Tuhan pung sayang sang Dia pung orang dong
103
Lagu Puji ni, Daud yang karang.1 Beta sémba deng angka nae puji sang TUHAN Allah,
pake beta pung hati anteru-anteru.
Beta puji Dia pung nama yang barisi.
2 Beta angka nae puji sang TUHAN Allah,
pake beta pung hati anteru-anteru.
Beta sonde bole lupa samua yang bae,
yang Dia bekin kasi sang beta.
3 Te Dia yang lupa buang kotong pung sala-sala dong samua.
Deng Dia yang bekin bae kotong pung saki-saki dong samua.
4 Dia yang tabús ame sang kotong,
ko kasi lapás sang kotong dari lobang kubur.
Dia yang ada bataꞌika deng kotong,
deng kasi tunju Dia pung hati bae sang kotong sonde pake barenti,
sama ke Dia taro topi juara di kotong pung kapala ko kasi tunju Dia pung sayang.
5 Tuhan bekin beta rasa ke beta tarima lebe dari cukup,
te Dia yang bekin hal bae macam-macam kasi sang beta.a
Biar beta su tua sakarang,
ma Dia ju bekin beta rasa kuat kambali,
sama ke waktu beta masi muda,
sama ke satu burung élang yang kuat tarús.b
6 Kalo orang tendes barmaen sang orang kasian dong,
TUHAN Allah yang angka sang itu orang kasian,
ju bekin lurus dong pung parkara,
deng bekin yang batúl kasi sang dong.
7 Dolu-dolu, Tuhan kasi tunju Dia pung mau-mau sang baꞌi Musa,
deng orang Israꞌel dong bisa lia Tuhan pung hati dari samua-samua yang Dia su bekin.
8 TUHAN Allah sabar talalu,
deng suka kasi tunju Dia pung hati bae.
Dia sonde gampang nae dara,
deng salalu ponu sayang kasi sang Dia pung orang dong.c
9 Dia sonde simpan hati tarús-tarús,
Dia ju sonde lempar sala tarús-tarús.
10 Biar Tuhan ada pung hak ko kasi hukum sang kotong,
tagal kotong pung sala-sala dong,
ma Dia sonde bekin bagitu.
Biar pantas kalo Dia balas kotong pung jahat,
tagal kotong malawan sang Dia,
ma Dia sonde hukum sang kotong bagitu.
11 Kotong samua tau langit deng bumi talalu bajao.
Inga te, Tuhan pung sayang sang Dia pung orang dong sama bésar bagitu ju,
apalai kasi sang orang yang taku deng hormat sang Dia.
12 Kotong samua tau matahari nae deng matahari turun talalu bajao.
Inga te, Tuhan ju lempar buang kotong pung sala-sala dong pung kuasa sama jao bagitu dari kotong.d
13 Sama ke satu bapa yang bae talalu sayang dia pung ana,
deng kasi tunju dia pung hati bae sang dong,
bagitu ju TUHAN Allah sayang Dia pung ana,
deng kasi tunju Dia pung hati bae sang orang yang taku deng hormat sang Dia.
14 Te Dia tau batúl bilang, kotong cuma manusia noe sa.
Dia sonde lupa bilang, Dia bekin ame sang kotong cuma pake tana isi sa.e
15 Te kotong manusia pung umur pende sa.
Kotong idop sama ke rumput,
ko, bunga utan yang muncul capát sa.
16 Ma kalo angin panas fuu, dia layu buang.
Sonde ada dia pung bunga lai.
Deng sonde ada orang yang inga itu bunga pung tampa lai.
Kotong manusia umur pende bagitu ju.f
17-18 Ma TUHAN Allah sonde noe nanaꞌuk sama ke kotong manusia.
Te Dia idop tarús.
Deng Dia pung sayang batahan tarús,
sonde pake barenti.
Dia sayang Dia pung orang dong.
Dia sayang orang yang taku deng hormat sang Dia.
Dia sayang sang orang yang bekin iko Dia pung parenta dong.
Dia ju sayang sang orang yang inga Dia pung janji kasi sang dong,
ko jaga deng tolong orang yang taꞌika deng Dia.
Ma Tuhan bukan cuma sayang sang orang macam bagitu dong sandiri sa,
te Dia sayang bagitu sang dong pung ana-cucu dong ju.
19 TUHAN Allah su taro Dia pung kursi parenta di langit.
Deng Dia yang parenta samua-samua.
20 Bosong samua yang jadi Dia pung ana bua di sorga dong,
angka nae puji sang TUHAN Allah!
Bosong yang hebat yang kasi jalan Dia pung parenta dong,
Tuhan yang bekin bosong jadi kuat,
ais bosong dengar-dengar sang Dia,
ju bekin iko samua-samua yang Dia kasi tau sang bosong.
21 Bosong samua yang jadi sama ke Dia pung tantara di sorga dong yang baparáng kasi sang Dia,
angka nae puji sang TUHAN Allah!
Deng bosong yang karjá kasi sang Dia,
yang layani sang Dia, deng bekin iko Dia pung mau-mau,
angka nae puji sang TUHAN Allah!
22 Bosong samua yang jadi Dia pung ciptaꞌan
di tampa mana sa Dia pegang parenta, na,
angka nae puji sang TUHAN Allah!
Beta ju angka nae puji sang TUHAN Allah,
pake beta pung hati anteru-anteru.