10
Aok-bian aar ki! Au he utenab saa' 'eu atoin Israelas sin? Au 'onen he sin nfeen mainuan neun Uisneno he In nsoi nafetin sin na'ko sin saant ein. Karu njair on naan, na' au 'mariin!2 Au bisa utoon anmatoom nok atoin ein ia sin a'moe'k ein: sin nmakoen he natuin Uisneno. Maski sin nmakoen on naan, mes sin ka nahiin fa ranan re' batuur. 3 Natuin sin ka nahinin fa raan a'honis re' batuur, re' nmoe' atoni' bisa nmarame' nok Uisneno, etun sin nasoin ein kuuk ranan he nsoba' he nareok ok nok Ne. Nok ranan naan, sin ka nromin fa he natniin Ee.
4 Karu tuaf suma nmoe' natuin ahaa atoran, he Uisneno ntoup gwe, naan ka nanokab fa. Etun Kristus nmoe' namtisib atoorn ein ok-oke', maut he hit bisa tmarame' tok Uisneno. Rarit oras ia, ansuun tuaf re' npirsain neun Kristus bisa nmarame' nok Uisneno.
Uisneno nroim he nsoi nafetin are' mansian ii na'ko sin sanat ma penu sin
5 Unu' te, ka'o Musa naruru' ma nakrira' nrair ranan anbi Suur Akninu', he tuaf bisa nmarame' nok Uisneno, asar sin nmo'en natuin Uisneno In Atoorn ein ok-oke'. In ntui mnak, “Tuaf re' nmoe' natuin Atoorn ein ok-oke', sin of napenin a'monit amneot ma amnonot.”a
6 Mes Suur Akninu' Uisneno naruru' ma nakrira' ranan bian amsa' am nak, tuaf bisa nmarame' nok Uisneno asar sin npirsain neun Kristus. Matu'i msa' am nak, “Kais mitaan am mak, ‘Sekau es re' bisa nsae neu sonaf neno tunan?’” (Naan on re' atoni' nsae natoon neu Kristus am nak, hit mansian ii troim he In ansaun he nsoi nafetin kit.) 7 Matu'i msa' anbi Suur Akninu' mnak, “Kais mitaan am nak, ‘Sekau es re' he nsaun neu koon ai abar-barat, anbi bare neu amaets ein?’” (Naan on re' atoni' nsaun he neik nafani' Kristus ansae na'ko In a'maten he nsoi nafetin kit.)
8 Kais on naan, tua! Fin anbi Suur Akninu' Uisneno matu'i msa' mnak, “Uisneno In beno et ho humam ma ho matam! Fin beno naan et ho fefam ma ho nekam.” Beno naan re' hit tatoon ee neu tuaf am tak, “Karu ho he mupeni 'honis, ho ro he mpirsai meu Kristus!”b 9 Karu ho mmanaku' mpaek ho fefam kuum am mak, “Yesus naan, au Usi',” ma ho mpirsai mbi ho nekam mak, Uisneno namonib nafani' Yesus Kristus na'ko In a'maten, es naan ate, Uisneno nsoi nafetin ko msa' na'ko ho sanat ma ho penu sin. 10 Fin karu ho mpaek ho nekam he mpirsai Kristus, Uisneno nmarak ko nak, atoin neek amneot ma amnonot re' nareko nfain nok Ne. Ma karu ho mpaek ho fefam mak, Nai' Yesus anjair ho Usi', Uisneno nroim he nafetin ko na'ko ho sanat ma ho penu sin kuasat. 11 Anbi Suur Akninu' matu'i mnak, “Atoni' re' npirsai Uisneno, of ka napein fa rais mae, fin Uisneno of he najarib are' saa'-saa' re' In na'uab anrair sin.”c 12 Atoin Yahudis ma ka Yahudis sin fa, huma' mese'. Ka nmui' fa suri. Fin suma nmu'i haa Usif mese', ma In njair Usif neu are' kanan pah ma 'pen-pene. In nroim he naruru' ma nakrira' In nekan arekot kou'-ko'u neu tuaf mese'-mese' re' he ntoot Je he In nturun ma nbaab sin. 13 Fin anbi Suur Akninu' matu'i mnak, “Are' mansian re' ntoit turun-babat na'ko Uisneno, In of ansoi nafetin sin na'ko sin sanat ma penu sin.”d
14 Mes on mee atoni' bisa ntoit turun-babat, karu atoni' ka npirsai fa tuaf es fa fe'? Ma on mee he sin bisa npirsai neun tuaf naan, karu sin ka nneen niit ee fa fe'? Ma on mee he sin bisa nneen niit ee, karu ka tiit fa tuaf natoon ee neu sin? 15 On mee tuaf bisa natoon neu sin, karu ka tiit fa tuaf anreek haefan sin he nnao natoon ee on naan? Anbi Suur Akninu' matu'i mnak, “Karu atoni' neem neik rais reko, sin amneemk ein naan, reok re'uf!”e
16 Mes hi mihini mrari mmak, anmui' atoin Israelas bian re' ka nromin fa he nneen ma natniin Uisneno In Rais Reko. Fin Uisneno In mafefa kninu' nai' Yesaya ntui mnak,
“Koi, Usi'!
Sin ka nromin fa he npirsain neun beno,
re' sin nneen ma natniin anrair je na'ko kai!”f
17 Onaim karu he mpirsai Uisneno, ro he mitniin In Kabin ma Prenat sin fe'. Karu he mneen ma mitniin Uisneno In beon gwe te, ro he mneen rasi nmatoom nok Kristus fe'.
18 Au he utaan 'iit, on nai: of oni' hi mitenab, mak, atoin Israelas sin ka nneen ma natniin niit fa anmatoom nok Kristus, ai'? Sin nnenan anrarin! On re' matu'i nbi Uisneno In Suur Akninu' na'ko unu' mnak,
“Mafefa kninu' Uisneno sin beno re' anmatoom nok Usi'
nasiin on ma nabeon on anfuun am nateef anbi pah-pinan;
Sin uabk ein naan,
antea nrair pah-pinan ia in pani-mpain.”g
19 Au he utaan a'tein rais jes am 'ak, “Atoin Israelas sin ka nahinin fa Uisneno In raan ee, oo?” Ka'o Musa, tuaf ahunut re' ntui rasi naan am nak, Uisneno natoon anrair atoin Israelas sin nak,
“Au he 'moe' rais jes,
neu uuf am pah bian sin.
Rasi naan of anmoe' ki ammasmeru'.
Ma Au he 'moe' rais jes amsa',
neu tuaf-tuaf re' hi maan ee amonot on re' ukum.
Rasi naan of anmoe' ki ammarau nisin.”h
20 Namuni te, ka'o Yesaya ntui maat-maat anmatoom nok ka atoin Yahudis fa mnak,
“Anmui' tuaf re' unu' te ka naim niit Kau fa,
mes sin nateef nok Kau gwen.
Anmui' tuaf re' unu' te ka natenab niit fa he nkius niit Kau,
mes Au ukriir Ok a'rair 'eu sin.”i
21 Mes anmatoom nok atoin Israelas sin, Uisneno na'uab anrari mnak,
“Fai-manas, Au 'fei ma 'pira' Au 'niimk ein,
he 'pao atoin Israelas sin he neman neu Kau.
Mes sin ka nromin fa he nneen ma natniin Kau,
ma sin nromin he nraban Kau msa'.”j