manis, na,
lia sang lu pung bini pung manis bagitu ju.
Biar ko lu pung mata manyala deng dia pung bua dada sa.
Biar ko lu pung nafsu nae datang deng lu pung bini sa.
Biar ko lu pung sanáng ada di dia tarús.
20 Ana-ana dong, é! Dengar bae-bae.
Sonde bae kalo lu maen serong deng orang laen yang bukan lu pung bini.
Sonde bae kalo lu lebe suka bua dada dari orang laen pung bini.
21 Inga te, TUHAN Allah ada lia samua.
Ais Dia lia kalo kotong bekin yang bae ko sonde bae.
Dia pareksa samua, sama ke itu ada di Dia pung muka-idong.
22 Inga te, manusia pung jahat makan bale dia pung tuan.
Orang pung jahat dong hiki bale sang dia.
23 Nanti dia serong dari jalan lurus, ais ilang buang,
tagal dia pung bodo sandiri.
Nanti dia mati,
tagal dia sonde mau dengar.”