Hit bisa tmoin tamneo ma tamnoon, karu hit tmafuut tok Uisneno In Asmanan
8
Uisneno ka nhukun fa tuaf re' nmafuut nok Yesus Kristus! 2 Fin anmui' prenat nono' nua re' batuur: ahunut, es re' karu hit tmafuut tok Yesus Kristus, Uisneno In Asmanan nfee kuasa neu kit, he hit bisa tmoin tamneo ma tamnoon. No nuan ii, es re' nmui' maufinu et hit nekak re' nfuri' ma nkopo' kit he tmoe' sanat. Ma karu tmoe' sanat, Uisneno nmai'nisin kit, onaim In nkoit kit. Mes karu hit tapein Uisneno In Asmanan, In nsoi nafetin kit na'ko saant ii In kuasan.3 Maski hit tmoe' tatuin ka'o Musa in atoran, naan ka bisa nsoi nafetin kit fa na'ko saant ii in kuasan, fin hit suma mansian biasa gwah re' tmoe' sanat piut-piut. Mes Uisneno es re' anfei raan a'po'i. Fin In nreek haefan In Aanh aa kuun he njair mansian on re' hit. Maski hit mansian bian atmoe' sanat huma'-huma', mes Nai' Yesus kuun ka nmoe' niit fa sanat saa'-saa'. Saa' antein, In njair fua'-turu' he nsaok nain mansian ii na'ko sin sanat ma penu sin. 4 Uisneno nreek haefan Kristus he In nmaet, he hit bisa tmoe' tatuin rasi re' batuur ok-oke' tatuin Uisneno In Atoorn ein. Oras ia, hit tmoe' rais amneot ma amnonot tatuin Uisneno In Asmaan ee In romin, ma ka tmoe' tatuin fa hit roimk ii kuuk attein.
5 Atoni' re' nmoin natuin sin roimk ein kuuk, anmoin on re' naan natuin suma nateenb ahaa rais maufinu piut-piut. Mes tuaf re' nmoin natuin Uisneno In Asmaan ee In romin, sin suma nateenb ahaa rasi re' nmoe' Uisneno In Asmaan ee nmariin. 6 Atoni' re' nkonan rais maufiun ein he n'ator in neek tenab, on re' atoni' re' ka nneen nahiin fa Uisneno In Asmaan ee, es naan ate in neekn ee nmate nrair neu Uisneno. Mes tuaf re' nkonan Uisneno In Asmaan ee he n'ator in neek tenab naan, in a'monin naan namneo ma namnoon, ma in neekn ee ntainina'.
7 Hit mansian ii hit roimk ii kuuk es re' atraban Uisneno In romin. Rarit hit kuuk ka tbaiseun fa he tatniin Ee, natuin hit kuuk ka bisa fa. 8 Fin tuaf re' nkonan sin roimk ein kuuk he n'ator sin, reko ka reko, ka bisa nharineb fa Uisneno In nekan.
9 Mes hi kiim, tuaf re' ka mmoin maufinu fa mituin hi roim ein kiim amtein. Fin karu Uisneno In Asmaan ee nmoin et hi neekm ein, hi mmoe' rasi re' anharineb In nekan. (Mes karu nmui' tuaf re' Kristus In Asmaan ee ka nmoin fa nbi in nekan, in ka njair fa Uisneno Iin ja msa'.) 10 Hi aom ein of anmaten, natuin hi mmoe' sanat un-unu'. Mes natuin Kristus anmoni nbi hi neekm ein naan, hi smaanm ein of anmonin piut, natuin Uisneno nmarak anrair ki, atoin neek amneot ma amnonot, rarit hi mireko mfain mok Ne. 11 Fin Uisneno es re' namonib nafani' Usif Yesus na'ko In a'maten. Onaim maski hit tmaet, karu Uisneno In Asmaan ee nmoni nbi hit nekak, In of anmoe' kit atmoni tfani msa'. In oten nak, In namonib nafani' kit, on re' In namonib nafani' Kristus.a
Uisneno In Asmaan Akninu' natoon am nak, hit tjair Uisneno In aanh ein
12 Aok-bian aar ki! Hit tmui' tusa'. Naan ka tatuus fa he tmoin tatuin hit mansian ii in romin, mes tatuus he tmoin tatuin Uisneno In romin. 13 Fin karu hit tmoin tatuin maufinu re' et hit nekak, Uisneno ro nkoit kit, ma nhukun na'maet kit! Mes karu hit tkonan Uisneno In Asmaan ee re' nareu' kuasat na'ko sanat re' et hit nekak nanan, of na' hit bisa tmoin tok amneot ma amnonot tar antea nabar-baar.
