Tuhan Allah jaga deng tolong Dia pung orang dong
46
Kasi kapala tukang maen musik dong. Lagu Puji ni, ana-ana dari marga Kora yang karang, ko biar nona-nona dong yang manyanyi.2 Tuhan Allah yang jaga ame sang kotong.
Tuhan Allah yang kasi kuat sang kotong.
Jadi waktu kotong dapa susa deng sangsara,
Dia yang su siap sadia ko tolong ame sang kotong.
3 Andia ko kotong sonde taku.
Biar tana tagoyang kuat-kuat,
ais gunung dong ancor buang,
sampe longsor maso ilang buang pi dalam laut.
4 Biar laut mangamok deng babui,
ais gunung dong gamatar tagal galombang dong.
5 Tuhan Allah Yang Paling Tinggi pung kota,
jadi Dia pung tampa tenga yang barisi.
Di itu kota ada satu kali yang mangalir,
yang bawa rasa sanáng sang orang di situ dong.
6 Tuhan sandiri tenga di itu kota ju.
Andia ko sonde ada satu apa ju yang bisa kasi ancor buang itu kota.
Te papagi hari, Tuhan mau tolong itu kota.
7 Suku-bangsa dong baribut!
Negara deng karajaꞌan dong jato!
Tuhan pung suara sama ke guntur.
Dengar Dia pung suara tu, bumi malele.
8 TUHAN Allah jadi Panglima banya tantara!
Dia yang ada sama-sama deng kotong.
Te dolu-dolu, kotong pung nene-moyang, andia baꞌi Yakob, ada sémba sang Dia.
Deng Dia sama ke satu benteng yang kuat kasi kotong.
9 Mari! Datang ko lia bae-bae
TUHAN pung hasil karjá yang hebat dong.
Lia itu hal-hal di anteru dunya,
yang bekin orang dong tanganga bodo tagal rasa taku.
10 Dia yang kasi barenti orang yang baparáng di mana-mana.
Dia yang kasi ancor buang busur dong,
Dia yang kasi pata buang tombak dong,
deng Dia ju yang bakar buang musu pung alat tangkis dong.
11 Tuhan suru sang dong bilang, “Cukup! Barenti su!
Bosong musti sadar,
te Beta ni, Tuhan Allah!
Nanti samua suku-bangsa kasi tunju hormat sang Beta.
Ais nanti di anteru dunya, orang dong angka tinggi-tinggi Beta pung nama ju!”
12 Bosong orang Israꞌel dong, dengar sang beta doo.
TUHAN Allah jadi Panglima banya tantara!
Dia yang ada sama-sama deng kotong.
Te dolu-dolu, kotong pung nene-moyang, andia baꞌi Yakob, ada sémba sang Dia.
Deng Dia sama ke satu benteng yang kuat kasi kotong.