Hit ro he tasaitan hit sanat, he tmoin tatuin Uisneno In romin
6
Onaim oras ia, he ta'uab saa'? Oni' hi mitenab am mak, “Uisneno annikan nain hi sanat ma penu sin, natuin In neekn ee reko. Etun reko nneis hit tmo'e tsaan piut, maut he Uisneno naruru' ma nakrira' In nekan arekot anneis-neis neu kit.” 2 Kais on naan, tua! Ka pantas fa karu hit tmo'e tsaan piut, fin hit tafeek tak, hit tkoit tasaitan hit sanat ma penu sin. Natuin hit ka tmafuut fa heen tok maufinu ntein, re' naan on re' hit tmate trair jen! Fin tuaf re' nmate nrair ka bisa nmo'e nsaan antein fa. Batuur, ai' kaah? Karu hit tmaet on naan, on mee m'es hit bisa tmoin he tmoe' sanat antein? Ka bisa fa, joo!3 Oni' hi ka mihiin fa mmak, oras nasrain kit, naan anjair tanar nak, hit tasaitan 'monit amnaa' he tjair atoin fe'u, es re' tmafuut tok Yesus Kristus. Naan on re' hit tmaet tabua tok Ne. 4 Oras Kristus anmaet, sin ansuub Ee. Oras nasrani nrair kit, naan on re' hit imsa' tmaet tasaitan 'monit amnaa', rarit sin ansuub kit. Aam Uisneno npaek In kuasan re' mapina'-makraha' he namonib nafani' Kristus na'ko In a'maten. Aam Uisneno nroim he hit ttoup In kuasan amsa', he tmoni tfani tjair atoin fe'u.a
5 Naan on re' hit tmaet tabua tok Nai' Yesus. Onaim hit re' tmafuut tok Ne, hit of atmoni tfain ta'ko hit i'matek, on re' In nmoni nfain.
6 Unu' te', hit tjair atoni' re' tmo'e tsaan huma'-huma'. Mes hit 'monik amnaa' naan namre'u nrair, on re' sin nkuus na'peti' kit tok Kristus tabua tbi hau nehe. Oras ia, maufinu re' nbi hit nekak ka nmui' fa kuasat he n'ator kit antein. Oras ia, hit ka tmafuut fa heen he tmoe' sanat antein. Fin hit ka on fa ate re' ka nmui' fa hak he npiir nak he nmoe' saa'. 7 Karu atoni' nmate nrair, in nafrei. Ka tiit fa es he bisa na'seek ee he nmoe' sanat antein.
8 Onaim natuin rasi naan on re' hit tmate trair tabua tok Kristus, hit tpirsai tak, hit of atmoin piut tok Ne msa'. 9 Hit tahiin tak, natuin Kristus anmoni nfain na'ko In a'maten, In ka nmate ntein fa gwen. Fin ka tiit fa saa' es antein re' nmui' kuasa he nmoo' Je he nmaet. 10 Unu' te' In anmaet no mees' aah, he nfaki nporin saant ii in kuasan. Mes oras ia, In anmoin he naruru' ma nakrira' hormaat neu Uisneno.
11 Hi ro he maan hi tuam ein on re' naan. On re' hi mmate mrair, es naan ate saant ii ka nmui' fa kuasa neu ki ntein. Onaim oras ia, hi ro he mmoin he miruru' ma mikrira' hormaat meu Uisneno, natuin hi mmafuut mok Yesus Kristus.
12 Kais amkonan maufiun nggui nbi ho nekam anmui' kuasa he bisa n'ator ko, he ho suma mutuin ahaa ho aom aan in nromin, he mmoe' maufiun ein. Fin ro tebes, ho aom aan of ammaet. 13 Ma kais amnona' ho tuam aan he mmoe' rais reu'f ein re' naan, fin re' naan ansaan amsa'. Mes amnona' ho tuam aan meu Uisneno nmees, he In es an'ator ko. On re' ho mmate mrair, rarit ho mmoni mfain. Onaim ampaek ho tuam aan a'teme-'teme he mmoe' rais reko meu Uisneno. 14 Kais amkonan he saant ii bisa n'ator ki, on re' saant ii njair hi usif. Oras ia, hi kais ammoin mituin ka'o Musa in atoorn ein antein, he hi mireko mfain mok Uisneno. Fin hi mmoin mok amneot natuin Uisneno naruru' ma nakrira' In nekan arekot neu ki. Onaim oras ia, In nekan arekot naan es re' an'ator ki.