14 Atoni' re' nroim he natniin Uisneno In Asmanan he n'ator sin, sin re' naan, Uisneno In aanh ein. 15 Karu hit tkonan Uisneno In Asmanan he n'ator kit, In ka nmoe' kit fa he tjair ate re' tmoni tbi mtaus. Unu' fe'e te, hit on re' naan. Mes natuin hit ttoupu trair Uisneno In Asmanan he n'ator kit, hit tahiin tak, hit tjari trair Uisneno In aanh ein. Es naan ate, In of anroim he natniin, karu hit thaman ma tkoa' Ee mtak, “Aam Honi'!”b
16 Hit neek ii kuuk es re' natoon nak, hit tjair Uisneno In aanh ein. Ma Uisneno In Asmanan natoon on naan amsa'. 17 Karu hit tjari trair Uisneno In aanh ein, in sairt ii nak, hit of attoup kuuk In pusaak, natuin In njair hit Ama'. Karu Ama' nnona' ma nfee pusaak neu In Anah, es re' Kristus, hit ttoup tok In pusaak naan amsa'. Mes anmu'i nteni' rais jes: hit ro he tapein susat ma nana'renat on re' Kristus napein susat ma nana'renat amsa', maut he Uisneno na'ratan kit, on re' In na'ratan Kristus.c
Uisneno of antuna' ma na'ratan kit
18 Mes natuin au teenb ii te, susat ma nana'renat re' hit tapein je oras ia ma'kaaf aah, karu hit tataib ee nok rais ma'tain ein re' Uisneno of naruru' ma nakrira' sin neun kit. 19 Te kaah, are' saa'-saa' re' Uisneno nmoe' sin nbin neon gwe tnanan ma nbin pah-pinan, anpaon ma namnaun, ma nromin he nitan In naruru' ma nakrira' nak, In aanh ein re' batuur ii, esan re' sekau. Fin In nroim he naruru' ma nakrira' In aanh ein re' batuur neu sin nok neek marine. 20 Fin Uisneno nmoe' neno tunan ma pah-pinan, ma in afan-neesn ein ok-oke', he natuin In sarit. Ka njair fa, ka natuin fa sin nroimk ein, mes natuin Uisneno In romin. Fin In nhukun sin ma nkonan sin he sin namre'un nkonon. Maski on naan amsa', mes anmui' rasi fnekan ma harap fe'.d 21 Fin oras ia, are' saa'-saa' re' Uisneno nmoe' sin naan, namre'un nrarin, ma ka tiit fa raan a'po'i. Mes Uisneno of nafetin sin, he sin kais namre'un ntein' ein, ma sin bisa npinan ma nakrahan natuin Uisneno In sarit. In ntuna' na'rat-ratan In aanh ein amsa', he sin napenin fetin na'kon rais amreu't ein.
22 Fin hit tahiin tak, anmui' susat ma nana'renat amfaun anbin pah-pinan ia. Na'ko unu' tar antea oras ia, are' saa'-saa' re' Uisneno nmoe' sin naan, nsakoin na'kon menas, oras anpaon he Uisneno na'fe'u sin. Naan on re' bifee ma'apu' re' nsakoi na'ko menas oras anpao he nahoni' naan ri'ana kru'uf. 23 Ka pah-pinan ia nmees jah fa re' npaon, mes hit tpao on re' naan amsa'. Maski Uisneno nfee In Asmaan ee nahuun neu kit, mes hit tsakoi tbi hit nekak amsa'. Fin hit tpao Uisneno he nait kit atjair In aanh ein, ma nafetin hit aok ii na'ko are' saa'-saa' re' namreu'.e
24 Oras Uisneno nsoi nafetin kit, In natoon amsa', In of anmoe' on mee. Mes oras ia, hit tpao fe', natuin ka njair fa fe'. Karu hit tkius rais jes anjari nrair, hit ka tperluu fa he tpao tteni' he tkius rasi naan. Fin atoni' ka npao nteni' fa he nkius rais jes re' njari nrair, ai'? 25 Mes karu hit tpao he tkius rais jes re' ka njair fa fe', hit bisa taran ma ttahan nok sabaar.
26 On naan amsa' oras hit tpao, Uisneno In Asmaan ee nturun ma nbaab kit amsa', natuin hit ka ta'bei' fa, ma ka t'onen tahiin fa nok batuur. Mes Uisneno In Asmaan ee an'onen ansenu' kit, maski hit suma tahini haa hunu, ma ka t'onen tahiin fa tpaek uab saa'. 27 Uisneno kuun nahiin are' saa'-saa' ii ok-oke' re' hit he ta'uab atbi hit nekak. In nahiin amsa' In Asmaan ee In tenab. Etun In nahiin are' raisn ein ok-oke' re' In Asmaan ee he na'uab he nturun kit. Fin Uisneno In Asmaan ee In tenab, on re' Uisneno kuun In tenab. Ma In Asmaan ee an'onen neu Uisneno, ntoit he Uisneno nturun ma nbaab atoin apirsait ein. Fin In Asmanan naan an'onen natuin Uisneno In romin.
