3 Au he utaah 'eu tuaf-tuaf re' nasaeb kau sanat, on nai: 4 Kais-kaisa' hi mitenab mak, au 'ok nai' Barnabas ka mmui' fa hak he mtoup bukaet mi'ko tuaf-tuaf re' hai minoni' sin. 5 Kais-kaisa' hi mitenab mak, hai ka mmui' fa hak he msao bifee Kristen, re' bisa nokan he ntuthae kai nbin bare bian. Te kaah, Uisneno In haef bian sin, nok sin feek ein. Nai' Yesus In oirf ein on naan amsa'. Nai' Petrus anmoe' kuun on naan amsa'!^a 6 Kais-kaisa' hi mitenab mak, suma au 'ok nai' Barnabas ammees jaah, es re' mmeup he maim roit, he hai bisa mmoin ma minoni' biak ein. 7 Hi teenb ein naan, in a'suikn ii saa'? Amkius kiim soraurs ein. Sin kais ansosan bukaet ma pake. Amkius kiim ameput anbi poo' anggur. Ka tiit fa es, re' antaar ee mnak, “Ho kais muah hau fua anggur sin!” Amkius kiim atuuks ein. In nmui' hak he naes susu na'ko 'bib-kasen re' in natuuk sin.

8 Au ka u'uab fa on naan, utuin au mansian biasa ia in teenb aa kuun. Fin Uisneno In Atoorn ein natoon rasi huma' mese' on re' naan amsa'. 9 Anbi ka'o Musa in Atoran matu'i mnak, “Oras bijae je anteir maka' he nbaits ee na'ko in asrakon, kais amfuut mi'temeb in fefan he in ka bisa naah fa.” Kais-kaisa' hi mitenab mak, Uisneno nroim he bijae je nmees bisa naah.^b 10-11 Kaah fa, tua! In na'uab nak he nkius kai msa'! Fin matu'i mnak, “Abanit afu ma tuaf re' nbetis maak ma'puni' na'ko srakon, oras sin nmepun sin nahinin nak, sin of napenin sin sapaak ein.” On naan amsa', reko nneis karu haef atoni' Kristen sin bisa ntoup sin sapaak ein, na'kon sin meupk ein sin aafk ein. Fin oras hai minoni' ki are' kanan rasi na'ko Uisneno In Asmanan, naan nahuum on re' atoin tani tuaf es anseen. Onaim oras hai minoni' mrair ki te, ka saa'-saa' fa karu hai mtoup bukaet ai' saa'-saa' mi'ko ki. Fin re' naan, ro pantas!^c 12 Tuaf sona' re' nanoni' ki, anmui' hak he ntoup bukaet ma bare' bian na'ko ki, ai'? Rarit, karu hai te, on mee? Hai hak ii anneis na'ko sin!

Mes hi mihini mrair. Hai ka mpaek miit fa hai hak he mi'tui' on naan. Hai maran ma mtahan ambi are' kanan rasi, he kais amtao ekat meu ki. Fin nok ranan naan, hi mroim he mneen ma mitniin Kristus In Rais Reko re' hai mireet Ee meu ki. 13 Mitenab miit! A'naak rais pirsait ein, re' antuthaen etan atoin Yahudis sin Uim Onen Uuf, sin nmonin na'kon fua'-turu' re' atoni' nataam sin. Ma tuaf re' antuthae nbi mei fuat, sin bisa nekun sisi na'ko mu'it re' tuaf nataam sin.^d 14 On naan amsa', Uisneno anba'an nak, tuaf re' nmeup he nanaob Rais Reko, sin bisa nmonin na'kon sin mepun naan in afan. Naan es re' batuur.^e

