Kalo tau jalan yang batúl, nanti dapa hasil yang bae
2
Waktu beta omong deng beta pung ana, beta kasi tau bagini:“Ana, é! Dengar ame sang beta dolu!
Bekin iko beta pung parenta dong,
simpan bae-bae beta pung ajaran dong,
paló ame beta pung nasiat dong ju,
te itu samua tu, sama ke barang mahal.
2 Kalo orang yang mangarti banya hal kasi nasiat, na,
pasang talinga bae-bae ko dengar sang dong.
Kalo orang yang pikir panjang mau kasi tunju jalan, na,
buka hati ko paló ame itu nasiat dong.
3 Jang malu batarea minta tolong.
Jang malu minta ko orang kasi tau dong pung maksud,
ko biar lu bisa mangarti bae-bae.
4 Cari-cari ko mangarti hal dong,
sama ke orang kuliling gunung ko cari-cari perak asli,
ko, orang pi cari-cari barang mahal yang tasambunyi.
5 Te kalo lu cari-cari ko mangarti hal dong bagitu,
nanti lu dapa mangarti batúl dia pung arti dari kata-kata, ‘taku deng hormat sang TUHAN’,
nanti lu tamba kanál sang Tuhan Allah deng lebe dekat lai.
6 Te TUHAN yang hak ator sang lu, jadi akar dari samua hikmat.
Dia yang kasi tunju jalan lurus.
Dia yang kasi tau jalan kaluar dari susa.
7 Dia kasi nasiat yang bae ko tolong ame sang orang yang idop lurus dong.
Dia yang tangkis ko biar orang yang idop barisi jang kaná hal jahat dong.
8 Dia yang jaga tukang putus parkara dong, ko biar dong putus yang adil.
Dia yang jaga ame sang orang yang idop iko Dia pung parenta dong.
9 Kalo lu bekin iko samua bagitu, na,
nanti lu mangarti mana yang batúl, mana yang adil,
mana yang sonde barát sablá, deng salalu dapa tau jalan yang bae.
10 Te hikmat dari Tuhan mulai ator lu pung pikiran,
deng kalo lu tau pikir panjang, itu bekin sanáng lu pung hati.
11 Kalo lu tau timbang parkara deng bae,
hal jahat dong sonde kodo ame sang lu.
Kalo lu tau pikir panjang,
hal buruk sonde kasi ancor buang sang lu.
12 Kalo lu tau jalan yang lurus,
lu sonde iko jalan babengko dong,
deng sonde kaná hiki dari orang putar-balek dong ju.
13 Te itu orang dong su serong dari jalan lurus,
ko dong iko jalan galáp.
14 Waktu dong bekin hal jahat,
dong pung hati sanáng.
Waktu dong bekin kaco,
dong ju katawa sanáng.
15 Padahal dong idop babengko,
deng cuma tau idop iko jalan yang sonde batúl sa.
Idop lurus deng barisi sa
16 Kalo lu tau jalan yang batúl,
lu sonde maen serong deng parampuan yang bukan lu pung bini.
Kalo ada parampuan sonde bae yang maen mata deng lu, na,
lu sonde mau ju.
17 Parampuan macam bagitu su lapás buang dia pung laki dari waktu dia masi muda,
deng lupa buang dia pung sumpa di muka saksi deng Tuhan Allah.
18 Kalo lu maso pi dalam parampuan macam bagitu pung ruma, na,
lu su mati, andia bagitu su.
Te itu jalan pi api naraka sa.
19 Laki-laki yang maso pi situ su serong batúl,
deng sonde kambali pi jalan lurus lai.
Dong sonde sampe di jalan yang bawa idop yang batúl.
20 Andia ko lu musti iko jalan dari orang hati bae dong,
deng jang serong dari jalan orang idop barisi dong.
21 Ma inga te, cuma orang hati lurus sa,
yang nanti tenga di tana yang Tuhan su janji kasi.
Cuma orang yang idop barisi sa,
yang tenga tarús di situ.
22 Ma orang jahat dong sonde bagitu.
Te nanti dong ilang buang,
nanti dong tapisa buang dari tana yang Tuhan su janji kasi.
Nanti orang putar-balek dong,
kaná ancor buang dari situ ju.”