28 Oras ia hit tahiin on nai: Uisneno nmoe' are' saa' ii oke' anjair reko neu tuaf re' anneek Ee. Fin na'ko un-unu' te, Uisneno n'ator nain anmatoom nok In he nmoe' on mee neu sin. Ma In nhaman ma no'en sin am nak, “Iim nai! Iim he mjair Au nggwin nai!” 29 Fin un-unu' te, In nahiin anrair sin, ma npiir naan sin he nmoe' sin on re' In Anah, es re' Kristus. Fin Kristus naan es re' Aan Unu ma re' bian ein anjarin In orif. 30 Tuaf ein re' Uisneno nahiin sin na'ko un-unu', In nhaman ma no'en sin amsa' he njair Iin na. Ma tuaf ein re' naan, re' unu' te sin asaant ein, In nmoe' sin anjarin atoin neek amneot ma amnonot re' nareko nfanin nok Ne. In naikas na'ratan sin amsa'.
Uisneno nneek niis kit
31 Hit he ta'uab tak saa' attein anmatoom nok rasin re' naan? Uisneno nhoo ma npaumaak kit mates. Onaim karu on naan ate, sekau es re' he nraban kit attein? Ka tiit fa, ai'? 32 Uisneno ka natau fa In Aanh aa kuun. Mes In nnona' ma nfee In Anah naan he nmate njair fua'-turu', he nturun ma nbaab kit ok-oke'. Natuin Uisneno ka natau fa In Anah naan akre'o msa', hit bisa tahiin tak, In of anfee neu kit are' rais reko nok ruum am parsuum. Batuur, ai'?
33 Of oni' hi mitenab mak, anmui' tuaf re' bisa nasaeb sanat neu tuaf re' Uisneno npiir naan sin. Mes ka tiit fa, ai'? Fin Uisneno kuun es re' nmarak kit nak, atoni' neek amneot ma amnonot re' ka nmui' fa sanat antein, he hit tareko tfain tok Ne.
34 Of oni' hi mitenab mak, anmui' tuaf re' bisa nak Uisneno ro he nfee hukun neu tuaf re' In npiir naan sin. Mes kaah fa, ai'? Fin Yesus Kristus anmaten nrair. Anneis-neisi ntein, Uisneno namonib nafain' Ee na'ko In a'maten. Rarit Uisneno nait Je ma natook Ee nbi bare re' mahormata' nbi In aon-bian a'ne'u. Anbi bare naan In es re' n'onen piut-piut ma nteek kit amsa'.
35 Of oni' hi mitenab mak, anmui' tuaf ai', anmui' rasi re' bisa na'seke' Kristus tar antea In ka nneek antein kit fa heen, ai'? Ka neu fa, tua! Fin maski hit tmui' rasi ai' susat, ai' nana'renat, ai' ka tiit fa mnahat, ai' ka tiit fa pake-nohas, ai' nmui' siraak, ai' tuaf he nroor kit, mes Kristus anneek kit piut. Ka tiit tain fa saa' es, re' bisa nmoo' Je he In kais anneek kit! 36 Anbi Suur Akninu' Uisneno matu'i mnak,
“Atoni' naim ranan he nisan nain ma na'maet kit,
natuin hit tjair Uisneno Iin na.
Sin nmoe' ma ntao kit,
on re' 'bib-kase re' sin he nroro.”f
37 Onaim maski hit tapein susat on mee msa', mes hit tiis atrair, natuin Kristus anneek niis kit!
38 Au uhiin batuur-batuur 'ak on nai: ka tiit fa rais jes amsa' re' bisa nmoe' Uisneno he nasnasab In manekan neu kit. Maski hit tmoin, ai' tmaet, ai' nmui' ameput na'ko sonaf neno tunan, ai' anaa' aprenat, ai' nmui' kuasat, ai' rasi oras ia, ai' rasi re' amnemat, 39 kuasa nbi neon gwe tnanan, ai' kuasa nbi pah-pinan, ai' bare' 'teta' re' Uisneno nmoe' sin — ka tiit tain fa saa' es, re' bisa nbatis kit na'ko Uisneno, re' anmoo' Je he In ka nneek kit fa gwen! Natuin hit tmafuut tok hit Usi' Yesus Kristus, re' Uisneno anreek haef anrair Je ntaam neem.