Uisneno npiir naan atoin Israelas sin
9
Hit re' tmafuut tok Kristus, ta'uab ate namneo ma namnoon gwah. Onaim au ka upoi ki fa. Au nekak nanan ia msa' natoon am nak, Uisneno In Asmanan an'ator au nekak. 2-3 Au u'uab on nai: au neek ii nsuus. Au 'naben ate ma'fena' on naan, natuin au umnau au nggwin. Fin au 'roim he au uuf ma pah Yahudisa sin imsa' nmafutun nok Kristus, mes amfaun re' ka npirsai Je fa. Karu au bisa 'fei eno' ranan 'eu sin, au ubarab he 'toit Uisneno he nhukun kau, he au 'senu' ma 'seka' sin. Ma au ubarab he 'toti msa' he Uisneno nbatis kau u'ko Kristus, maut he au tuaf ein bisa nmafutun nok Ne. 4 Te kaah, sin re' naan atoin Israelas, es re' pah es, re' ma'upan anneis. Uisneno nait inrair sin anjarin In aanh ein na'ko unu'. In naruru' ma nakrira' In kuasa re' mapina'-makraha' neu sin. In nahake' rais manba'an huma'-huma' nok sin. In nfee In atoran neu sin. Sin es re' na'besan nahinin neun Uisneno, ma ntuthae Je. In nba'an he naruru' ma nakrira' In nekan arekot neu sin.b 5 Sin na'uun na'kon hit be'i-na'i sin, esan re': ka'o Abraham, ka'o Isak' ma ka'o Yakop (atoni' nait kanaf ‘Isra'el’ na'ko Yakop). Ma Kristus re' Uisneno nba'an nain Je na'ko unu' re' he nreek haefn Ee ntaam neem naan, na'uu na'ko hit pah Yahudis sin be'i-na'i sin. Kristus naan amsa', es re' Uisneno re' naprenat nain are' saa'-saa' ii ok-oke'. Onaim pantas karu atoni' naikas ma nboi's Ee tar antea nabar-baar. Batuur on naan, tua!c6 Maski atoin Israelas sin amfaun re' ka ntoup fa Kristus fa fe', mes atoni' ka bisa na'uab fa mnak, Uisneno In rais manba'an naan ka njair fa. Kais mak, mansian ii ok-oke' re' na'uu neman na'kon be'i-na'i Isra'el naan, anjair pah Isra'el re' Uisneno npiir je he njair Iin ja. 7 On re', too mfaun ii na'uu neman na'kon hit be'i-na'i, ka'o Abraham. Mes sin aar sin ok-oke' ka ka'o Abraham in sufan-kau'n ein fa re' Uisneno npiir sin. Fin Uisneno natoon anrair ka'o Abraham am nak, “Ho sufam-ka'um re' Au uhiin sin naan, suma esan re' na'uu neman na'kon ho anah nai' Isak.”d
8 In oetn ii nak, na'ko unu' tar antea oras ia, ka sufa'-ka'uf sin ok-oke' fa re' na'uu neman na'kon hit atoin Yahudis hit ka'o Abraham, re' njarin Uisneno In aanh ein. Suma sufa'-ka'uf re' na'ko Uisneno In rais manba'an neu ka'o Abraham anmees jah, Uisneno nsoi' je njair In aanh ein re' batuur. 9 Fin Uisneno nahake' rais manba'an nok ka'o Abraham am nak, “Toon amnemat, of Au 'fain 'uum. Oras naan, ho fee bi Sara' nahoni' naan ri'aan moen jes.”e
10 Ka on fa naan ahaa. Fin hit ka'o Isak nok in fee bi Ripka nahoni' naan ri'aan koena'. 11-12 Oras bi Ripka ka nahoni' naan sin fa fe', sin ka nmoe' nitan fa fe' rais reko, ai' rais maufinu. Maski on naan amsa', mes Uisneno natoon nain neu bi Ripka anmatoom nok ri'aan koen re' npoi nahunu mnak, “Taatf aan of anjair ameput neu in orif.” Uisneno natoon on naan, he naruru' ma nakrira' am nak, karu In npiir naan tuaf es, In nahini nrair nak, In he npaek tuaf naan nahuum on mee. Rarit Uisneno npiir ri'aan muni' naan he njair Iin ja. In ka nperluu fa he npao he nkius ri'aan muni' naan he nmoe' on mee, natuin Uisneno nahiin nain.f 13 Fin Uisneno na'uab anbi In Suur Akninu' anmatoom nok ri'aan koen naan am nak,
“Au 'piir ma 'betis 'aan kuuk nai' Yakop,
mes Au ka 'sium ma 'toup fa nai' Esau.”g
14 Onaim hit he ta'uab saa'? Of oni' nmui' tuaf na'uab am nak, “Uisneno nafeek rasi ka natai fa?” Kaah fa, tua! 15 Fin unu' fe'e te, Uisneno natoon neu ka'o Musa mnak,
“Au ururu' ma ukrira' Au rais kasian 'eu tuaf re' Au 'piir 'aan kuuk ee.
