2 Au 'pake 'tope' na'ko atoran fee-mone. Karu bifee jes ansao nrair atoin es, tatuin atoran, sin nua sin anjarin fee-mone tar antea sin nmaten. Mes karu in moen je nmaet, bifee banu' naan ka nmafuut fa gwen nok atoran naan. In bisa nsao ntein. 3 Mes karu in ansao atoni' 'teta' oras in moen je nmoin fe', tatuin atoorn ii, naan in nmakake nrair. Mes karu in moen je nmate nrair, atoran fee-mone ka ntoom ee fa gwen antein. In napeni nrair fetin. Rarit karu in ansao ntein atoni' 'teta', tatuin atoorn ii, in ka nmakaek fa, tua.

4 On naan amsa' hi atoin apirsait! On nai: Kristus anmate nrair. Naan on re' hi mmaet bu'-bua' mok Ne, ma misaitan hi 'monit amnaa'. Rarit atoorn ii ka ntoom ki fa gwen antein. Oras ia, hi mipein fetin mi'ko atoran naan, ma mmafuut gwen mok Kristus, re' nmoni nfain na'ko In a'maten. Naan on re' bifee banu' re' ansao ntein. Ka tiit fa rasi. Onaim oras ia, saa' ii ok-oke' re' hi mmoo' je naan meu Uisneno.

5 Unu' te, hit suma tmoe' tatuin aah hit tuak ii in romin. Natuin hit tahiin atoran, naan anmoe' kit he troim he ttanhai atoorn ein naan, he tmoe' rasi re' ka batuur fa. Hit saant ein naan esan re' nmoe' Uisneno nkoit kit. 6 Unu' te, hit ro he tmoe' tatuin atoran. Mes oras ia atoorn ii ka ntoom antein kit fa gwen, fin hit tafetin atrair hit i'monik amnaa'. Tatuin raan amnaa' ii in romin, ka'o Musa in atoran re' matu'i et Suur Akninu' anfuut kit. Mes tatuin raan feu' gwi in romin, hit tapein fetin ta'ko atoran naan. Fin Uisneno In Asmaan Akninu' es re' an'ator kit! Etun oras ia, hit tmeup teu Uisneno nmees.

7 Hit he ta'uab tak saa'? Of oni' hi mitenab am mak, “Atoran re' Uisneno nfee je neu ka'o Musa naan, ansaan!” Kaah fa, tua! Fin karu au ka uhiin fa atoran naan, ka neu fa he au uhiin rasi re' ka namneo ma namnoon fa anbin au nekak. On re' anmui' atoran nak, “Kais amroim he mait atoni' in baer' ein.” Mes nansaa' am es au bisa uhiin rasi on re' naan ansaan, karu au ka uhiin fa nak, anmui' in atoran? Ka bisa fa, tua!^a 8 Mes natuin anmui' atoran nak on re' naan, naan on re' rais maufinu nbin au nekak anmoe' kau he 'roim he 'ait atoni' in bare' huma'-huma'. Karu ka nmui' fa atoran re' antaar, saant ii ka nmui' fa kuasa he n'ator atoni'.

9 Anbi au 'monik amnaa', au ka uhiin ureko' fa sarit na'ko Uisneno In Atoran. A'roo-'roo te, na' au uhiin batuur. Etun au ukeo ma uskeek 'ak, au 'tanhai 'rair Atoran naan ma 'mo'e 'saan. Ma saant ii in upan ma pa'e, es re' au ro he 'maet. 10 Rarit au neek ii krati'-krati', fin au uhiin 'ak, au kuuk ka bisa uraem ok fa 'ok Uisneno nok suma 'moe' utuin In Atoran. Au pantas upein Uisneno In to'os, es re' nhukun na'maet kau, natuin au 'tanhai In Atoran. Te kaah, anmui' Atoran he nmoe' tuaf bisa nmoin batuur. Mes na'ko au te, Atoran naan es re' nareu' kau he Uisneno nkoit kau. 11 Atoran naan naruru' ma nakrira' raan a'monit re' batuur. Mes natuin anmui' maufinu re' nmoin et au nekak, au upoi 'aan au tuak ii, ma utenab 'ak, au bisa ureok ok 'ok Uisneno asar au 'moe' utuin In Atoran. Rarit on re' Atoran naan es re' anmoe' tar antea Uisneno nmai'nisin kau, ma ka nroim fa he nkua'noon nok kau.^b

12 Onaim karu fe'e na atoni' nak, “Atoran re' Uisneno nfee je neu ka'o Musa naan, ansaan” au utaah am 'ak, “Kaah fa, tua! Uisneno In Atoran naan, kninu'!” Ma preent ii ok-oke' nbin Atoran naan, kninu', batuur, ma reko.

