Tuhan pung ciptaꞌan samua angka nae puji sang Dia
148
Puji TUHAN!Biar ko samua yang ada di langit dong,
angka nae puji sang TUHAN Allah di tampa yang paling tinggi!
2 Biar ko Tuhan pung ana bua di sorga dong samua,
angka nae puji sang Dia!
Biar ko Tuhan pung tantara di sorga dong samua,
angka nae sukur sang Dia ju!
3 Biar ko matahari deng bulan angka nae puji sang Dia!
Biar ko bintang yang bacaya dong angka nae sukur sang Dia ju!
4 Biar ko langit yang paling tinggi angka nae puji sang Dia!
Biar ko aer yang di atas langit angka nae sukur sang Dia!a
5 Biar ko TUHAN pung ciptaꞌan samua dong angka nae puji sang Dia!
Te Dia cuma parenta sa,
ju samua jadi memang.
6 Dia ator dong pung jalan masing-masing,
sampe salamanya.
Deng apa yang Dia ator tu, sonde ada yang bisa oba.
7 Biar ko samua-samua yang ada di bumi,
angka nae puji sang TUHAN Allah.
Biar ko samua yang ada di laut dalam dong,
angka nae sukur sang TUHAN Allah.
Deng biar ko binatang bésar yang ada di laut paling dalam dong angka nae sukur ju.
8 Angin deng cuaca dong iko Dia pung parenta.
Api deng asap dong iko Dia pung parenta ju.
Angin tofan, ujan es, deng ujan es batu iko Dia pung parenta ju.
9 Gunung kici-bésar dong iko Dia pung parenta.
Pohon yang babua di kabón dong iko Dia pung parenta.
Pohon utan dong iko Dia pung parenta ju.
10 Binatang utan deng binatang piara iko Dia pung parenta.
Burung di langit deng binatang marayap dong iko Dia pung parenta ju.
11-13 Biar ko raja-raja di anteru bumi dong datang angka nae puji sang Tuhan.
Biar ko orang dari samua suku-bangsa dong datang angka nae puji sang Tuhan.
Biar ko orang bésar-bésar dong datang angka nae puji sang Tuhan.
Biar ko tua-tua adat di anteru bumi dong datang angka nae puji sang Tuhan.
Biar ko laki-laki deng parampuan,
tua-muda, kici-bésar,
samua datang angka nae puji sang Tuhan.
Biar ko ini dong samua-samua ni angka nae puji sang TUHAN.
Biar ko dong cuma angka nae tinggi-tinggi sang Dia pung nama sandiri sa!
Te Dia pung hebat lebe tinggi dari langit deng bumi.
14 Dia bekin Dia pung orang dong jadi kuat.
Andia ko orang dong bacarita soꞌal Tuhan pung orang pung bae,
te dong idop taꞌika deng Dia tarús.
Biar ko samua orang Israꞌel yang deka deng Dia,
angka nae puji sang TUHAN! Haleluya!