Orang saki sambayang minta tolong
41
Pasán kasi orang yang pimpin lagu dong: Lagu Puji ni, Daud yang karang.2 Orang yang ontong batúl, andia:
orang yang taro mata sang orang kasian dong,
te waktu dong dapa susa, TUHAN kasi salamat sang dong.
3 TUHAN yang jaga bae-bae sang dong,
deng piara dong pung idop.
Orang macam bagitu ada pung nama bae.
Tuhan sonde sarakan sang dong iko musu dong pung mau-mau.
4 Waktu dong ada saki barát,
TUHAN yang rawat ame sang dong.
Tuhan yang kasi kurang dong pung rasa saki,
deng bekin bae kambali sang dong.
5 Beta sambayang bilang, “TUHAN, é!
Tolong kasi tunju rasa kasian sang beta doo.
Bekin bae kambali sang beta,
biar beta su bekin sala sang Tuhan.
Beta buka hati ko mangaku beta pung sala dong.”
6 Beta pung musu dong cuma tau omong jahat soꞌal beta sa.
Dong baꞌomong bilang, “Ada lebe bae dia mati su!
Biar ko orang lupa buang sang dia sa!”
7 Waktu musu dong datang ko mau lia sang beta di atas koi,
dong cuma omong hal-hal yang sonde ada pung ujung-pohon sa.
Dong balia ko mau cari hal sa,
ko biar waktu dong kaluar, na,
dong bagosip kiri-kanan soꞌal beta pi mana-mana.
8 Samua orang yang binci mati sang beta,
bakumpul ko bakusu-kusu soꞌal beta.
Dong cuma tau pikir yang paling tar bae soꞌal beta sa.
9 Dong baꞌomong bilang, “We! Dia pung panyaki tu,
pasti nanti bekin dia mati mampos ju!
Sonde mungkin dia bisa bangun lai dari itu koi.”
10 Tamba lai, beta pung tamán satu kaki ju,
yang biasa makan sama-sama di beta pung ruma tu,
su tikam beta dari balakang.a b
11 TUHAN, é! Tolong kasi tunju rasa kasian sang beta ju.
Bekin bae kambali sang beta,
ko biar beta bisa balas dong pung bekin-bekin ju.
12 Kalo beta pung musu dong sonde bisa angka muka bilang,
“Botong yang manáng!”
Itu jadi tanda kasi beta bilang,
Tuhan sanáng deng beta.
13 Tuhan yang sokong sang beta,
tagal beta pung hati lurus dalam ini parkara.
Deng Tuhan yang bawa ame sang beta,
ko biar beta sama-sama deng Tuhan tarús.
14 Puji TUHAN!
Te Dia tu, orang Israꞌel dong pung Tuhan Allah.
Dia yang su ada memang dari dolu-dolu.
Dia yang idop tarús sonde pake barenti!
Bagitu su! Amin!c