Au 'fee ma 'nona' Au manekat 'eu tuaf re' Au 'ruur ma 'reek 'aan kuuk ee.”h
16 Onaim tuaf naan ka nnaben fa Uisneno In rais kasian, natuin tuaf naan in roimn aa kuun, ai' natuin in a'moe'n aa kuun. Mes natuin Uisneno kuun es re' anroim he naruru' ma nakrira' In rais kasian ee neu tuaf naan. 17 Fin anbi Suur Akninu', Uisneno na'uab neu usif pah Masir am nak, “Au usaeb 'piru'-baru he ho mjair usif, natuin Au he 'paek ko he mururu' ma mukrira' Au kuasat meu too mfaun ein. Nok ranan naan, mansian ii ok-oke' re' nbin pah-pinan ia bisa naikas na'rat-ratan Au kanak.”i
18 Onaim karu Uisneno he naruru' ma nakrira' In rais kasian ee neu tuaf es, In nmoo' je gwen. Ma karu In nmoe' tuaf es in nekan he naheer on fatu, In nmoo' je gwen.j
Uisneno bisa naruru' ma nakrira' In rais kasian, mes In ka ntoup fa rais maufinu msa'
19 Karu nmui' tuaf es, re' nprotees kau mnak, “Karu on naan ate, karu Uisneno he nmoe' rais jes, sekau es re' bisa nraban? Ka tiit fa, ai'? Onaim nansaa' am es In he nasaeb sanat neu kit? Naan ka natai ma namneo fa, tua!”
20 Karu nmui' tuaf re' natenab on naan, au utaah am 'ak, on nai: “Ho mutenab, mak ho re' ia sekau! Ho he mu'uab amraban Uisneno, ai'?” Kais on naan, tua! Fin anbi Suur Akninu' Uisneno matu'i mnak, “Karu atoni' nmoe' baer es, ka bisa fa bare' naan nataan nafain' ee mnak, ‘Nansaa' am es ho mmoe' kau on re' ia?’”k 21 On re' amo'e 'na'i. Na'ko auf makri'it akboe's es, in nmui' hak he nmoe' 'huun arimat he atoni' nbo'is. In nmui' hak amsa' anpaek afu kbo'es naan he nmoe' baer porin makrafu', natuin in romin.
