Sambayang minta Tuhan kasi tunju jalan
25
Lagu Puji ni, Daud yang karang.1 TUHAN, é! Beta angka beta pung hati,
ko sémba deng sambayang sang Tuhan.
2 Bapa jadi Tuhan Allah yang beta sémba tarús,
jadi beta parcaya batúl-batúl sang Bapa.
Jang kasi biar ko orang bekin malu sang beta.
Jang kasi tenga ko beta pung musu dong pung hati sanáng,
tagal beta dapa calaka.
3 Jang kasi biar ko orang jahat dong bekin rusak nama bae,
dari orang yang taro parcaya deng baharap sang Tuhan.
Jang kasi tenga ko Tuhan pung orang dong jadi malu ju.
Ma biar ko orang yang suka tusu dari balakang dong,
deng yang sambarang kasi jato orang bae, tagal itu memang dong pung asli,
tenga ko dong pung nama sandiri yang rusak buang.
4 TUHAN, é! Beta minta ko Tuhan kasi tunju Tuhan pung jalan yang bae kasi sang beta.
Ajar sang beta Tuhan pung jalan idop yang lurus.
5 Pimpin sang beta ko idop iko apa yang batúl.
Ajar sang beta bagitu,
te Tuhan sandiri yang kasi salamat sang beta.
Siang-malam beta tau Tuhan yang nanti tolong sang beta,
andia ko beta bisa sabar ko tunggu sang Tuhan sa.
6 TUHAN, é! Beta minta ko Tuhan inga ame Tuhan pung hati bae,
deng kasi tunju ame Tuhan pung rasa kasian,
yang Tuhan su kasi tunju dari dolu-dolu.
7 Ma jang inga lai beta pung sala-sala dong,
yang beta bekin waktu masi muda.
Jang inga lai waktu beta langgar Tuhan pung jalan idop yang lurus ju.
Ada lebe bae, Tuhan inga sa Tuhan pung hati bae deng rasa kasian sang beta,
tagal kotong dua bataꞌika,
deng tagal Tuhan pung bae sa.
8 Te Tuhan tu, bae.
Dia bekin yang batúl tarús.
Andia ko Dia kasi tunju jalan yang batúl,
kasi orang yang su serong dari Dia pung jalan idop yang lurus.
9 Tuhan kasi tunju jalan yang batúl,
sang orang yang sonde angka-angka diri.
Deng Dia ajar Dia pung jalan idop yang lurus,
sang orang yang randá hati dong.
10 TUHAN pung jalan dong samua,
salalu kasi tunju Dia pung hati bae deng Dia pung rasa kasian,
sang orang yang idop iko Dia pung janji yang Dia su ika ame deng dong,
deng yang bekin iko Dia pung atoran.
11 TUHAN, é! Samua orang hormat Tuhan pung nama,
tagal Tuhan pung hati bae.
Andia ko beta minta ko Tuhan hapus buang beta pung sala-sala dong,
te itu sala dong talalu banya.
12 Kalo orang yang taku deng hormat sang TUHAN,
na, nanti Dia kasi tunju jalan yang bae sang dong,
deng ajar sang dong ko pili Dia pung jalan yang batúl.
13 Tuhan kasi tunju Dia pung bae sang dong tarús.
Ais nanti dong pung turunan jadi tuan tana.
14 Orang yang taku deng hormat sang TUHAN,
nanti idop deka deng Dia,
sama ke tamán satu kaki.
Ju Dia kasi mangarti sang dong,
Dia pung janji yang Dia su ika deng dong.
15 Siang-malam beta pung hati inga sang TUHAN,
ko minta tolong dari Dia sa.
Te biar orang laen dong mau hiki kasi jato sang beta,
ma Tuhan yang angka sang beta ko biar beta sonde kaná hiki dari dong.
16 Tuhan, é! Lia ame sang beta,
deng kasi tunju Tuhan pung hati bae sang beta!
Te sonde ada orang laen yang bisa tolong sang beta,
waktu beta dapa susa deng sangsara bagini.
17 Beta pung susa dong talalu banya,
tamba hari tamba barát.
Jadi beta minta ko Tuhan kasi salamat sang beta,
deng angka kasi kaluar sang beta dari ini susa dong!
18 Lia ame beta pung susa deng sangsara dong,
deng inga beta pung hati yang talalu barát.
Lupa buang beta pung sala dong samua.
19 Lia beta pung musu bam-banya dong.
Te dong saki hati talalu sang beta,
deng binci mati sang beta ju.
20 Tuhan, jaga ame sang beta!
Tuhan, kasi salamat sang beta dolo!
Jang kasi tenga ko ini orang jahat dong bekin beta jadi malu,
te beta parcaya tarús bilang,
Tuhan ada jaga deng lindung sang beta.
21 Tuhan, é! Jaga sang beta,
ko biar sonde ada satu apa ju yang kaná sang beta.
Te beta ni, barisi deng jaga beta pung nama bae,
ais beta pung hati lurus ju.
Andia ko beta tunggu deng harap sa, ko Tuhan kasi salamat sang beta.
22 Tuhan, é! Tabús ame sang botong orang Israꞌel ni,
dari botong pung susa deng sangsara dong samua!