2 Petrus
Nai' Petrus in surat no nuan ii
Tabe ma haan buseet
1
Surat re' ia na'ko au, nai' Simon Petrus kau.a Au 'jair Yesus Kristus In aan renu'-aan reka'. Au 'jair In haef amsa', re' In nreek haefan kau 'nao 'eu mee-mee he utoon anmatoom nok Ne.Au 'tui surat re' ia 'eu ki re' ampirsai mrair meu Yesus Kristus. Natuin Uisneno In neekn ee namneo ma namnoon, In nfei ranan he hi bisa mpirsai meu Kristus, on re' hai. Rais pirsait naan ma'oos re'uf neu kit ok-oke'. Kristus anjair hit Uisneno, ma In njair Tuaf es amsa' re' nsoi nafetin naan kit na'ko hit saant am penu sin.
2 Au 'toit he hi bisa mihiin mirek-reko' Uisneno, ma mihiin mirek-reko' hit Usi' Yesus. Maut he sin naruru' ma nakrira' Sin nekak arekot neu ki, he hi bisa mmoin nok mamut, rais rame', ma tainina'.
Uisneno npiir Iin na, rarit no'en naan sin he neman neu Ne
3 Nai' Yesus anmui' kuasa re' huma' mese' on re' Uisneno In kuasa. Es naan ate, Nai' Yesus anfee nrair kit are' kanan saa'-saa' re' hit tperluu, he tmoin tamneo ma tamnoon tatuin Uisneno In romin. In nmoe' on re' naan, natuin hit tahiin Je nok reko. Ma In es re' no'en naan kit he tjair Iin na, natuin In ro reko ma mapina'-makraha'. 4 Nai' Yesus anfee nrair are' kanan saa'-saa' re' pentiing neu kit. Fin unu' te, In nba'an anrair he nfee saa'-saa' ein naan. In rais manbaa'n ein reok re'uf. In nfee sin ok-oke' neu kit, he hit neek ii bisa njair on re' Uisneno In nekan. Ma hit bisa tapein fetin ta'ko rais maufinu re' mansian pah-pinan ia nroim he nmoo' je, natuin sin suma nmonin natuin sin roimk ein kuuk, ma ka ntahan naan fa sin tuak ein.
5 Es naan ate, au 'roim he hi mhaek ma'tani' he mmoe' rais reko.
Fin hi mpirsai mrair meu Nai' Yesus, mes naan ka nanokab fa fe'.
Ammeup rais reko piut.
Mihiin Uisneno reko nneisi ntein.
6 Mes kais suma mtea haa naan.
Minoni' he hi mbi moint ii in nanan hi mtahan maan hi tuam ein naan.
Mes naan ka nanokab fa fe'e msa'.
Ansuun oras hi mipein susat, hi ro he maran ma mtahan piut, kais amtet-koit.
Mes ammo'e nneis na'ko naan antein.
Ammoe' are' kanan rasi mituin Uisneno In romin.
7 Mes kais amtea naan ahaa.
Miruru' ma mikrira' manekat meu hi aok-bian apirsait ein.
Mes naan ka nanokab fa fe'.
Fin ambi moint ii in nanan hi ro he mmaneek piut.
8 Karu hi mmoin on naan ate, rais rekon re' ia na'baab ok anteni', naan anmoe' ki he mihiin mirek-reko' hit Usi' Yesus Kristus. Rais rekon re' ia, ka ruum am parsuum fa, ma ka nporin fa oras amsa'. Fin rais rekon re' ia nmoe' ki he mihiin mirek-reok' Ee. 9 Karu nmui' tuaf re' ka nroim fa he on naan, in natenab par-paar aah. In ka nkius fa saa' re' et in human ma in matan, on re' anfoor. Fin Uisneno nnoes nain tuaf naan in sanat ma penu sin, he in neekn ee bisa nakninu'. Mes tuaf naan annikan anrair.
