Kabin ma Prenat re' neiki 'monif re' ia, anmui' nain na'ko oras pah-pinan ahun-hunut. Oras ia au, ma au partei nggwin amkius Gwe ma miit Ee nok hai maatm ein kiim. Hai mneen ma mitniin Ee nok hai ruikm ein kiim. Ma hai mreo' Gwe nok hai 'niim ein kiim. Hai mkius Gwe on re' naan,^a 2 natuin In nboor neem anbi hai sonam ma hai tnaanm ein. Unu' te, In natua nok In Amaf, mes oras ia In naruru' ma nakrira' In tuan ee neu kai. Nok ranan naan hai mibrain he mitoon meu ki on mee m'es mansian ii bisa napein monit re' namneo ma namnoon re' ka natfeek niit fa. Fin In re' naan, Kabin ma Prenat re' neiki 'monif.^b 3 Hai he mitoon ki, are' saa' ii re' hai mkius ma hai mneen amrair sin, he hi bisa mneka' mees mok kai. Fin hit ok-oke' tmafutu' trair tok Uisneno ma In Anah re' In nreek Ee neem, es re' Yesus Kristus. 4 Onaim hai mtui surat re' ia, he mharineb hi neekm ein. Nok ranan naan, hai neekm ein anmarinan ntein' ein.

5 Noni' re' Nai' Yesus natoon anrair sin neun kai, oras ia hai he mitoon sin meu ki, on nai: Uisneno naan, ro reok re'uf. In ka nmui' fa maufinu kre'o msa'. Fin In on re' me'u re' ntana', re' ka nmui' fa meis'okan a'kre'o msa'. 6 Karu hit ta'uab am tak, “Hit tmoin nekaf mese' tok Uisneno,” te kaah, hit fe'e tmoin tok 'moe' maufinu, naan on re' hit tmoni tbi meis'okan. Fin hit ta'uab puta-kriu gwah, ma ka tmoin fa tatuin ranan amneot. 7 Mes karu hit tmoin tatuin ranan amneot, hit on re' tuaf re' nmoni nbi Uisneno In me'u. Nok ranan naan, hit bisa tmoin nekaf mese' es nok es. Ma hit neek ii njari kninu', natuin Uisneno In Anah Nai' Yesus anmaet, ma In naa' ee nnoes nain hit sanat ma penu sin ok-oke'.

8 Karu hit ta'uab am tak, “Hit ka tmoe' fa sanat,” naan anjair tanar am nak, hit tapoi hit tuak ii kuuk, ma ka tahiin fa saa' re' batuur. 9 Mes karu hit tmanaku' hit sanat, Uisneno re' neek amneot ma amnonot, of anmoe' natuin In rais manba'an ma nnoes nain hit sanat ma penu sin, ma nakninu' hit nekak. 10 Karu hit ta'uab am tak, “Hit ka tmoe' tiit fa sanat,” naan hit tmoe' Uisneno njair aputa-kriut! Fin In na'uab anrari mnak, mansian ii ok-oke' nasaanb ein. Ma karu hit ta'uab on naan, ro batuur, In Kabin ma Prenat ka nmoin fa et hit nekak.