Parcaya sang Tuhan sa!
4
Pasán kasi orang yang pimpin lagu dong: Lagu Puji ni, Daud yang karang. Pake alat musik dari sanár.2 Tuhan, é! Waktu beta pange minta tolong,
Tuhan manyao ame sang beta,
te Tuhan yang bilang beta sonde ada pung sala dalam ini parkara ni.
Waktu beta rasa susa deng sangsara,
Tuhan yang angka beta pung rasa barát,
ju kasi lapás sang beta.
Tuhan tolong kasi tunju Tuhan pung hati bae sang beta,
deng dengar beta pung sambayang ju.
3 Bosong orang bésar dong!
Barapa lama lai bosong mau bekin rusak beta pung nama bae?
Barapa lama lai bosong mau lempar sala yang sonde ada pung ujung-pohon?
Barapa lama lai bosong cari-cari hal,
deng karang-karang macam-macam?
4 Ma parcaya ini hal dolo!
TUHAN su pili ame orang yang parcaya sang Dia,
deng idop iko Dia pung mau.
Parcaya ju, bilang, waktu beta sambayang minta tolong sang Dia,
Dia mau dengar sang beta.
5 Kalo lu pung hati sonde tanáng,
na, jang kasi biar lu pung rasa mara ator sang lu sampe lu bekin sala.
Pikir ame ini hal dong waktu di atas koi,
ais tanáng-tanáng ko pareksa bae-bae lu pung hati sandiri.a
6 Ais, lu musti babae kambali deng TUHAN ju.
Andia ko lu musti kasi persembahan yang pantas sang Dia,
deng parcaya ame sang Dia.
7 Ada banya orang yang tanya bilang,
“Sapa yang mau kasi tunju yang bae sang kotong?”
TUHAN, é! Inga sang botong.
Taro mata di botong, ko biar botong bisa rasa Tuhan pung hati bae.
8 Tuhan yang bekin beta hati babunga.
Ais, itu rasa sanáng dari Tuhan lebe dari waktu beta dapa hasil panen limpa-limpa.
9 Beta tau beta bisa tidor sonu,
te beta aman deng tanáng;
tagal TUHAN sandiri sa yang jaga ame sang beta,
ko biar beta bisa idop aman deng tanáng.
Sonde ada laen lai yang bisa bekin bagitu.