10 Aok-bian manekat aar ki! Oras ia, hi ro mhaek ma'tani' mtein. Uisneno npiir naan ki he mjair Iin na, rarit hi iim meu Ne. Oras ia, hi ro he miruru' ma mikrira' mak, hi mtaam amjair In nonot-asar. Karu rasin ia re' au 'ait sin fe'e na na'baab ok piut anbi hi 'moinm ein, hi of ka mmouf main fa. 11 Nok ranan naan, Uisneno nroim he nfee ki rais jes re' ma'tain re'uf. Es re' In nfei ranan ma nfee ki hak he mtoup Yesus Kristus anjair hi Usif, he mmoin piut-piut mok Ne. Fin In re' naan hit Usi'. Ma In re' naan Tuaf re' nsoi nafetin naan kit na'ko hit sanat ma penu sin imsa'.
Nansaa' am es nai' Petrus antui on naan?
12 Hi mihini mrair rasin naan re' au 'ait ma 'teek sin fe'e na, ma hi maran ma mtahan ma'tani', natuin hi mpirsai saa' re' batuur. Maski on naan amsa', au he umnaub ufani' rasin re' ia 'eu ki fani-fani, maut he hi kais amnikan. 13 Au ka 'konan ki fa he hi mnikan. Au he umnaub ufani' ki, he hi bisa mitenab piut-piut rasin re' ia. Fin oras au 'moin fe' 'bi pah-pinan ia, pantas karu au umnaub ufani' ki rasin re' ia. 14 Ka 'roo fa te, au he 'maet jen. Hit Usi' Yesus Kristus natoon anrair kau on naan. Es naan ate au uhiin 'ain. 15 Maski au 'mate 'rair, mes au 'haek ma'tani' oras ia, he hi mimnau piut nok rasin re' ia.
Hit tkius ma tiit atrair Nai' Yesus In pinan ma krahan
16 Unu' te, au 'ok au partei nggwin mireta' mrair meu ki anmatoom nok hit Usi' Yesus Kristus. Hai mireta' amsa' am mak, oras In nkoen On anfain neem, In neem nok kuasa re' ma'tani'. Batuur, tua! Naan ka reet poi fa. Fin hai mireta' meu ki anmatoom nok saa' re' hai mkius ma miit kiim meik hai matam fuam ein kiim! Es naan ate hai mihiin Nai' Yesus In pinan ma krahan naan, on re' uis kou' gwes. 17-18 Neot es, hai mibua mok Nai' Yesus anbi Uisneno In a'to'ef akninu'. Onaim Aam Uisneno kuun es re' natoon anmatoom nok Nai' Yesus In pinan ma krahan. Fin oras naan, hai mneen haanf es, re' reok re'uf anpoi na'ko neon gwe mnak,
“In re' ia, Au Aan neka'.
In nhariin Au nekak.”b
19 Naan anmoe' kit tpirsai ttein anmatoom nok rasin re' hit ttoupu trair sin ta'ko mafefa kninu' Uisneno un-unu' sin. Onaim reko nneis hi mmoe' mituin sin haan manba'an! Fin sin haan manba'an naan nahuum on re' pauk gwes re' anpiin anbi baer meis'okan. Onaim hi ro he mneen ma mitniin sin haan manba'an naan tar antea Nai' Yesus ankoen On anfain neem. Nok ranan naan, hi bisa mihini mtein. Fin, naan on re' hi mkius faif noem je, na' hi mkius maans ee nsae he ntana' are' saa'-saa'.
20 Mimnau, fin Uisneno In mafefa kniun' ein natoon nain rasi mfaun. Mes sin haan manbaa'n ein ka natuin fa sin 'roimk ein kuuk.c 21 Natuin saa' re' sin ntui sin naan, ka na'uu ma na'baa' fa na'ko saa' re' sin nromin he na'uab sin. Mes naan na'uu ma na'baa' nbi Uisneno, natuin saa' re' In Asmaan Akninu' naruru' ma nakrira' sin.