Atoni' bisa nareko nfain nok Uisneno asar anpirsai neu Yesus Kristus
5
Onaim natuin hit tpirsai teu Uisneno, es naan ate In nmarak kit atjair atoin neek amneot ma amnonot. Rarit hit neek ii nakninu' nrair neu Uisneno, natuin hit Usi' Yesus Kristus, re' Uisneno nreek haefn Ee ntaam neem, anfei ranan he hit bisa tmarame' on naan. 2 Kristus naruru' ma nakrira' In nekan arekot neu kit, natuin hit tpirsai Je. Etun hit neek ii bisa nma'tain ma na'bei'. Ma hit neek ii anmariin, natuin hit tahiin tak, Uisneno of he nait kit he hit tnaben tok In pinan ma In akrahan.3 Maski hit tapein susat ma ma'ne'at huma'-huma', mes hit neek ii nmariin piut. Fin hit tahiin tak, hit tanoni' ta'ko susat ma ma'ne'at, he bisa taran ma ttahan ma'tani' tneisi ttein. 4 Karu hit taran ma ttahan atbi susat ma ma'ne'at, naan anmoe' kit ka tmouf fa, ma hit i'moink ii nharineb Uisneno In nekan. Karu hit tmoin reko nneis on naan, naan anmoe' hit rais pirsait naheer anneis nak, Uisneno of naruru' ma nakrira' In nekan arekot neu kit. 5 Karu hit tpirsait ii na'kii' ma naheer antein, hit ka tamaeb ok fa. Fin Uisneno nfee kit In Asmaan Akninu', he hit bisa tahiin atbi hit nekak nanan tak, In neek kit ma'tani'.
6 In naruru' ma nakrira' In manekan on nai: oras hit ka bisa tareok ok fa fe' tok Uisneno, te kaah, In nreek haefan Kristus he nmaet neu kit re' tmoni te ka tfairoir fa Uisneno. Uisneno npiir naan oras re' nateef on naan. 7 Mitenab mirek-reko' fe'! Fin ka biasa fa nmui' tuaf re' nroim he nmate nsenu' ma nseka' in aon-bian re' neek amneot. Of oni' nmui' tuaf bian re' nroim he nmaet he nturun ma nbaab tuaf re' neek reko. 8 Mes Uisneno naruru' ma nakrira' In nekan arekot anneis-neis neu kit. Natuin oras hit tmo'e tsaan fe'e te, Kristus anmaet neu kit.
9 Uisneno nmarak kit atoin neek amneot re' tareko tfain tok Ne, natuin Kristus nat'opab ma nasaib In naa' he nmaet neu kit. Te kaah, karu tuaf anmo'e nsaan, Uisneno natoo'. Mes natuin Kristus anmoe' on naan, hit re' atmo'e tsaan ka tapein fa hukun attein.
10 Unu' te, hit mamuus tok Uisneno. Mes Uisneno In Aanh aa kuun es re' anmaet he nhainiik ma n'oeteneb Uisneno In nekan, maut he hit bisa tmarame' tok Uisneno. Onaim oras ia, hit ka tmamuus fa heen, mes tmarekob atfain. Anneis-neisi ntein, natuin Kristus anmoni nfain, anbi neon amsoput of In nsoi nafetin kit he hit kais tapein Uisneno In hukun attein. 11 Ka neu fa he on naan ahaa! Hit neek ii bisa nmariin am nak, “Uisneno naan, mapina' ma makraha'!” natuin hit tmafuut tok Ne. Hit bisa tjair In tuaf ein, natuin hit Usi' Yesus Kristus, anmaet neu kit, he nmoe' kit tmarame' tok Uisneno.
Tataib nai' Adam nok Kristus te, anmui' in amnesan ma suri
12 Na'ko unu', mansian ahunut, es re' ka'o Adam re' nmurai nmo'e nsaan. Etun Uisneno ka nkoon ee fa he nmoin piut. Rarit anmurai na'ko oras naan, mansian ii ok-oke' nbi pah-pinan ia nmo'e nsanan on re' in imsa'. Natuin sin nmo'e nsanan on re' in, sin ok-oke' ro he nmaten on re' in imsa'.a 13 Un-unu' te, oras Uisneno ka nasanut In Atoorn ein fa fe', atoni' nmo'e nsanan nbin pah-pinan ia 'teme-'teme. Mes natuin ka nmui' fa Atoran fa fe', es ka nmui' fa aso'it neu tuaf ein sin sanat ma penu sin. 14 Na'ko ka'o Adam, tar antea ka'o Musa ntoup Uisneno In Atoran, mansian ii ok-oke' ro tebes, anmaet. Maski sin ka ntanhain fa Uisneno In aprenat re' In nfee je neu ka'o Adam, mes sin nmo'en sanat huma'-huma' bian fe'. Etun sin ro he nmaten on re' ka'o Adam.
