Rasi anmatoom nok mnahat re' anpaek sin he nfuan
(Carita Ulang soꞌal Jalan Idop 4:35,39; 6:4)
8
Oras ia au he u'uab anmatoom nok sisi re' atoni' npaek je he nfua. Hit aar kit tahiin rasi mfaun een, anmatoom nok rasin re' ia. In raisn ii, karu atoni' nahini mfaun, in bisa nabeo', fin in natenab nak in nahini nneis na'ko biak ein. Reko nneis, hit tmaneek-neek tok biak ein kuuk. Fin naan es re' anmoe' are' tuaf ein ok-oke' anjarin ma'tani' ma bisa ntahan a'roo.2 Karu anmui' tuaf naan in tuan ee nak, in ahinit anbi are' kanan rasi, naan nakrira' ma naruru' mnak, in mahinin naan ka namtiis fa fe'. 3 Mes karu anmui' tuaf re' nneek Uisneno, Uisneno nahini nrair je. Naan es re' pentiing.
4 Onaim karu atoni' nbukae sisi re' anpaek niit ee he nfua, hit aar kit tahiin tak, baer fuat ein anbin pah-pinan ia, ka Uisneno batuur fa. Fin hit tahiin tak, “Suma anmu'i haa Uisneno mese' es re' batuur.” ma “are' baer fuat ein re' atoni' na'besan neu sin, ka ma'osa' ma ma'ota' fa.” 5 Anmui' bare' mfaun et neon gwe tnanan ma pah-pinan re' atoni' anteek sin im nak, ‘usi'’.
6 Mes neu hit aar kit, Uisneno suma mees' aah.
In re' naan, hit Ama'.
Are' saa'-saa' ii na'uun ma na'ba'an na'ko Ne.
Hit tmoe' are' saa'-saa' ii teu Ne.
Ma hit Usi', suma mees' aah.
Es re', Yesus Kristus.
Uisneno npaek Nai' Yesus,
oras In nmoe' are' saa'-saa' ii.
Ma hit tmoin,
natuin Nai' Yesus es re' anfee kit a'monif.
7 Mes anmui' tuaf re' ka nahiin fa rasin naan. Sin fe' natenab piut-piut anmatoom nok baer fuat ein, nahuum on re' saa' re' sin natenab niit ee oras unu'. Etun ansuun oras sin nbukae sisi re' atoni' npaek je he nfua, sin natenab am nak, “Bukaet re' ia, anjari nrair fua'-turu' he nfuan! Karu au uah mnaaht ein re' ia, au fe'e mafuut 'ok rais maufinun!” Onaim rasi naan nareu' sin teenb ein, tar antea sin ka bisa fa he nateenb ein namnoon ma namneo ntein' ein, natuin sin neek ein an'oren ma nakrait ein. 8 In raisn ii saa'? Bukaet ii ka bisa neik kit fa he tbaiseun Uisneno, ai'? Karu ka tbukae fa te, hit ka tmaufiun fa. Ma karu tbukae te, ka nmoe' kit fa tjair atoin reko, ai'?
9 Mes ampaant om! Maski ho mmui' hak he mmoe' rasi piis es, rasi naan ka neu fa he njair reko neu ko. Karu anmui' ho aom-bian apirsait es, re' in neekn ee n'oer, karu in niit ko mmoe' mo'et naan, rarit in nastuun anbi naa te, naan ka reko fa! 10 Ho muhini mrair kuum, rasi pisa' naan, ka njair fa saa'-saa'. Mes karu aok-bian apirsait ein re' ao akrait ein ankius niit ko mtook ma mbukae mbi uim fuat, sin of nateenb ein saa'? In of natenab nak, tbukae mnaah fuat amsa' ka ntaam fa rasi neu ne ntein, maski sin npaek bukaet ein naan he nfuan. 11 Ho muhini mrair rasi mfaun. Mes karu ho mmoe' on naan, ho mureu' tuaf neek a'oert ein. Ma tuaf naan ho aom-bian apirsait. Kristus anmaet neu ne msa' ate! 12 Reko nneis mitenab on nai: karu ho mmoe' ho aom-bian re' neek ein an'oren he nmo'en rasi piis es, re' sin naan ee neu nsaan, ho es re' mmoe' sanat meu sin. Ma ho mmoe' sanat meu Kristus amsa'. 13 Onaim karu au uah amnahat re' anmoe' au aok-bian apirsait ein anmoufu nbin sanat, reko nneis au kais 'euk sisi ma 'uah amnahat human on re' naan. Maski tar antea nabar-baar amsa', kaisa', tua! Fin au ka 'roim fa he sin nmoufun nbin sanat.