Tuhan pung kota Sion yang hebat
48
Lagu Puji ni, ana-ana dari marga Kora yang karang.2 TUHAN Allah yang paling hebat dari samua!
Pantas ko samua orang angka nae puji sang Dia.
Angka nae puji sang Dia di Dia pung kota!
Angka nae puji sang Dia di Dia pung gunung yang barisi ju!
3 Dia pung gunung yang tinggi tu, talalu gaga!
Gunung Sion tu, bekin orang di anteru dunya pung hati babunga,
lebe dari itu gunung yang jao di sablá utara tu,
andia itu tampa tenga dewa-dewi dong.
Te kota Sion tu, andia kotong pung Raja yang hebat pung kota yang batúl!a
4 Tuhan Allah tenga di itu kota pung istana dong.
Deng orang yang tenga di itu kota dong su tau bilang,
Tuhan yang jaga deng bela sang dong.
Te Dia sama ke satu benteng yang kuat.
5 Biar bagitu, ma raja dong bakumpul deng dong pung tantara bam-banya.
Dong maju sama-sama ko mau sarbú maso pi kota Yerusalem.
6 Ma waktu dong dapa lia itu kota tu,
dong tanganga bodo!
Ais dong ilang kira,
ko lari panta panas!
7 Dong gamatar dingin!
Te dong sangsara sama ke satu parampuan yang saki mau barana.
8 Dong susa, sama ke waktu angin ribut dari sablá matahari nae
kasi ancor buang kapal bésar dong yang datang jao-jao dari kota Tarsis di Spanyol.
9 Dolu, botong su dengar bam-banya, soꞌal TUHAN pung kota pung hebat,
ma sakarang botong su lia deng mata kapala sandiri.
Te TUHAN Allah jadi Panglima banya tantara.
Dia ada tenga di itu kota.
Deng Dia ada jaga deng piara ame itu kota sonde pake barenti.
10 Di Tuhan pung Ruma Sambayang Pusat,
botong inga tarús Tuhan pung sayang yang sonde putus-putus.
11 Tuhan Allah pung nama yang hebat su tasiar sampe di dunya pung huk-huk.
Sampe orang dong angka nae puji sang Tuhan di anteru dunya.
Tuhan ada pung kuasa ko putus ame hal yang adil tarús.
12 Orang yang tenga di gunung Sion dong pung hati babunga.
Deng orang dari Yudea pung kampong-kampong dong pung hati sanáng ju,
tagal Tuhan salalu putus yang adil.
13 Jalan kuliling kota Sion,
pi pareksa bae-bae ko itong dia pung manara dong.
14 Lia bae-bae dia pung tembok yang talalu tabal mati pung dong,
ais rasa heran ko lia dia pung istana dong.
Inga bae-bae, ko biar nanti bosong bisa carita samua-samua kasi sang ana-cucu dong.
15 Kasi tau sang dong bilang, “Ini kota pung hebat samua tu,
satu gambar deng Tuhan Allah.
Dia jadi kotong pung Tuhan tar putus-putus,
Dia ju kasi tunju jalan sang kotong sonde pake barenti.”