Hit tjair on re' ate re' tmeup tatuin Uisneno In romin
15 On mee? Of oni' hi mitenab mak, “Natuin hit kaisa' tmoin tatuin ka'o Musa in atoorn ein antein, he tareko tfain tok Uisneno, maski hit tmoe' sanat piut aah. Fin Uisneno nroim he naruru' ma nakrira' In nekan arekot neu kit!” Hi mitenab on naan. Batuur, ai' kaah? Au utoon ki he! Naan ansaan!
16 Au 'pake 'tope' na'ko usif ma ate. Karu hi mnona' hi tuam ein naan he mmeup meu tuaf es, hi ro he mneen am mitniin ee, ma mmeup mituin in romin. Fin in re' naan, hi usif. Ma hi re' naan in ate. On naan amsa', hi bisa mpiir he mituin meu mee. Hi bisa mpiir he mmoe' sanat, rarit hi mjair saant ii in ate. Mes karu hi mpiir on re' naan, hi mmoe' hi tuam ein he mbaits om mok Uisneno. Hi bisa mpiir he mmoe' rais reko, ma mjair ate re' mmoe' mituin saa' re' Uisneno nreun ma nreek neu ki. Karu hi mpiir on re' naan, hi bisa mireko mfain mok Ne!
17 Unu' te, hi mkonan saant ii he n'ator ki, mes oras ia, hi mneen am mitniin hi neekm ein, he mmoe' mituin saa' re' atoin asraint ein nanoni' ki sin. Etun au 'toit makasi 'eu Uisneno. 18 Fin Uisneno nsoi nafetin ki na'ko saant ii in kuasan, tar antea saant ii ka n'ator antein ki fa gwen. Onaim oras ia, rasi re' amneot ma amnonot es re' n'ator ki.
19 Au u'uab ia, a'pake 'tope' neno-neno na'ko usif ma ate, he hi mihiin au sairt ii rabah. Unu' te, hi mnona' hi tuam ein amjair ate he mmoe' sanat, re' neik ki he n'oemetab hi tuam ein, mituin ka'o Musa in Atoran. Mes oras ia, hi ro mnona' hi tuam ein amjair ate he suma mmoin he mmoe' rais amneot ma amnoont aah, re' neik ki mbi Uisneno In human ma In matan amjari kninu'.
20 Unu' te, oras hi suma mneen am mitniin ma mmoe' mituin saant ii in romin, hi kais mitniin ma mmoe' mituin rais amneot ma amnonot. 21 Au he utaan on nai: hi mipein upan arekot saa' na'ko hi 'moe' amreu't ein naan? Ka tiit fa, ai'? Te kaah, upan re' hi mipein je naan, namaeb ahaa ki. Natuin hi mmo'e msaan on re' naan, in amsoupn ii, Uisneno nkoit ki.
22 Mes oras ia, Uisneno nafetin ki na'ko usif amnaa', onaim hi kaisa' mmoe' sanat amtein. Oras ia hi ro he mjair Uisneno In ameupt ein. In amsoupn ii, hi mjari kninu' meu Ne, ma mipein 'monit batuur re' ka natfeek niit fa. 23 Fin oras hit tmo'e tsaan, in upan es re' Uisneno nkoit kit tar antea nabar-baar. Hit tmaet nai! Mes Uisneno nabarab anrair raan a'po'i neu kit. Fin In he nfee neu kit 'monit batuur re' ka natfeek niit fa nok ruum am parsuum aah. Ma hit tapein 'monit, karu hit ttaam atjair hit Usi' Yesus Kristus Iin na.