Tuhan tu, yang jaga sang kotong
121
Lagu puji waktu kotong mau maso pi sambayang.a1 Beta ni, susa!
Andia ko beta lia-lia pi gunung ko cari-cari,
ais beta tanya bilang,
‘Yang mau tolong ame sang beta,
nanti datang dari mana?
Kira-kira dari sana, ko?’
2 Padahal yang mau tolong sang beta tu,
bukan datang dari gunung.
Te yang tolong sang beta ni,
andia, TUHAN Allah,
yang bekin ame langit deng bumi.
3 Dia yang jaga sang bosong.
Dia yang sonde kasi biar ko bosong jato.
Deng yang jaga deng piara sang bosong tu,
sonde jato tatidor sadiki ju.
4 Te yang jaga tarús sang bangsa Israꞌel tu,
sonde tau tatidor,
deng sonde tau sonu.
5 Batúl! TUHAN Allah sandiri yang jaga ame sang bosong!
Dia yang badiri di bosong pung sablá,
ko pele ame sang bosong,
sama ke pohon pung sombar pele ame sang kotong dari matahari pung panas.
6 Ais kalo siang hari,
matahari sonde bekin angus sang bosong,
Deng kalo malam hari,
bulan sonde bekin bosong jadi saki.
7 Te TUHAN mau jaga ame bosong
dari samua yang jahat;
deng Dia yang piara ame bosong
ko biar bosong idop aman.
8 TUHAN jaga bosong pung dudu-badiri,
waktu bosong kaluar-maso pi mana-mana,
dari sakarang, tarús-tarús,
sampe salamanya sonde pake barenti.