Kotong angka nae puji deng sukur sang Tuhan
118
Mari ko kotong angka nae sukur sang TUHAN Allah, tagal Dia pung bae.Dia kasi tunju Dia pung hati bae sonde pake barenti,
kasi Dia pung orang yang taꞌika deng Dia pung janji.a
2 Biar ko orang Israꞌel dong omong bilang,
“Dia kasi tunju Dia pung hati bae sonde pake barenti,
kasi Dia pung orang yang taꞌika deng Dia pung janji.”
3 Biar ko kapala agama dong, andia baꞌi Harun pung turunan, omong bilang,
“Dia kasi tunju Dia pung hati bae sonde pake barenti,
kasi Dia pung orang yang taꞌika deng Dia pung janji.”
4 Biar ko samua orang yang taku sang TUHAN inga bilang,
“Dia kasi tunju Dia pung hati bae sonde pake barenti,
kasi Dia pung orang yang taꞌika deng Dia pung janji.”
5 Dalam beta pung susa deng sangsara, beta sambayang minta tolong sang TUHAN.
Beta minta tolong sang Dia,
ju Dia dengar ame sang beta,
ais kasi salamat sang beta ko taro beta di tampa yang aman.
6 Kalo TUHAN ada di beta pung pihak,
beta mau taku sang sapa lai?
Te manusia sonde bisa bekin apa-apa sang beta na!b
7 TUHAN yang bataꞌika deng beta, ada tolong sang beta.
Waktu Dia kasi kala orang dong yang binci mati sang beta, na,
beta bisa dapa lia Dia bekin bagitu.
8 Ada lebe bae, kotong balindung di TUHAN Allah sa,
te kalo kotong taro parcaya sang manusia,
jang sampe dong sonde kuat.
9 Ada lebe bae, kotong balindung di TUHAN Allah sa,
te kalo kotong taro parcaya sang orang bésar dong,
jang sampe dong sonde kuat.
10 Biar samua bangsa dong kurung ame sang beta,
ma beta kasi ancor bale sang dong,
pake TUHAN Allah pung nama deng kuasa!
11 Batúl! Dong kurung ame sang beta,
ju sarbú sang beta,
ma beta kasi ancor bale sang dong,
pake TUHAN Allah pung nama deng kuasa!
12 Dong makarubu sang beta, sama ke fanik yang mara dong.
Dong karoyok ame sang beta, sama ke utan karíng yang tabakar abis deng capát,
ma beta kasi ancor bale sang dong,
pake TUHAN Allah pung nama deng kuasa!
13 Bosong yang bamusu deng beta!
Bosong tendes barmaen sang beta, ko mau kasi jato sang beta.
Ma TUHAN Allah yang tolong ame sang beta.
14 Te TUHAN Allah yang bekin beta jadi kuat.
Dia yang bekin beta angka nae lagu puji sang Dia.
Deng Dia yang kasi salamat sang beta ju.c
15 Kotong bisa dengar orang yang babae deng Tuhan dong batarea ukur kuat,
sama ke tantara yang manáng dong angka nae puji deng sukur bilang,
“TUHAN su kasi tunju Dia pung kuasa yang hebat!
Andia ko kotong yang manáng!
16 TUHAN yang angka nae Dia pung tangan kanan,
ko kasi tunju bilang Dia yang manáng!
Batúl! Te TUHAN ada pung kuasa yang hebat!
Andia ko kotong yang manáng!”
17 Beta sonde mati sakarang, ma beta idop.
Ju beta carita samua-samua yang TUHAN Allah su bekin.
18 Waktu beta baparáng malawan musu dong,
ju TUHAN hukum ko ajar sang beta.
Ma Dia sonde kasi tenga beta mati.
19 [Ais beta minta kapala agama dong bilang,] “Tolong buka ame ini pintu kasi beta,
di Tuhan pung Tenda Sambayang!
Te orang hati lurus dong bole maso pi dalam.
Beta mau maso ko angka nae sukur deng tarima kasi sang TUHAN di sini.”
20 [Ju orang yang ada dalam Tenda Sambayang dong manyao bilang,]
“Ini pintu ni, jalan kasi orang yang mau pi mangada sang TUHAN.
Orang yang hati rindu sang Tuhan bole maso lewat sini.”
21 [Dengar bagitu, ju beta angka nae puji sang Tuhan bilang,]
“Awii, Tuhan! Beta angka nae puji deng sukur sang Tuhan,
te Tuhan su dengar beta pung sambayang,
ais Tuhan kasi salamat sang beta dari beta pung susa!”
22 Ada satu batu yang tukang dong su angka buang,
ma sakarang itu batu su jadi tiang induk pung batu alas.d
23 Dia jadi bagini, tagal TUHAN Allah sandiri yang bekin,
andia ko kotong lia dia pung bagus lai!e
24 Ini hari ni, andia TUHAN pung hari.
Mari ko kotong inga Tuhan pung bae,
ju angka nae puji sang Dia.
25 TUHAN, é! Tolong kasi salamat sang botong!
Tolong bekin beta pung idop deng karjá samua dapa hasil yang bae.f
26 [Kapala agama dong kasi tau bilang,]
“TUHAN kasi berkat sang orang yang datang bawa Tuhan pung nama,
tagal Tuhan su utus sang dia!
Andia ko botong yang ada dalam TUHAN pung Tenda Sambayang,
minta ko Tuhan bekin yang bae kasi sang bosong samua.g
27 TUHAN tu, Allah!
Apa yang Dia bekin kasi kotong,
sama ke Dia kasi taráng ame sang kotong.
Jadi ika daon palam dong iko-iko pinggir jalan,
sampe badeka deng meja korban pung ujung yang mirip tanduk dong.
28 Awii, Tuhan! Tuhan yang beta mau sémba tarús.
Beta suka minta tarima kasi sang Tuhan!
Tuhan yang beta mau sémba tarús.
Beta suka angka tinggi-tinggi Tuhan pung hebat!
29 Mari ko kotong angka nae sukur sang TUHAN Allah, tagal Dia pung bae.
Dia kasi tunju Dia pung hati bae sonde pake barenti,
kasi Dia pung orang yang taꞌika deng Dia pung janji.