Orang susa datang minta ampon
39
Lagu Puji ni, Daud yang karang. Kasi sang Yedutun, yang kapala tukang maen musik dong.2 Beta pikir bilang, “Beta mau jaga bae-bae beta pung jalan idop,
ko biar beta pung omong jang bekin sala.
Salama orang jahat dong bisa dengar,
beta tahan ame beta pung mulu ko jang omong.”
3 Ais ju, beta diam deng tanáng.
Beta tahan diri, deng sonde omong soꞌal hal bae ju.
Biar bagitu, ma sonde bisa tahan ju,
te beta pung hati susa tu, ada foe tarús-tarús.
4 Beta pung hati susa tu, maen batamba-tamba.
Waktu beta ada pikir-pikir bagitu ju,
beta rasa sonde bisa tahan sabar lai.
Andia ko, beta angka omong bilang:
5 “TUHAN, é! Kasi tau sang beta, beta pung idop yang pende ni pung ujung.
Kasi inga sang beta, beta pung idop ni ada pung batas,
deng beta pung umur sisa sadiki sa.
6 Batúl, te beta pung umur sama ke satu jingkal.
Deng beta pung idop pung panjang,
cuma sabantar sa, ais ju ilang buang.
Te manusia pung idop tu, sama ke napas satu hela sa.
7 Batúl! Te manusia pung idop tu,
sama ke sombar yang bapinda-pinda, ais ilang buang.
Orang dong batasibu-ribu deng urusan yang sonde ada pung ujung-pohon.
Dong batasibu ko kumpul ame harta,
ma kalo dong su mati,
dong sonde tau sapa yang dapa ame itu harta dong.
Parcuma sa!
8 Jadi sakarang, Tuhan, beta mau tunggu apa lai?
Te beta taro harap pi Tuhan sandiri sa.
9 Beta pung sifat bamalawan sang Tuhan,
makan bale ame sang beta.
Jadi beta minta ko Tuhan kasi salamat sang beta,
dari beta pung sala sandiri.
Jang kasi biar orang bodo dong olok-olok bekin hina sang beta.
10 Beta diam di Tuhan pung muka.
Beta sonde buka mulu sadiki ju,
te Tuhan yang ada hukum ame sang beta.
11 Ma cukup su!
Tuhan jang papoko barmaen sang beta lai,
te beta su doꞌo kaná hukum.
12 Tuhan kasi hukum orang tagal dong pung sala-sala dong,
deng kasi ancor buang barang yang dong suka mati,
sama ke fufuk makan buang pakean.
Batúl! Botong pung idop gampang ilang buang,
sama ke satu hela napas sa.
13 TUHAN é, pasang talinga di beta pung sambayang,
dengar ame waktu beta batarea minta tolong!
Taro mata waktu beta pung aer mata malele.
Te beta sama ke Tuhan pung tamu,
andia orang manumpang di Tuhan pung ruma,
sama ke dolu-dolu beta pung nene-moyang dong jalan pal pi-pal datang.
14 Kasi tenga sang beta, ko jang mara sang beta lai,
ko biar beta bisa rasa hati babunga ulang lai,
ko biar beta balóm mati, na,
beta bisa senyum ulang lai.