15 Maski au 'mui' hak he 'moin on re' naan, mes au ka 'roim fa he 'moe' on re' naan. Au ka 'tui fa surat ia, nok sarit 'ak he hi msonu' ma mfee kau bare'. Au 'tuthae ki 'roo gwen, ma ka 'toit 'iit fa saa'-saa' u'ko ki. Onaim reko nneis au 'maet, he atoni' kais natenab nak au 'murai 'toit ma 'toro'. 16 Maski au utoon atoni' piut anmatoom nok Uisneno In Rais Reko, mes naan ka njair fa 'sukif he au bisa u'uab be'o. Au ro he utoon 'eu tuaf anmatoom nok Uisneno, fin Uisneno es anreek kau on naan. Karu au ka 'moe' utuin fa au mepu on naan, au 'suus ma 'mei' 'iis ok! Fin au of upein hukun. 17 Karu au unaob mepu ia suma natuin au roimk ii kuuk, bare' re' au upein je naan, nahuum on re' ameput antoup in kai. Mes karu au unaob mepu ia natuin Uisneno anreek kau, naan a'teta'. Fin In npirsai kau, he 'panat In baer ma'osa'. 18 Onaim karu on naan, au upein upan ma pa'e saa'? Au ka 'perluu fa he 'toup kai! Au utoon Uisneno In Rais Reko, ma ka 'toit fa saa'-saa'. Naan es re' neik rais puas neu kau, tua. Ma rais puas naan, nahuum on re' au upein upan ma pa'e. Onaim au 'mui' hak amfaun on re' tuaf re' in meup gwe es re' natoon Rais Reko, mes au kuuk ka 'roim fa he 'paek are' au hak ein naan, tua.

19 Au re' ia, tuaf re' a'ator kuuk au tuak utuin au romik. Atoni' ka nmui' fa hak he nreun kau he 'meup ia, ai', 'meup nee. Maski on naan amsa', mes au 'moe' au tuak ii on re' ate, he tuaf-tuaf anmui' hak he nreun ma naprenat kau. Nok ranan naan, au bisa 'turun ma 'baab too mfaun antein he sin naran ma ntahan natuin Uisneno. 20 Onaim karu au ubua 'ok atoin Yahudis, au 'moe' au tuak ii on re' atoin Yahudis, he 'turun ma 'baab atoin Yahudis he sin nahiin Uisneno. Karu au ubua 'ok atoni' re' nnaa' naheran Uisneno In Atoran, au 'moe' utuin Uisneno In Atoran, he au bisa 'turun ma 'baab sin imsa' he nahiin Uisneno, (maski au uhiin 'ak, tmoe' tatuin Atoran naan ka bisa fa tareko tfain tok Uisneno). 21 Karu au ubua 'ok tuaf re' ka nahiin fa Uisneno In Atoran, au 'jair on re' sin, he 'eik sin antaam anjarin Uisneno Iin na. (Au ka ufetin 'ain fa Uisneno In Atoran re' In nasanut sin nanete npeo' ka'o Musa, mes oras ia au 'moni 'paek Kristus In Atoran.)^f 22 'Eu tuaf re' neekn ee n'oer, au 'moe' au tuak ii on re' au neek ii an'ore msa', he au bisa 'furi' sin he sin npaumaak Uisneno. 'Eu are' too mfaun ein, au 'moe' au tuak ii on re' sin, he on mee-on mee msa', au bisa 'turun he 'soi ufetin 'aan bian. 23 Au 'moe' are' rasin re' ia, maut he are' tuaf-tuaf bisa npirsai Uisneno In Rais Reko. Nok ranan naan, hit bisa tapein sapaaf anbi are' rais arekot re' Uisneno nroim he nfee sin neu kit.

24 Au 'fee 'tope' u'ko amnaenat. Tuaf namfau nok naenan, mes re' antaam nahuun gwi, mese'. Onaim hi aar ki ok-oke' ro he maen miheer, he mjair tuaf-tuaf ahunut meu Uisneno. 25 Are' amnokat anbi lomba ro he teb-tebe nmoe' natuin ahaa saa' re' in anoin ee natoon. Batuur, aa oo? Sin anmepun ma'tani' on naan, he suma napenin a'piru 'nakaf re' of namnene haa. Mes karu hit, hit tmeup he tapein upan ma pa'e re' ntahan tar antea nabar-baar. 26 Onaim au ka 'aen fa tafi'-tafi'. Mes au 'usaha ma'tani' he 'aen umneo gwah tar a'tea fenis. Karu tataib kau tok amatufus, au ka 'tuuf fa anin, mes au 'tuuf u'toom. 27 Au 'moe' are' saa'-saa' 'ok ma'tani', ma au 'ator au aok ii fani-fani he au bisa 'tahan piut. Fin ka reko fa karu au utoon 'eu tuaf bian anmatoom nok Uisneno, mes au kuuk a'tanhai atoran, rarit Uisneno napoin kau na'ko 'ba'et.