Tuhan Allah kasi tunju diri di Dia pung ciptaꞌan deng dalam Dia pung Kata-kata
19
Pasán kasi orang yang pimpin lagu dong: Lagu Puji ni, Daud yang karang.2 Langit anteru
kasi tunju Tuhan Allah pung hebat.
Samua yang ada di sorga
kasi lia Dia pung hasil karjá.
3 Kalo kotong taliti bae-bae, na,
dari hari ke hari kotong dapa tau hal baru.
Dari malam pi malam kotong dapa katumu hal
yang kasi tunju Tuhan pung hebat.
4 Biar sonde ada yang baꞌomong,
sonde pake kata-kata,
deng sonde ada pung suara,
5 ma itu pasán tasiar pi anteru dunya,
sama ke ada yang kasi tau sang kotong,
deng itu kata-kata tasiar sampe di dunya pung huk-huk.a
Tuhan su ator tampa tenga di sorga kasi matahari.
6 Ais matahari nae papagi,
sama ke satu baroit laki-laki
yang kaluar dari tenda kawin.
Ju dia lari ukur kuat,
sama ke satu jago lari
yang talalu samangat.
7 Itu matahari nae dari langit pung ujung.
Ais dia iko tarús dia pung jalan
sampe di ujung sablá.
Sonde ada yang bisa sambunyi
dari dia pung panas.
8 TUHAN pung atoran dong, sampurna,
te dong bekin sagár orang pung hati.
TUHAN pung parenta dong, kotong bisa parcaya,
te dong bekin orang biasa-biasa dong jadi pintar.
9 TUHAN pung ajaran dong, batúl,
te dong bekin sanáng orang pung hati.
TUHAN pung parenta dong, jalás,
te dong kasi taráng orang pung jalan idop.
10 Kalo kotong taku sang TUHAN,
itu bekin barisi kotong pung hati,
deng dia pung guna maen jalan tarús-tarús.
TUHAN pung putusan dong, lurus,
te samua putusan tu, adil.
11 Tuhan pung Kata-kata dong pung harga, lebe mahal dari mas.
Dong pung nilei, lebe tinggi dari mas tulen.
Dong pung rasa, lebe manis dari madu.
Dong pung manis, lebe dari madu utan yang malele dari dia pung sarang.
12 Beta ni, Tuhan Allah pung orang karjá.
Deng Tuhan pung Kata-kata dong kasi inga beta,
ko jang langgar Tuhan pung atoran.
Dong ju kasi inga sang beta,
ko beta bekin iko tarús Tuhan pung ajaran.
Te nanti Tuhan mau balas kasi berkat bam-banya,
sang orang yang dengar-dengar sang Dia.
13 Sapa bisa tau dia pung sala dong samua?
Beta sandiri sonde bisa tau.
Andia ko beta minta ko
Tuhan hapus buang beta pung sala,
yang beta bekin deng sonde sadar.
14 Deng beta ju minta ko
Tuhan jaga sang beta,
ko biar beta jang bekin sala
yang beta ada kapingin mau bekin.
Jaga ko biar itu sala dong
jang ator bale sang beta.
Ko biar beta sonde ada pung sala,
deng beta barisi dari dosa.
15 Biar ko kata-kata yang kaluar dari beta pung mulu,
deng hal-hal yang beta pikir dalam beta pung hati,
samua bekin sanáng Tuhan pung hati.
Te TUHAN tu, sama ke satu batu bésar,
yang sonde tagoyang.
Deng Tuhan tu, yang kasi salamat sang beta,
deng tabús ame sang beta,
waktu beta sandiri sonde mampu.