Karu hit tataib ka'o Adam nok Usif Yesus, anmui' in amnesan, ma nmui' in suri. Fin ka'o Adam gambar mese' re' naruru' ma nakrira' msa' Nai' Yesus In human, re' he neem. 15 Mes ka'o Adam anmo'e nsaan, ka huma' mese' fa on re' Nai' Yesus anmoe' reko neu kit. Natuin tuaf es, es re' ka'o Adam, antanhai Uisneno In aprenat. Es naan ate, are' mansian ii ok-oke' ro he nmaten. Mes Tuaf es antein, es re' Yesus Kristus, anmoe' rais reko mfaun neu kit, ma ka nafnekan ma nharap fa he atoni' nbaras In a'moe' rekon naan. Tuaf es anmoe' on naan, nanokab neu mansian ii ok-oke', fin Uisneno nroim he nmoe' reko neu kit. 16 Rasin re' Uisneno nfee sin neu kit naan, ka huma' mese' fa nok sanat re' tuaf es, es re' ka'o Adam anmo'e. Oras In nmo'e nsaan, Uisneno nafeek am nak, “Ho msaan. Onaim ho ro he mupein hukun!” Mes maski tuaf anmo'e nsaan tuunb es, Uisneno es naprikas mansian ii ok-oke' sin i'moink ein. In nroim he naruru' ma nakrira' In nekan arekot fe', ma nafeek nak, “Au 'marak ko m'ak ho ka msaan fa. Onaim oras ia ho mupein fetin ma ka mupein fa ho hukun antein. Uum he mureko mfain mok Kau!” 17 Onaim tuaf es, es re' ka'o Adam, anmo'e nsaan ma ntanhai Uisneno In aprenat. Etun oras ia, mansian ii ok-oke' ro he nmaten. Mes Tuaf es antein, es re' Yesus Kristus, anmoe' rais reko. Natuin In anmoe' rais reko, es na' hit bisa tareko tfain tok Uisneno. Naan on re' baer es, re' In nfee je parsuum aah neu kit. In nroim he nfee kit 'monif amneot, on re' hit tjair Uisf ee In partei nggwin.
18 Onaim tuaf es anmo'e nsaan, nfei ranan he mansian ii ok-oke' ro he nriu' sin na'ko Uisneno In human ma In matan. Ma Tuaf es anmoe' batuur, re' nfei ranan he mansian ii ok-oke' bisa nareko nfanin nok Uisneno, he nmonin batuur nok Ne. 19 Au sairt ii on nai: ka'o Adam naan tuaf es, re' ka nroim fa he nneen Uisneno, rarit antanhai In aprenat. Ma too mfaun ein anmo'e nsanan on re' in imsa'. Rarit Nai' Yesus naan, Tuaf es, re' nneen ma natniin Uisneno, rarit anmoe' natuin In romin. In es re' anfei ranan he too mfaun ein bisa nareko nfain nok Uisneno.
20 Uisneno nasanut In Atoran neu ka'o Musa, he mansian ii ok-oke' nahiin narek-reko', mee es re' nsaan. Mes anbi mee-mee jah atoni' in sanat namfau ntein, anbi naan Uisneno naruru' ma nakrira' amsa' In nekan arekot nathoe nneis. 21 Unu' te, maufinu nbi atoni' in nekan anmui' kuasat he n'ator sin, tar antea anmo'e nsanan re' neik sin neun hukun a'maten. Mes oras ia, rais reko re' hit Usi' Yesus Kristus anmoo' je naan, Uisneno npaek je he naruru' ma nakrira' In nekan arekot neu kit. Nok rais reko naan anmui' kuasat he n'ator kit, rarit hit bisa tareko tfain tok Uisneno, tmoin batuur tok Ne piut-piut amsa'.