22 On naan amsa' Uisneno. In nmui' hak he nmoe' saa'-saa' natuin In romin. In he naruru' ma nakrira' neu mansian ein ok-oke' am nak, In natoo', ma ka ntoup fa 'moe' maufinu saa'-saa' re' atoni' nmoo' je. In nroim he atoni' nahini msa' mnak, In nmui' kuasat kou'-ko'u. Maut he atoni' nahiin on naan, he In naran ma ntahan In tuan nok 'moe' maufinu huma'-huma' re' atoni' nmoe' sin. Mes neu atoni' re' nmoe' maufinu, sin suma npa-paon sin oras he sin namre'un. 23 In nmoe' on naan, he naruru' ma nakrira' neu too mfaun ein am nak, In he naruru' ma nakrira' In rais kasian neu atoni' fauk aah. Sin re' naan, re' In npiir nain sin he ntuna' na'ratan sin. Ma In nroim he mansian ii nahinin nak, In kuun mapina'-makraha'. 24 Fin hit re' ia, re' In npiir nain kit he tjair Iin na. Hit re' ia, bian ta'ko atoin Yahudis, ma bian ta'ko pah bian antein. 25 Unu' te, Uisneno npaek In mafefa kninu' nai' Hosea, he ntui' nmatoom nok ka atoin Yahudis sin fa mnak,
“Anmui' tuaf re' unu' te, ka Au nggwin fa,
mes Au 'haman ma 'o'en sin am 'ak,
‘Hi re' naan, Au nggwin.’
Ma nmui' pah re' unu' te, Au ka 'neek sin fa,
mes Au 'haman ma 'o'en sin am 'ak,
‘Hi re' naan, pah re' Au 'neek.’”l
26 In imsa' ntui' mnak,
“Anbi naan,
nbi bare re' Uisneno natoon anrair sin im nak,
‘Hi re' naan, ka mjair fa Au nggwin!’
Of Uisneno Amonit nroim he natoon neu sin im nak,
‘Oras ia, hi mjair Au aanh ein!’”m
In na'uab on naan, natuin In kasian atoin ka Yahudis sin fa.
27 Mafefa kninu' bian es re' nai' Yesaya, nhunun ma nkoa' niit anmatoom nok pah Isra'el am nak,
“Maski atoin Israelas nabuan anjarin tuunb es,
on re' snaen et tais je ninin,
mes Uisneno of suma nsoi nafetin fauk aah,
na'ko sin sanat ma penu sin.
28 Fin In oras he neem,
he Uisneno nafeek rasi neu tuaf mese'-mese' re' nbin pah-pinan,
on re' In natoon nain.
Mes In ka npa-pao fa,
fin In nmoe' sin njair namtiis rabah!”n
29 Un-unu' te, nai' Yesaya natoon anmatoom nok atoin Yahudis sin im nak,
“Hit tapein upan ma pa'e,
natuin Uisneno Akuasat Anneis-neis,
ankonan he hit sufaf bian sin napenin a'monif.
Fin karu ka on fa naan ate,
hit tamneku trair,
on re' abitan kota Sodom ma kota Gomora sin.”o
Anmui' Rais Reko neu pah Isra'el re' ka nromin fa he natniin Uisneno
30 Hit he ta'uab saa'? Ta'uab tak, ka atoin Yahudis fa na'ko mee-mee, re' unu' te ka naim nitan fa ranan he naraem ok nok Uisneno, mes oras ia nmarame' nok Ne gwen, natuin sin npirsain neun Yesus Kristus. 31 Te kaah abitan Isra'el sin, sin nsoba' he nmoe' natuin ka'o Musa in atoran he sin bisa naraem ok nok Uisneno, mes ka njair niit fa msa'.
32-33 Nansaa' am es sin ka bisa fa he naraem ok nok Uisneno? Natuin sin suma nromin he nmo'en natuin atoran, maut he In ntoup sin on re' atoin neek amneot ma amnonot, mes sin ka npirsain fa neun Yesus Kristus. Rarit on re' sin nastunan nbi “fatu stuna'”. Rasi re' ia es re' Suur Akninu' Uisneno In sairt ii nak,
“Amkius iim ma mipeen iim fe'!
Fin Au 'tao 'rair Tuaf es
et a'to'ef Sion, et kota Yerusalem.
Tuaf naan on re' faut gwes
re' nmoe' tuaf nastuun.
Mes sekau re' npirsai Je te,
kais namaeb on.”
Fatu naan, es re' Nai' Yesus. Mes atoin Israelas sin antorak ma ka ntoup Gwe fa. Naan on re' sin nastunan, rarit sin ntaikobin natuin fatu naan.p