Ana muda dong musti parcaya deng hormat sang Tuhan Allah
3
Waktu beta omong deng beta pung ana, na, beta kasi tau bilang,“Ana, é! Hal-hal yang beta su ajar sang lu, na, jang lupa, é!
Ma simpan bae-bae dalam lu pung hati,
ko biar lu bekin iko itu ajaran dong tarús.
2 Te kalo lu bekin bagitu, na,
nanti lu dapa umur panjang,
deng dapa idop aman, dame, deng tanáng ju.
3 Jang lupa ko bata'ika kuat-kuat deng lu pung kawan dong,
deng kasi tunju hati bae sang dong tarús.
Inga ko jaga itu hubungan bae tarús,
sama ke barang mahal yang ada tagantong di leher, ko,
tulis deng simpan di hati.
4 Te kalo lu jaga hubungan bae bagitu, na,
lu dapa nama bae,
di muka Tuhan Allah deng manusia ju.a
5 Jang pikir bilang, lu tau samua hal,
deng jang pikir bilang, lu pung pintar cukup.
Ada lebe bae kalo lu basandar deng parcaya sang TUHAN sa,
pake lu pung diri anteru-anteru.
6 Lu ada bekin karmana, na, pikir bae-bae so'al Tuhan Allah deng Dia pung mau kasi sang lu.
Kalo lu bekin bagitu, nanti Dia bekin lurus lu pung jalan dong.
7 Jang kira kata lu sandiri su pintar,
deng salalu tau jalan yang batúl dong.
Ada lebe bae, kalo lu taku deng hormat sang TUHAN Allah,
deng bale balakang sang samua yang jahat dong.b
8 Te kalo lu bekin bagitu, na, itu bekin lu pung badan jadi sehat,
deng hati samangat lai.
9 Pake lu pung harta ko kasi tunju hormat sang TUHAN Allah.
Pake lu pung kabón pung hasil yang partama deng yang paling bae,
ko kasi tunju Tuhan Allah pung hati bae sang lu.
10 Te kalo lu bekin bagitu, na, nanti Tuhan isi ponu lu pung gudang dong,
deng lu pung bak tada dong talalu kici,
te dong sonde mampu tada samua-samua yang Tuhan kasi sang lu.”
Andekata Tuhan hukum sang lu
11 Beta ju kasi tau sang beta pung ana bilang,
“Ana, é! Andekata TUHAN Allah hukum sang lu, na,
jang tutu talinga deng mata sang Dia,
deng jang cape, kalo Dia ada ajar sang lu.c
12 Te yang batúl tu, andia TUHAN ajar sang orang yang Dia sayang,
sama ke satu bapa ajar deng kasi tunju jalan yang batúl
kasi satu ana yang dia talalu sayang.”de
Mangarti hal iko Tuhan pung pikiran
13 Kalo orang mangarti hal iko Tuhan pung pikiran,
ais salalu tau jalan yang batúl,
deng balajar tamba lai, na,
orang macam bagitu talalu ontong.
14 Te apa yang dia dapa tu,
lebe mahal dari perak,
deng dia pung upa lebe bae dari mas.
15 Te mangarti banya hal bagitu tu,
lebe mahal dari batu mangkilat dong.
Samua barang laen yang lu suka dong,
sonde ada satu ju yang ada pung harga sama deng mangarti hal iko Tuhan pung pikiran bagitu.
16 Te kalo lu mangarti hal bagitu,
lu dapa umur panjang,
deng dapa hormat deng harta ju.
17 Te kalo lu tau iko jalan yang batúl dong,
pasti lu bisa idop deng hati manis,
ais lu idop aman, dame, deng tanáng lai.
18 Te kalo lu mangarti hal deng tau jalan yang batúl dong,
itu sama ke satu pohon yang babua bam-banya,
yang bawa idop kasi orang yang ame dari dia.
Te samua yang ame dari dia tu, talalu ontong.
19 Jang lupa, te TUHAN mangarti hal deng tau jalan yang batúl dong.
Dia pake itu ko bekin ame langit deng bumi,
ais ator bae-bae sang dong ju.
20 Tuhan tau samua hal.
Andia ko Dia ator ko biar aer dalam tana maspurak kaluar,
deng awan dong kasi turun ujan deng kasi kaluar kabut ju.”
Jaga hati lurus, deng jang putar-balek orang
21 Beta kasi tau sang beta pung ana bilang,
“Ana, é! Jaga bae-bae ko jang lupa ini hal dong.
Timbang bae-bae ko biar lu pikir lurus deng pikir panjang,
ais lu dapa tau jalan yang bae ko idop lurus deng idop panjang.
22 Te kalo lu bekin iko bagitu, na, lu dapa idop yang batúl,
deng orang dong suka deng hormat sang lu,
sama ke lu ada pake salendang bagus di leher.
23 Te kalo lu piara sang dong bagitu, na,
nanti lu pi mana-mana tu, aman,
deng lu pung kaki dong sonde ta'antok.
24 Waktu lu tidor, na, sonde taku ju,
ais lu pung mimpi dong, tanáng sa.
25 Lu sonde usa taku sang masala yang datang takuju,
ko, calaka yang kaná sang orang jahat dong,
26 tagal lu ada basandar sang TUHAN Allah.
Lu bisa parcaya sang Dia,
te lu pi mana, na,
Dia yang jaga ko biar lu pung kaki jang kaná hiki.
27 Kalo lu bisa tolong ame sang orang yang pantas tarima yang bae, na,
tolong sang dong sa, deng jang tahan sadiki ju.
28 Kalo lu bisa bantu sang lu pung orang sablá ruma sakarang, na,
jang kasi tau sang dia bilang, ‘Pulang su! Beso baru datang lai, ko beta bantu sadiki.’
Padahal apa yang dia parlú ada di lu pung tangan.
29 Kalo ada orang yang idop badeka deng lu, deng parcaya sang lu, na,
jang ator siasat ko bekin jahat sang dia.
30 Kalo orang sonde bekin apa-apa sang lu, na,
lu jang cari hal deng dia,
deng jang angka parkara yang sonde ada pung ujung-pohon.
31 Kalo ada orang yang maen jahat deng kasar sang orang laen, na,
jang conto sang dia,
deng jang pikir itu bae kalo lu bekin iko bagitu ju.
32 Te TUHAN saki hati sang orang babengko macam bagitu dong,
ma Dia bakawan bae deng orang hati lurus dong.
33 Yang batúl, TUHAN kasi kutuk sang orang yang idop bekin jahat deng dia pung isi ruma dong,
ma Dia kasi berkat sang orang yang hati lurus deng dia pung isi ruma dong.
34 TUHAN olok-olok sang tukang olok dong,
ma Dia kasi tunju Dia pung hati bae sang orang yang randá hati dong.f
35 Inga te, orang dong kasi hormat sang orang yang mangarti hal iko Tuhan pung pikiran,
ma orang kapala batu dong yang sonde mau dengar,
nanti cuma dapa malu sa.”