13 Of oni' hi mitenab amsa' mak, Atoran naan es re' anmoe' Uisneno nkoit kau. Kaah fa, tua! Fin maski au uhiin Atoran naan, mes au 'neen kuuk piut-piut maufiunt aan 'bi au nekak fe', tar antea au 'moe' sanat. Au 'moe' sanat naan es re' nmoe' Uisneno nkoit kau. Atoorn ii nmees kuun ro reko, fin naan naruru' ma nakrira' rais maufinu re' nmoe' kit tbaits ok ta'ko Uisneno. Onaim oras Uisneno naruru' ma nakrira' ranan a'monit re' batuur, Atoran naan es re' natoon am nak, rais maufinu re' anbi hit nekak naan, ro ka reko fa, tua.

14 Hit tahiin tak, Atoran re' Uisneno nfee je neu ka'o Musa, nsaun neem na'ko Uisneno In Asmanan. Mes au suma mansian biasa re' neek a'oret. Rarit au 'neen rais maufinu re' et au nekak re'uf, tar antea au 'moe' sanat. Naan on re' saant ii njair au usif, ma au 'jair saant ii in ate. 15 Au 'keuk. Au ka uhiin fa saa' re' au 'moo' je. Fin au ka 'moe' utuin fa saa' re' au he 'moo' je. Mes au 'moe' utuin saa' re' au ka 'roim fa he 'moo' je.^c 16 Karu au 'moe' utuin saa' re' au ka 'roim fa he 'moo' je, au 'manaku' 'ak, Uisneno In Atoran naan, ro batuur. 17 Onaim au ka es re' a'ator fa au tuak. Mes maufinu re' nmoin et au nekak es re' an'ator au tuak!

18 Au uhini 'rair 'ak, ka nmui' fa rais reko re' nmoin et au nekak. Fin au re' ia, mansian re' neek re'uf. Reko ka reko, au ka bisa u'seke' fa au tuak ii he 'moe' rais amneot ma amnonot. Au 'roim, mes ka njair fa, tua! 19 Fin au 'roim he 'moe' rais reko, mes au ka 'moo' je fa. Ma au ka 'roim fa he 'moe' rais maufinu, mes au 'moe' kuuk ee! 20 Karu au 'moe' utuin saa' re' au ka 'roim fa he 'moo' je, naan ka natuin fa au tuak ii kuuk, mes natuin maufinu re' nmoin et au nekak.

21 Naan naruru' ma nakrira' preent es, on nai: maski au he 'moe' rais reko, mes anmui' maufinu et au neek ii re' nraban. 22 Te kaah, au neek ii nmariin karu au utenab anmatoom nok Uisneno In Atoran. 23 Mes on re' nmui' kuasat anbi au nekak re' nareu' kau. Fin au 'roim he 'moe' rais reko, mes ka njair fa. Naan on re' maufinu in kuasa anbi au nekak anheek naan kau, he na'seke' kau he utuin ee. 24 Airoo! Au atoin asusat kau! Sekau es re' bisa nsoi nafetin kau na'ko maufiun gwi in kuasan re' nmoin et au nekak, ma nmoe' Uisneno nmai'nisin kau tar antea In nkoit kau?

25 Mes Uisneno kuun neikn On anfei nrair ranan he nafetin kau! Makasi kou'-ko'u neu Ne, natuin hit Usi' Yesus Kristus bisa nsoi nafetin kau! Onaim karu au ufnekan ma 'harap a'bi au tuak, au 'suus. Maski au 'roim he 'moe' utuin Uisneno In Atoorn ein ok-oke', mes anmui' kuasat anbi au nekak re' nfuri' ma nkopo' kau he 'moe' sanat piut.