Tuhan tu, sama ke gambala yang bae
23
Lagu Puji ni, Daud yang karang.1 TUHAN tu, beta pung gambala yang piara ame sang beta.
Andia ko beta sonde kurang satu apa ju.
2 Dia foo bawa sang beta pi padang rumput,
ko biar beta bisa barenti cape di situ.
Dia antar bawa sang beta,
pi minum di mata aer yang tanáng.a
3 Dia kasi kuat sang beta,
deng kasi beta idop baru.
Dia kasi tunju sang beta jalan idop yang batúl,
tagal Dia tu gambala yang mau jaga Dia pung nama bae.
4 Biar lai beta ada jalan
di jurang yang paling galáp,b
ma beta sonde taku ame deng jahat apa-apa,
tagal Tuhan, Lu ada jalan sama-sama deng beta.c
Beta rasa aman,
tagal Tuhan ada pegang tongkat deng kayu kudung.
5 Tuhan bekin pesta kasi sang beta,
di beta pung musu dong pung muka,
ko biar dong dapa lia bilang,
Tuhan mau kasi tunju Dia pung hati bae sang beta.
Tuhan ju taro minya di beta pung kapala,
tagal Dia mau kasi tunju hormat sang beta
sama ke tuan ruma yang bae tarima tamu deng hormat.
Tuhan isi beta pung galás sampe ponu rata,
tagal Dia mau poꞌa berkat bam-banya kasi sang beta.
6 Beta parcaya bilang, Tuhan ada mau kasi tunju Dia pung hati bae sang beta,
deng mau kasi tunju Dia pung rasa kasian sang beta,
sapanjang beta idop di ini dunya.
Deng beta ju parcaya bilang, beta dapa tampa
dalam Tuhan pung ruma sandiri.
Deng bagitu, beta mau tenga di situ tarús-tarús.