Beta yakin, Tuhan yang tolong sang beta
27
Lagu Puji ni, Daud yang karang.1 TUHAN yang tolong sang beta tarús,
te Dia sama ke taráng yang kasi tunju jalan sang beta,
deng Dia yang kasi salamat sang beta.
Jadi beta mau taku sang sapa lai? Sonde ada, to?
TUHAN yang jaga sang beta,
te Dia sama ke satu benteng yang aman,
yang musu dong sonde bisa maso tambús dia pung tembok yang tábal dong.
Jadi beta mau taku sang sapa lai? Sonde ada, to?
2 Waktu orang jahat dong datang,
ko mau kasi ancor buang sang beta,
ma dong tu yang sonde kuat, ais jato.
Dong sandiri yang kaná ancor bale.
3 Biar lai satu tantara anteru kurung ame sang beta ju,
ma beta sonde taku.
Biar lai dong sarbú baparáng ko mau kasi ancor sang beta ju,
ma beta parcaya tarús sang Tuhan.
4 Beta cuma minta ko TUHAN bekin satu hal kasi sang beta sa.
Itu sa yang beta ada cari-cari.
Andia: salama beta idop,
beta mau tenga di TUHAN pung Ruma tiap hari.
Te beta mau lia TUHAN pung bae tarús,
deng beta mau rasa tarús-tarús Dia pung hati manis.
Deng beta mau pikir dalam-dalam soꞌal Tuhan pung mau-mau,
di Dia pung Ruma Sambayang.
5 Waktu beta dapa susa,
Tuhan yang kasi beta tampa di Dia pung Ruma, ko biar orang sonde bisa bekin apa-apa sang beta.
Dia yang sambunyi sang beta di Dia pung Tenda,
ko biar musu dong sonde dapa lia sang beta.
Tuhan yang angka ame sang beta,
ais taro ame beta di atas batu bésar yang tinggi,
ko biar musu dong sonde bisa sampe.
6 Jadi, biar musu su kurung ame sang beta bagitu,
ma beta bisa angka muka,
te beta yang manáng.
Andia ko, kalo beta antar binatang korban dong pi Tuhan pung Ruma Sambayang Pusat,
na, beta datang deng balompa sanáng.
Ju beta maso deng manyanyi pake alat musik,
ais angka nae puji sang TUHAN.
7 TUHAN, é! Dengar sang beta kalo beta batarea minta tolong.
Kasi tunju rasa kasian sang beta.
Deng dengar beta pung sambayang ju.
8 Di beta pung dalam hati,
beta dengar Tuhan ajak ame sang beta bilang,
“Mari su. Datang baꞌomong deng Beta.”
Dengar bagitu, beta manyao bilang,
“Bae. Itu beta pung mau batúl. Te beta mau datang baꞌomong deng TUHAN.”
9 Jadi, Tuhan jang bale balakang sang beta.
Beta ni, Tuhan pung orang karjá.
Ais Tuhan jang mara ko tola buang sang beta,
te Tuhan yang su tolong ame sang beta tarús.
Tuhan jang angka kaki kasi tenga sang beta,
te Tuhan sa yang kasi salamat sang beta na!
10 Biar beta pung mama deng papa kasi tenga sang beta,
ma Tuhan yang jaga deng piara ame sang beta.
11 TUHAN, ajar sang beta Tuhan pung jalan idop.
Pimpin sang beta di jalan yang lurus,
te beta pung musu dong ada tunggu-tunggu ko mau lia beta jalan serong.
12 Jang kasi tenga ko dong bisa bekin jahat sang beta iko dong pung suka,
Dong bilang dong omong yang batúl soꞌal beta,
padahal dong basaksi omong kosong sa.
Deng dong ancam ko mau bekin jahat sang beta.
13 Biar dong bagitu, ma beta parcaya beta akan lia TUHAN pung bae.
Deng beta yakin waktu beta masi idop,
beta akan lia Tuhan kasi lurus hal babengko dong.
14 Bosong samua, dengar, é!
Bosong musti batahan deng sabar ko tunggu Tuhan bagarák.
Kasi kuat bosong pung hati.
Jang taku apa-apa.
Batahan deng parcaya bilang TUHAN yang jaga deng piara sang bosong.