Orang yang hati lurus sambayang minta tolong
26
Lagu Puji ni, Daud yang karang.1 Tuhan Allah, beta minta ko TUHAN putus beta pung parkara deng adil,
ko biar orang dong tau beta sonde ada pung sala dalam ini hal.
Te beta pung idop iko jalan lurus tarús,
deng beta pung parcaya sang TUHAN sonde tagoyang.
2 TUHAN, coba sang beta sa.
Uji sang beta sampe samua yang kamomos kaluar dari beta pung hati deng beta pung idop.
Pareksa beta pung hati deng beta pung pikiran.
3 Te beta sonde bisa lupa buang Tuhan pung hati bae,
yang Tuhan sonde parná barenti kasi tunju sang Tuhan pung orang dong.
Deng beta pung idop sonde serong dari Tuhan pung jalan lurus.
4 Beta sonde bakumpul deng orang putar-balek dong,
deng beta sonde bakawan deng orang muka-balakang yang omong laen, bekin laen.
5 Beta sonde suka dudu bakumpul deng orang jahat dong,
deng beta sonde maso bagabung deng orang tar bae-bae dong.
6 TUHAN! Kalo beta mau maso sambayang di Tuhan pung meja korban,
beta cuci barisi beta pung tangan dolo,
ko jadi tanda bilang beta pung hati barisi ju.
7 Beta kasi tunju beta pung rasa tarima kasi,
ais beta manyanyi lagu puji sang Tuhan deng suara kuat-kuat.
Beta ju carita Tuhan pung hebat, yang Tuhan parná kasi tunju ame sang orang dong.
8 TUHAN, beta talalu suka Tuhan pung Ruma,
te Tuhan pung hebat ada kantara di situ ju.
9 Kalo Tuhan kasi hukum orang yang idop bekin sala dong,
jang kasi tenga beta iko kaná dong pung hukuman.
Deng kalo Tuhan kasi turun hukuman pi orang yang bunu orang dong,
na, kasi salamat sang beta ko biar beta jang iko kaná itu hukuman ju.
10 Te orang jahat dong pung tangan kotor,
tagal dong idop pake otak kotor,
deng dong pung tangan ponu deng doi kotor.
11 Ma beta sonde ke bagitu,
te beta idop lurus-lurus sa.
Jadi beta minta ko Tuhan kasi salamat sang beta,
tagal Tuhan pung hati bae.
12 Beta tanam kaki di dasar yang kuat,
ais iko tarús Tuhan pung jalan lurus.
Beta ju puji-puji sang Tuhan di orang banya dong pung muka.